༄༅། །བལ་ཡུལ་འཇང་དགུན་ཆོས་ཐེངས་བཅུ་གསུམ་པའི་དབུ་འབྱེད་མཛད་སྒོར་བལ་ཡུལ་སྐུ་ཚབ་དོན་གཅོད་སྐུ་མགྲོན་གཙོ་བོར་མགྲོན་འབོད་གནང་བ་ལྟར་ཆེད་ཕེབས་གནང་ཡོད།

དེ་ཡང་བལ་ཡུལ་དགེ་ལྡན་ལྷན་ཚོགས་ཀྱི་གོ་སྒྲིག་འོག་ཕྱི་ལོ་ ༢༠༢༣   ཟླ་བ་ ༩ ཚེས་ ༢༥ ཉིན་བལ་ཡུལ་ནང་གི་དགེ་ལྡན་པའི་དགོན་སྡེ་གྲྭ་ཚང་གཞུང་ཆེན་སློབ་གཉེར་གྱི་བསྟི་གནས་ཁག་གི་དགེ་འདུན་པ་མཉམ་འཛོམས་ཐོག་འཇང་དགུན་ཆོས་གཞུང་ཆེན་ཚད་མ་རྣམ་འགྲེལ་གྱི་ཆོས་ཐོག་ཆེན་མོའི་དབུ་འབྱེད་མཛད་སྒོ་གནང་བར་སྐབས་དེའི་སྐུ་མགྲོན་གཙོ་བོར་བལ་ཡུལ་སྐུ་ཚབ་དོན་གཅོད་རྩིབས་རི་ལོ་པཎ་སྤྲུལ་སྐུ་ངག་དབང་མཆོག་གྲུབ་ལགས་ཀྱི་གཙོས་དམིགས་གསལ་སྐུ་མགྲོན་དུ་བལ་ཡུལ་གཞུང་འབྲེལ་ནང་པའི་གནད་ཡོད་མི་སྣ། སྐྱབས་གནས་བླ་སྤྲུལ་མཁན་པོ་དང་བཀའ་དྲིན་ཅན་གྱི་བཀའ་རབ་འབྱམས་དགེ་བའི་བཤེས་གཉེན་ཁག གཞན་ཡང་བལ་ཡུལ་ཁུལ་གྱི་བོད་མིའི་སྒྲིག་འཛུགས་ཀྱི་བལ་དོན་དྲུང་ཆེ་དང་ས་གནས་འགོ་འཛིན་རྣམ་པ། ས་འཐུས་ཚོགས་གཙོ་ཁག་དང་རང་དབང་བདེན་པའི་ཚོགས་གཙོ་ཁག དེ་བཞིན་གངས་ཅན་བདེ་རྩའི་འགན་འཛིན་དང་སློབ་གྲྭ་ཁག་གི་སློབ་སྤྱི་ཁག་བཅས་བལ་བོད་གཞུང་འབྲེལ་དང་གཞུང་འབྲེལ་མིན་པའི་ཚོགས་སྐྱིད་ཁག་སོགས་མཉམ་ཞུགས་ཀྱི་སྐུ་མགྲོན་དུ་ཕེབས་ཡོད་པ་དང་། དེ་སྐབས་བལ་ཡུལ་དགེ་ལྡན་ལྷན་ཚོགས་ཀྱི་ཚོགས་གཙོ་དགེ་བཤེས་ངག་དབང་ཐར་འདོད་ལགས་ཀྱིས་འཇང་དགུན་ཆོས་ཀྱི་མཛད་སྒོའི་ངོ་སྤྲོད་བྱུང་རིམ་དང་། གཞན་གནད་ཡོད་སྐུ་མགྲོན་ཁག་ནས་ཀྱང་གཏམ་བཤད་གནང་།སྐུ་མགྲོན་གཙོ་བོ་བལ་ཡུལ་དོན་གཅོད་རྩིབས་རི་ལོ་པཎ་སྤྲུལ་སྐུ་ལགས་ཀྱིས་གསུང་བཤད་ནང་བལ་ཡུལ་དགེ་ལྡན་ལྷན་ཚོགས་ནས་༸རྒྱལ་བ་དོན་གྱི་བདག་པོའི་བཀའ་སློབ་སྙིང་བཅངས་ཀྱིས་གཞུང་ཆེན་ཐོས་བསམ་སློབ་གཉེར་ལ་ཤུགས་བསྣོན་རྒྱབ་ནས་ད་ཆ་བལ་ཡུལ་ནང་རབ་འབྱམས་པ་ལོ་རེ་ནས་ལོ་རེ་བཞིན་སློབ་མཐར་ཕྱིན་པ་མང་པོ་བྱུང་དང་འབྱུང་བཞིན་ཡོད་པ་ལ་ཡི་རང་བསྔགས་བརྗོད་ཞུས། དེ་བཞིན་བལ་ཡུལ་ནང་བོད་ཡིག་གམ་སཾབྷོ་ཊའི་ཡི་གེ་དེ་བལ་ཡུལ་གཞུང་འབྲེལ་གྱི་ངོས་ལེན་ཡོད་པ་བཞིན་ཧི་མ་ལ་ཡའི་མི་རིགས་ཚང་མས་གང་ཐུབ་བདག་གཅེས་དང་བེད་སྤྱོད་གནང་དགོས་པའི་འབོད་བསྐུལ་གནང་། དེ་བཞིན་སྔར་དགོན་པའི་དབུ་བླ་དང་ལས་སྣེ་རྣམ་པས་བསྟན་དོན་དགོངས་པ་ཇི་ལྟར་བཞེས་པ་བཞིན་གཞོན་སྐྱེས་ཁག་ནས་སློབ་གཉེར་ལ་ཧུར་བསྐྱེད་བྱ་དགོས་པ་སོགས་གསུང་བཤད་གནང་། བལ་ཡུལ་དགེ་ལྡན་ལྷན་ཚོགས་ཀྱི་ཁྱབ་ཁོངས་དགོན་ཁག་རྣམས་ཀྱི་དགེ་འདུན་པ་དང་། ལྷག་པར་སྔར་རྒྱུན་བཞིན་བལ་ཡུལ་ཁུལ་གྱི་རིས་མེད་དགོན་སྡེ་ཁག་གཅིག་གི་དགེ་འདུན་པ་ཡང་མཉམ་ཞུགས་ཀྱིས་འདུ་འཛོམས་བྱས་ཏེ་གཞུང་ཆེན་བཀའ་པོད་ལྔའི་ནང་ཚན་ཚད་མ་རྣམ་འགྲེལ་ལ་བརྒལ་བརྟག་གསན་བཞེས་གནང་བཞིན་པ་བཅས། །