༄༅། །ཕྱི་ལོ་ ༢༠༢༣ ཟླ་བ་ ༩ ཚེས་ ༧ རེས་གཟའ་ཕུར་བུ་ཉིན་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་དྲུང་ཆེ་གསར་རྙིང་དབར་རྩིས་སྤྲོད་རྩིས་ལེན་ལེགས་པར་གྲུབ་མཚམས་དྲུང་ཆེ་གསར་པ་གྱང་གསར་ཚེ་རིང་དོན་གྲུབ་ལགས་ཀྱིས་དཔལ་འབྱོར་ལས་ཁུངས་ཀྱི་དྲུང་ཡིག་ཆེན་མོའི་ལས་འཁུར་འགོ་འཛུགས་གནང་ཡོད།དེ་ཡང་གོང་ཚེས་ཉིན་གྱི་སྔ་དྲོ་དཔལ་འབྱོར་ལས་ཁུངས་སུ་སྤྲོད་དཔང་ཆོས་རིག་དྲུང་ཆེ་ཀླུ་ཁྲི་ཚང་འཆི་མེད་ཚེ་དབྱངས་ལགས་དང་། དྲུང་ཚབ་བསྟན་འཛིན་ལེགས་གྲུབ་ལགས། དྲུང་ཆེ་གསར་པ་ཚེ་རིང་དོན་གྲུབ་ལགས་བཅས་ལྷན་འཛོམས་ཀྱི་ཐོག་མར་དྲུང་ཆེ་གསར་རྙིང་གཉིས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་འབུལ་ཞུས་གྲུབ་བསྟུན་ཞབས་སྟེགས་རྩིས་སྤྲོད་གནང་རྗེས་དྲུང་ཆེ་གསར་རྙིང་གཉིས་ནས་ཕན་ཚུན་མཇལ་དར་གཡོགས་རེས་གནང་། དེ་ནས་རིམ་བཞིན་དཔལ་འབྱོར་ལས་ཁུངས་ཀྱི་ལས་བྱེད་ཡོངས་ནས་དྲུང་ཆེ་གསར་པ་གྱང་གསར་ཚེ་རིང་དོན་གྲུབ་ལགས་སུ་འཚམས་འདྲིའི་མགུལ་དར་ཕུལ་གྲུབ་མཚམས་རྟེན་འབྱུང་གསོལ་ཇ་དང་འབྲས་སིལ་ཕུལ་ཡོད། །