༄༅། །ཕྱི་ལོ་ ༢༠༢༣ ཟླ་བ་ ༠༩ ཚེས་ ༡༠ ཉིན་ཉི་འོང་དང་ལྷོ་ཀོ་རི་ཡར་གནས་སྡོད་བོད་མི་རྣམས་ཀྱིས་བོད་ཀྱི་མང་གཙོའི་དུས་ཆེན་ཕྱི་བསྣུར་གྱིས་སྲུང་བརྩི་ཞུས་ཡོད་པ་རེད།
དེ་ཡང་མཛད་སྒོའི་ཐོག་མར་ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་དང་བོད་རིགས་ཚོགས་པའི་ཚོགས་གཙོ་བསྟན་འཛིན་ཤེས་རབ་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་འབུལ་གནང་བ་དང་ཆབས་ཅིག་བོད་རྒྱལ་ཁབ་ཆེན་པོའི་རྒྱལ་གླུ་དང་མང་གཙོ་གསར་བཞད་བླངས་རྗེས་སྐུ་ཚབ་དོན་གཅོད་ནས་བཀའ་ཤག་གི་གསུང་འཕྲིན་སྒྲོགས་སྦྱང་དང་། མང་གཙོའི་གལ་གནད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མང་གཙོའི་གསོལ་སྩལ་བཀའ་དྲིན་བསྐྱངས་པའི་སྐོར་གསུངས་པ་མ་ཟད། གལ་ཏེ་བོད་མིའི་སྤྱི་ཚོགས་སྲ་བརྟན་ཡུན་རིང་གནས་དགོས་ཚེ་མང་གཙོའི་ལམ་ལུགས་ལག་བསྟར་གནང་གལ་ཆེ་བའི་སྐོར་གསུང་བཤད་གནང་ཡོད།
དེ་བཞིན་ཉི་འོང་བོད་རིགས་ཚོགས་པའི་ཚོགས་གཙོ་བསྟན་འཛིན་ཤེས་རབ་ལགས་དང་། ལྷོ་ཀོ་རི་ཡའི་སྐུ་ཚབ་དགེ་བཤེས་བསྟན་འཛིན་ནམ་མཁའ་ལགས། དགེ་བཤེས་བསྟན་འཛིན་བཟང་པོ་ལགས་ནས་མང་གཙོའི་འཕེལ་རིམ་དང་། བོད་མི་རྣམས་ནས་མང་གཙོ་ལག་བསྟར་གནང་རྒྱུ་གལ་གནད་ཆེན་པོ་ཡིན་སྐོར་གསུང་བཤད་གནང་ཡོད་པ་རེད།
དེ་དང་ཆབས་ཅིག་ཆི་བ་འཕྲུལ་རིག་གཙུག་ལག་སློབ་ཁང་གི་བོད་ཕྲུག་སློབ་ཟུར་བ་དང་། ད་ལྟ་སློབ་གཉེར་གནང་བཞིན་པ་རྣམས་ཀྱིས་གཙུག་ལག་སློབ་ཁང་ངོས་ནས་བོད་དོན་དང་བོད་མིར་སྔར་ལྷག་རྒྱབ་སྐྱོར་གནང་རྒྱུའི་ཞལ་བཞེས་གནང་སྐོར་སྐུ་ཚབ་དོན་གཅོད་ལ་སྙན་སེང་ཞུས་པ་མ་ཟད། ཁོང་རྣམས་ནས་རྒྱ་གར་ནང་དུ་བོད་ཕྲུག་གཉིས་ཀྱི་ཤེས་ཡོན་ཐོག་རྒྱབ་སྐྱོར་གནང་རྒྱུའི་ཞལ་བཞེས་གནང་ཐོག་ཐོག་མའི་རོགས་དངུལ་གང་འཚམ་སྐུ་ཚབ་དོན་ཁང་ལ་ཕུལ་ཡོད་ཅིང་། སྐུ་ཚབ་དོན་ཁང་ནས་ཁོང་རྣམས་ནས་བོད་མིའི་སྤྱི་ཚོགས་ལ་ཞབས་འདེགས་སྒྲུབ་པར་བསྔགས་བརྗོད་ཞུས་ཡོད།
མཛད་སྒོའི་ཐོག་ཉི་འོང་གནས་སྡོད་བོད་རིགས་དང་བོད་དོན་རྒྱབ་སྐྱོར་བ་རྣམས་དངོས་སུ་ལྷན་འཛོམས་དང་། ལྷོ་ཀོ་རི་ཡའི་བོད་མི་རྣམས་དྲྭ་ཐོག་ནས་མཉམ་ཞུགས་གནང་ཡོད་ལ། སྐབས་དེར་ཉི་འོང་བོད་དོན་རྒྱབ་སྐྱོར་བ་རྣམས་བོད་མིའི་མང་གཙོའི་དུས་ཆེན་ལ་མཉམ་ཞུགས་གནང་རྒྱུ་བྱུང་བར་དགའ་ཚོར་ཆེན་པོ་བྱུང་སྐོར་གསུངས་ཡོད་པ་བཅས།།
