༢༠༡༡ ཟླ་ ༡༡ ཚེས་ ༢༨ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༡༡ ཚེས་ ༢༥ ཉིན་བཀའ་བློན་ཁྲི་པ་བློ་བཟང་སེང་གེ་མཆོག་གིས་ཌེན་མཀ་ཏུ་ཌེན་མཀ་གྲོས་ཚོགས་ཀྱི་འཐུས་མི་ཁག་གཅིག་དང་བོད་མིའི་སྒྲིག་འཛུགས་ཀྱི་ཤེས་ཡོན་ལས་གཞིའི་ཐོག་རོགས་སྐྱོར་གནང་མཁན་རོགས་ཚོགས་ཀྱི་ཚོགས་མི་དང་ལྷན་མཇལ་འཕྲད་གནང་ཡོད། དེ་ཡང་གོང་ཚེས་ཉིན་བཀའ་ཁྲི་མཆོག་ཌེན་མཀ་གི་རྒྱལ་ས་ཀོ་པན་ཧེ་གྷན་གྱི་གནམ་ཐང་དུ་ཕེབས་སྐབས་གནམ་ཐང་གི་ལས་བྱེད་ལྕམ་སྐུ་ཨི་ཝ་(Ms.Eva) ལགས་ཀྱིས་བཀའ་ཁྲི་མཆོག་གིས་གཙོས་སྐུ་ཚབ་དོན་གཅོད་ཐུབ་བསྟན་བསམ་གྲུབ་ལགས་བཅས་ལ་ཕེབས་བསུ་ཞུས་ཡོད་པ་མ་ཟད། ཌན་མཀ་ཏུ་གནས་སྡོད་བོད་རིགས་རྣམས་དང་ཌན་མཀ་བོད་དོན་རྒྱབ་སྐྱོར་ཚོགས་པ་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད།     བཀའ་ཁྲི་མཆོག་གིས་ཐོག་མར་བོད་མིའི་སྒྲིག་འཛུགས་ཀྱི་ཤེས་ཡོན་ལས་གཞིའི་ཐོག་རོགས་སྐྱོར་གནང་མཁན་ཌན་མཀ་གི་རོགས་ཚོགས་ཀྱི་ཚོགས་མི་ཁག་གཅིག་དང་ལྷན་དུ་ཚོགས་འདུ་འཚོགས་སྐབས་ཌན་མཀ་ཕྱི་སྲིད་ལས་ཁུངས་ཀྱི་ལས་བྱེད་ཀྱང་མཉམ་ཞུགས་གནང་ཡོད། ཚོགས་འདུ་གྲོལ་མཚམས་བཀའ་ཁྲི་མཆོག་གིས་ཌེན་མཀ་ཕྱི་སྲིད་ལས་ཁུངས་ཀྱི་ཕྱི་འབྲེལ་ལས་དོན་ཚན་པའི་གྲོས་ཚོགས་འཐུས་མི་བཞི་དང་མཇལ་འཕྲད་གནང་ཡོད།  སྐབས་དེར་བཀའ་ཁྲི་མཆོག་གིས་གྲོས་ཚོགས་འཐུས་མི་རྣམས་ལ་གཞིས་ལུས་བོད་མི་རྣམས་ཀྱིས་རང་དབང་ཆེད་རང་ལུས་མེར་སྲེག་བཏང་བའི་གནས་ཚུལ་སྐོར་གསལ་བཤད་དང་བོད་ཀྱི་དཀའ་རྙོག་འདི་བཞིན་ཡལ་འགྲོ་རྒྱུའི་གནད་དོན་ཞིག་མིན་པ་མ་ཟད། བོད་མི་རྣམས་ཀྱིས་སོ་སོའི་ཐོབ་ཐང་ཆེད་འཐབ་རྩོད་མུ་མཐུད་བྱ་རྒྱུའི་ཆོད་སེམས་བརྟན་པོ་ཡོད་སྐོར་ཡང་གསལ་བཤད་གནང་ཡོད། དེ་ནས་གྷི་རིན་ལན་ཌིའི་(Greenland)ཨི་ནུ་ཨི༝ཊ་ཨ་ཊ་ཁ་ཊི་གྷི་ཊི་(Inuit Ataqatigiit Party)ཆབ་སྲིད་ཚོགས་པའི་ཚོགས་མི་ལྕམ་སྐུ་སཱ་རཱ་ཨོལ་ས་ཝིག་(Ms.Sara Olsvig ) ལགས་ཀྱིས་ཉེ་ཆར་བོད་ནང་གི་གནས་ཚུལ་ཐོག་བློ་འཚབ་ཡོད་སྐོར་གསུངས་པ་མ་ཟད། གྷི་རིན་ལན་ཌིར་རང་སྲིད་རང་སྐྱོང་ཐོག་ཉམས་མྱོང་ཡག་པོ་ཡོད་པར་བརྟེན། ལྕམ་སྐུ་མཆོག་གིས་བོད་མི་ཚོར་རྒྱབ་སྐྱོར་བྱ་རྒྱུའི་གྲ་སྒྲིག་ཨང་གསར་ཡོད་ཅེས་གསུངས་ཡོད།     དེ་རྗེས་བཀའ་ཁྲི་མཆོག་གིས་ཌན་མཀ་གི་རླུང་འཕྲིན་དང་ཉིན་རེའི་ཚགས་ཤོག་གི་གསར་འགོད་པས་ཆེད་དོན་དྲི་བར་ལན་འདེབས་གནང་གྲུབ་མཚམས་ཌན་མཀ་བོད་དོན་རྒྱབ་སྐྱོར་ཚོགས་པའི་འགན་འཛིན་དང་ཚོགས་མིའི་ལྷན་དུ་ཚོགས་འདུ་འཚོགས་སྐབས་ཚོགས་བཅར་བ་རྣམས་ཀྱིས་བོད་ནང་རང་ལུས་མེར་སྲེག་བཏང་བའི་དཀའ་ངལ་དེ་དག་སེལ་ཆེད་རོགས་རམ་ཇི་འདྲ་བྱེད་ཐུབ་མིན་ཐོག་གྲོས་བསྡུར་གནང་ཡོད་པ་བཅས།།