༢༠༡༡ ཟླ་ ༡༡ ཚེས་ ༢༨ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༡༡ ཚེས་ ༢༧ ནས་ ༣༠ བར་ཉིན་གྲངས་བཞི་རིང་འཚོགས་རྒྱུའི་འཛམ་གླིང་ནང་པའི་ལྷན་ཚོགས་དེ་བཞིན་ཕྱི་ཚེས་ ༢༧ ཉིན་རྒྱལ་ཁབ་ཁག་ ༤༢ ནས་ནང་པའི་ཐེག་པ་ཆེ་ཆུང་གི་བླ་མ་དགེ་སློང་། ནང་པའི་ཆོས་བརྒྱུད་འདྲ་མིན་གྱི་སྐུ་ཚབ་དང་ཟུར་ཉན་པ། ཚོགས་བཅར་བ་བཅས་ཁྱོན་མི་གྲངས་ ༨༠༠ བརྒལ་བ་ལྷན་འཛོམས་ཐོག་ལྡི་ལིར་རྟེན་གཞི་བྱས་པའི་སྐར་མ་ལྔ་ཅན་གྱི་ཨ་ཤཱོ་ཁ་གསོལ་མགྲོན་ཁང་དུ་དབུ་འཛུགས་གནང་འདུག  དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར། ཚོགས་ཆེན་དབུ་འབྱེད་མཛད་སྒོར་འཁོན་རིགས་བསྟན་པའི་མངའ་བདག་ས་སྐྱ་བདག་ཁྲི་རིན་པོ་ཆེ་མཆོག་གིས་དབུས་ཡོངས་འཛིན་གླིང་རིན་པོ་ཆེ་མཆོག་དང་། དགའ་ལྡན་ཁྲི་རིན་པོ་ཆེ་མཆོག ཆོས་རིག་བཀའ་བློན་མཆོག བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག ཨ་ཀྱཱ་རིན་པོ་ཆེ་མཆོག ལྡི་ལི་སྐུ་ཚབ་དོན་གཅོད་བསྟན་པ་ཚེ་རིང་ལགས་སོགས་ཀྱིས་མཉམ་ཞུགས་གནང་འདུག     སྐབས་དེར་རྒྱལ་ཁབ་འདྲ་མིན་གྱི་ནང་པའི་བླ་ཆེན་རྣམས་ཀྱིས་ཚོགས་ཆེན་གྱི་མཛད་སྒོར་གསུང་བཤད་གནང་བ་ལྟར་ས་སྐྱ་བདག་ཁྲི་རིན་པོ་ཆེ་མཆོག་གིས་ཀྱང་གསུང་བཤད་གནང་ཡོད།  སྤྱིར་ནང་པའི་ལྷན་ཚོགས་ཀྱི་ཚོགས་ཆེན་འདི་ལྟ་བུ་དེ་སྔ་རྒྱ་གར་ནང་ཚོགས་མྱོང་མེད་པ་དང་། ཐེངས་འདིའི་ནང་པའི་ཚོགས་ཆེན་ནང་གནད་དོན་མང་དག་ཅིག་ལ་གྲོས་བསྡུར་གནང་རྒྱུའི་ཁོངས་ནས་ཆོས་ལུགས་མཐུན་སྒྲིལ་དང་། སྤྱི་ཚོགས་ནང་ཞི་བདེ་དང་འཆམ་མཐུན་བསྐྲུན་ཐབས། འཛམ་གླིང་གི་ཁོར་ཡུག་བདག་གཅེས་གནང་ཕྱོགས། ནང་པའི་ཚན་རིག་པ་དང་ནུབ་ཕྱོགས་པའི་ཚན་རིག་པ་དབར་བགྲོ་གླེང་འཚོགས་རྒྱུ་སོགས་ཀྱི་ཐོག་བགྲོ་གླེང་གནང་རྗེས་གྲོས་ཆོད་ཀྱང་འཇོག་རྒྱུ་ཡིན་འདུག ཉིན་མཐའ་མའི་མཇུག་བསྡོམས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་གསོལ་འདེབས་ཞུས་དོན་ལྟར་ཆིབས་སྒྱུར་བསྐྱང་སྟེ་ལམ་སྟོན་བཀའ་སློབ་སྩལ་རྒྱུ་ཡིན་འདུག སྐབས་དེར་ཚོགས་ཆེན་ཐོག་བགྲོ་གླེང་བྱས་པའི་མཐའ་མའི་གྲོས་ཆོད་རྣམས་མགོན་པོ་གང་ཉིད་མཆོག་ལ་༸སྙན་སྒྲོན་ཞུ་རྒྱུ་ཡིན་འདུག་པ་བཅས། །