༄༅། །འདི་གར་ཐའེ་ཝན་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་མཁོད་དོན། ཐའེ་ཝན་གྲོས་ཚོགས་དང་། ཨ་རིར་རྟེན་གཞི་བྱས་པའི་རྒྱ་ནག་རོགས་སྐྱོར་མཐུན་ཚོགས། (China Aid) རྒྱལ་སྤྱིའི་ཆོས་ལུགས་རང་དབང་ཡིག་ཚང་། (Secretariat of IRF Summit) ཐའེ་ཝན་ཡེ་ཤུའི་ཆོས་ཚོགས་ཐུན་མོང་ནས་གོ་སྒྲིག་བྱས་པའི་ཐའེ་ཝན་རྒྱལ་སྤྱིའི་ཆོས་དད་རང་དབང་གི་ཚེས་མཐོའི་ཚོགས་འདུ་ཕྱི་ཟླ་ ༩ ཚེས་ ༧ དང་ ༨ ཉིན་གཉིས་རིང་རྒྱལ་ས་ཐའེ་པེའི་ཡོན་ཧྲན་གསོལ་མགྲོན་ཁང་དུ་འཚོགས་ཡོད་པ་རེད།

ཐའེ་ཝན་རྒྱལ་སྤྱིའི་ཆོས་དད་རང་དབང་གི་ཚེས་མཐོའི་ཚོགས་འདུ་དེར་ཐའེ་ཝན་གྱི་སྲིད་འཛིན་གཞོན་པ་སྐུ་ཞབས་ལའེ་ཆིང་དི་མཆོག་ཆེད་ཕེབས་ཀྱིས་གལ་ཆེའི་གསུང་བཤད་གནང་ཡོད་པ་དང་། ཁོང་ནི་མ་འོངས་ཐའེ་ཝན་གྱི་སྲིད་འཛིན་འོས་མི་གལ་ཆེ་ཤོས་དང་རེ་བ་ཆེ་ཤོས་དེ་ཆགས་ཀྱི་ཡོད།གཞན་ཡང་ཨ་རིའི་ཆོས་དད་རང་དབང་ལྷན་ཁང་གི་འགན་འཛིན་ཟུར་པ་གཙོས་གྲོས་ཚོགས་ཀྱི་འཐུས་མི་དང་། རྒྱ་ཁབ་ཁག་ནས་ཕེབས་པའི་ཆོས་དད་རང་དབང་གི་འཐུས་ཚབ་ ༡༥༠ ཙམ་ཕེབས་པའི་ནང་། ཐའེ་ཝན་བོད་ཀྱི་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཀྱང་གདན་ཞུས་ལྟར་མཉམ་ཞུགས་ཀྱིས་རྒྱ་ནག་གི་བོད་ཀྱི་ཆོས་དང་རིག་གཞུང་རྩ་མེད་ཇི་གཏོང་སྐོ ར་དཔེ་མཚོན་དང་བཅས་གསུང་བཤད་གནང་ཡོད་པ་རེད།བགྲོ་གླེང་ཚོགས་འདུ་དེར་མཉམ་ཞུགས་ཉི་ཧོང་གཞུང་འཛིན་རང་དབང་མང་གཙོ་ཚོགས་པའི་ཚོགས་གཞོན་དང་གྲོས་ཚོགས་འཐུས་མི། བོད་དོན་རྒྱབ་སྐྱོར་བ་སྐུ་ཞབས་ཀུང་ཙེ་སྦོ་ཤེན་མཆོག་ནས་བོད་པ་དང་ཉི་ཧོང་བ་དབར་ཕན་ཚུན་མཛའ་བརྩེ་དང་གྲོགས་པོའི་འདུ་ཤེས་ཡོད་ཅེས་བརྗོད་དེ་སྐུ་ཚབ་དོན་གཅོད་ལ་འབྲེལ་བ་གནང་བ་དང་། ཉི་ཧོང་གྲོས་ཚོགས་འཐུས་མི་ཁོང་གིས་རེ་བ་གནང་དོན་ལྟར། སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་དང་ཁོང་གཉིས་དབར་ཟུར་དུ་ཚིགས་ཇ་མཉམ་མཆོད་དང་འབྲེལ། ཕན་ཚུན་རྒྱུས་ལོན་དང་རྒྱལ་སྤྱིའི་ཐོག་བོད་དོན་ལ་རྒྱབ་སྐྱོར་གནང་ཕྱོགས་སྐོར་སོགས་ཀྱི་བརྗོད་གཞིར་གླེང་མོལ་ཞུས། ད་ཐེངས་ཀྱི་ཚོགས་འདུ་དེར་ཡུ་གུར་དང་། སོག་པོ་ཕྱི་ནང་གཉིས། བོད་དང་ཧོང་ཀོང་། ཐའེ་ཝན་གྱི་འཐུས་ཚབ་མང་པོ་འཛོམས་ཡོད་སྟབས། ཚང་མས་མ་འོངས་ཐུན་མོང་ཐོག་ལས་འགུལ་སྤེལ་ཕྱོགས་སྐོར་ལའང་གོ་བསྡུར་དང་བགྲོ་གླེང་བྱུང་ཡོད། སྐུ་ཚབ་དོན་གཅོད་དང་ཨ་རིའི་ཆོས་དད་རང་དབང་ལྷང་ཁང་གི་འགན་འཛིན་མཆོག ཡུ་གུར་གྱི་འཐུས་ཚབ་བཅས། ཆོས་དད་རང་དབང་གི་ཚེས་མཐོའི་ཚོགས་འདུའི་ཐུན་མོང་གི་ཚོགས་གཙོ་ལྕམ་ཁ་ཌེ་ལིན་སི་ཝེ་ཐེ་ (Katrina Swett) མཆོག་དང་། ཐུན་མོང་གི་ཚོགས་གཙོ་སྐུ་ཞབས་སེ་མི་ཡོལ་བྷྲའོན་བྷེག་ (Samuel Brownback) མཆོག་ནས་གསུང་བཤད་གནང་། ཐའེ་ཝན་ནང་སྲིད་བློན་ཆེན་ལིང་ཡུག་ཁྲང་མཆོག་ཆེད་དུ་ཚོགས་འདུར་ཕེབས་ཏེ་ཐའེ་ཝན་ནང་ཆོས་ལུགས་ཁག་གི་གནས་ཚུལ་དང་། ཐའེ་ཝན་གྱི་ལག་བསྟར་བྱེད་བཞིན་ཆོས་ལུགས་སྣ་མང་འདྲ་མཉམ་མཉམ་གནས་ཀྱི་སྲིད་བྱུང་ངོ་སྤྲོད་ཞུས།ད་ཐེངས་ཉིན་གཉིས་ཀྱི་ཚོགས་འདུའི་ནང་ཚང་མས་རྒྱ་ནག་གཞུང་གིས་ལག་པ་རིང་པོ་བརྐྱངས་ཏེ་ཕྱི་ཕྱོགས་རང་དབང་ལུང་པར་ཡོད་པའི་ཆོས་ཚོགས་དང་ཆོས་ལུགས་མི་སྣར་འཇིགས་བསྐུལ་སྟངས་འཛིན་གྱི་ཛ་དྲག་གནས་སྟངས་དང་། རྒྱ་ནག་དང་རྒྱ་ནག་གིས་དབང་བསྒྱུར་བྱེད་བཞིན་པའི་ས་ཁུལ་ཁག་ཏུ་ཆོས་ལུགས་རང་དབང་གི་ཛ་དྲག་གནས་སྟངས་སྐྱོབ་ཐབས་སྐོར་སོགས་ལ་བགྲོ་གླེང་གཏིང་ཟབ་གནང་ཡོད་པ་མ་ཟད། རིང་མིན་ཐའེ་པེ་བསྒྲགས་གཏམ་ཞིག་ཀྱང་སྤེལ་རྒྱུ་ཡིན་འདུག་པ་བཅས།།