༄༅། །བོད་རྒྱལ་ལོ་ ༢༡༥༠ ཕྱི་ལོ་ ༢༠༢༣ ཟླ་ ༩ ཚེས་ ༢ ཉིན་བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་གསུང་རའི་ནང་། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པས་དབུས་ལྷན་ཁང་ཁག་གི་དྲུང་ཆེ་ཆུང་རྣམས་དང་། སྲི་ཞུ་བ། གཞུང་ཁོངས་མིན་པའི་ཚོགས་སྐྱིད་ཁག་གི་འཐུས་མི་རྣམ་པ། སེར་སྐྱ་ཕོ་མོ། སློབ་ཕྲུག་སོགས་ཚང་འཛོམས་ཐོག བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་རྒྱལ་མཆོག་སྐུ་ཕྲེང་བཅུ་བཞི་པ་ཆེན་པོ་མཆོག་གིས་མང་གཙོའི་ལམ་བཟང་གསོལ་བསྩལ་བཀའ་དྲིན་བསྐྱངས་ཏེ་མི་ལོ་ ༦༣ འཁོར་བའི་དུས་ཆེན་གྱི་གཞུང་འབྲེལ་མཛད་སྒོ་སྲུང་བརྩི་གཟབ་རྒྱས་ཞུས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠ ཐོག་སྐུ་མགྲོན་གཙོ་བོ་སུད་ཝི་ཌན་གྲོས་ཚོགས་འཐུས་མིའི་སྐུ་ཚབ་ཚོགས་ཆུང་སྣེ་ཁྲིད་པ་ལྕམ་སྐུ་ (Margareta cederfelt) མཆོག་དང་། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་བཅས་ཐེག་ཆེན་ཆོས་གླིང་གཙུག་ལག་ཁང་གི་གསུང་རར་ཞབས་སོར་འཁོད་མཚམས་མཛད་སྒོ་དབུ་འཛུགས་ཀྱི་ཐོག་མར་ཚང་མ་སྐུ་བཞེངས་ཐོག་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བོད་རྒྱལ་ཁབ་ཆེན་པོའི་རྒྱལ་དར་མཁའ་དབྱིངས་སུ་སྒྲེང་འཛུགས་གནང་སྐབས་བོད་ཀྱི་ཟློས་གར་ཚོགས་པ་ནས་རྔ་རོལ་དང་བཅས་བོད་རྒྱལ་ཁབ་ཆེན་པོའི་རྒྱལ་གླུ་དང་། རྒྱ་གར་རྒྱལ་གླུ་དབྱངས་སུ་གྱེར།
དེ་ནས་བོད་ཀྱི་ཟློས་གར་ཚོགས་པས་མང་གཙོའི་གསར་གཞས་འབུལ་ལམ་ཞུས་གྲུབ་མཚམས་མེས་དབོན་གཙུག་ལག་དཔེ་སྟོན་སློབ་གྲྭ་དང་དྷ་སྟེང་བོད་ཁྱིམ་གཉིས་ཀྱི་སློབ་ཕྲུག་གྲངས་བཞི་ནས་མང་གཅོའི་འཕེལ་རིམ་དང་འབྲེལ་བའི་གཏམ་བཤད་གནང་གྲུབ་མཚམས། དཔལ་ལྡན་ཁྲིམས་ཞིབ་པ་གཞན་བསྟན་འཛིན་ལུང་རྟོགས་མཆོག་ནས་འདི་ལོར་དགའ་ལྡན་ཕོ་བྲང་ལེགས་གསོལ་བྱ་དགའ་བཞེས་མཁན་སློབ་ཕྲུག་ ༡༠ དང་། ཕུལ་བྱུང་བྱ་དགའ་བཞེས་མཁན་ ༥ ལ་ལེགས་གསོལ་ཕྱག་འཁྱེར་གནང་ཞིང་། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་འབུམ་རམས་པ་ཆེ་བསྟོད་བྱ་དགའ་བཞེས་མཁན་ ༦ ལ་ཕྱག་འཁྱེར་དང་ལེགས་གསོལ་དང་། དབུས་རང་ཁོངས་ལས་བྱེད་ཞབས་ལོ་ ༢༥ ཡན་འཁོར་མཁན་ལས་བྱེད་གཅིག་ལ་ལེགས་གསོལ་ཕྱག་འཁྱེར་གནང་།
དེ་རྗེས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཀིརྟི་དྲུང་ཡིག་འབྲིང་བ་འཇིགས་མེད་ལགས་ནས་༸ཁོང་རིན་པོ་ཆེའི་སྲིད་དོན་མཛད་རྣམ་ ༼ ཤར་སྟག་མོའི་བུ་ ༽ ཞེས་པའི་མཛད་རྣམ་དཔེ་དེབ་ཞལ་འབྱེད་དང་། སུད་ཝི་ཌན་གྲོས་ཚོགས་འཐུས་མི་རྣམས་ལ་མཇལ་དར། བོད་མིའི་སྒྲིག་འཛུགས་ཀྱི་རོགས་ཚོགས་རྣམས་ལ་ཕྱག་རྟགས་དང་ལག་འཁྱེར་གནང་།
དེ་ནས་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་དང་། དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བཀའ་ཤག་གི་གསུང་བཤད་གནང་རྗེས་སྐུ་མགྲོན་གཙོ་བོ་སུད་ཝི་ཌན་གྲོས་ཚོགས་འཐུས་མིའི་སྐུ་ཚབ་ཚོགས་ཚུང་གི་སྣེ་ཁྲིད་ལྕམ་སྐུ་མར་གྷ་རེ་ཊ་སི་ཊར་ཕེལཌ་ ( Margareta Cederfelt) མཆོག་གིས་གསུང་བཤད་གནང་ཡོད། སྐབས་དེར་ཁོང་མོས་བོད་དོན་རྒྱབ་སྐྱོར་ཆེད་ད་ཐེངས་བོད་ཀྱི་མང་གཙོའི་དུས་ཆེན་མཛད་སྒོའི་ཐོག་སུད་ཝེ་ཊན་གྱི་ཆབ་སྲིད་ཚོགས་པ་བཞིའི་གྲོས་ཚོགས་འཐུས་མི་ཁག་ཅིག་ཆེད་བཅར་གནང་ཡོད་སྐོར་དང་། སུད་ཝི་ཊན་ནང་དུའང་སུད་ཝི་ཊན་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ངོས་ནས་བོད་དོན་གོ་རྟོགས་སྤེལ་རྒྱུ་མཚོན་པའི་ལས་དོན་སྣ་མང་རྩོམ་བཞིན་པའི་ངོ་སྤྲོད་གནང་བ་མ་ཟད། རྒྱ་ནག་གཞུང་གིས་མི་སེར་སྤེལ་ཡུལ་གཏན་འཇགས་སློབ་གྲྭ་སོགས་བརྒྱུད་བོད་ཀྱི་རིག་གཞུང་རྩ་མེད་བཟོ་རྒྱུའི་སྲིད་བྱུས་ལ་སྐྱོན་བརྗོད་ཀྱིས་རྒྱ་གཞུང་ནས་སྲིད་བྱུས་དེ་རིགས་འཕྲལ་དུ་མཚམས་འཇོག་དགོས་པའི་འབོད་སྐུལ་གནང་ཡོད་པ་བཅས།།
བོད་མིའི་མང་གཙོའི་དུས་ཆེན་ཐེངས་ ༦༣ སྲུང་བརྩི་གཟབ་རྒྱས་ཞུས་པ།
གསར་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)
འབྲེལ་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)