ཨོ་ལེ་མིཀ་ཐོམ་མེ་སནམཆོག་དང་སྐུ་ཞབས་ཨུལ་ཨེ་རིག་མཆོག་དང་ལྷན།
༢༠༡༡ ཟླ་ ༡༡ ཚེས་ ༢༨ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༡༡ ཚེས་ ༢༤ ཉིན་ཇར་མན་ཁུལ་གྱི་ལས་དོན་ཡོངས་སུ་ལེགས་གྲུབ་ཐོག་ནོར་ཝེའི་རྒྱལ་ས་ཨོ་སི་ལོར་ཕེབས་འབྱོར་བྱུང་ཡོད། དེ་ཡང་བཀའ་ཁྲི་མཆོག་གིས་ཐོག་མར་ནོར་ཝེ་རྒྱལ་ས་ཨོ་སི་ལོའི་ནང་ནོར་ཝེའི་རྒྱལ་ཡོངས་གསར་འགྱུར་བརྒྱུད་ལམ་ཨབ་ཏེན་པོ་སི་ཏཝན་ཞེས་པའི་གསར་ཤོག་གི་ཆེད་དོན་དྲི་བར་ལན་འདེབས་གནང་རྗེས་ནོར་ཝེའི་ངལ་རྩོལ་ཆབ་སྲིད་ཚོགས་པའི་སྤྱི་ཁྱབ་དྲུང་ཆེ་སྐུ་ཞབས་རེ་མོན་ཌི་ཇོ་ཧན་སོན་(Mr.Raymond Johansen)མཆོག་གིས་ཆབ་སྲིད་ཚོགས་པའི་ལས་ཁུངས་ཨ་མའི་ནང་བཀའ་ཁྲི་མཆོག་མགྲོན་འབོད་ལྟར་ཕེབས་ཏེ་ཆུ་ཚོད་གཅིག་ལྷག་ཙམ་རིང་གསུང་མོལ་ལྷུག་པོ་བྱུང་ཡོད། སྐབས་དེར་བཀའ་ཁྲི་མཆོག་གིས་བཙན་བྱོལ་བོད་མིའི་སྒྲིག་འཛུགས་དང་ད་ལྟ་འི་བོད་ནང་གི་གནས་སྟངས་སོགས་ཞིབ་ཕྲ་གསལ་བཤད་གནང་བ་མ་ཟད། སྤྱི་ཁྱབ་དྲུང་ཆེ་མཆོག་ནས་ཀྱང་བོད་ཀྱི་གནད་དོན་ཐད་རྒྱུན་དུ་སེམས་ཁུར་ཆེན་པོ་གནང་བཞིན་ཡོད་པ་དང། བོད་རྒྱ་ཞི་མོལ་ཐོག་བོད་ཀྱི་དཀའ་ངལ་གང་མྱུར་སེལ་རྒྱུའི་འབད་བརྩོན་མུ་མཐུད་གནང་རྒྱུ་ཡིན་སྐོར་གསུངས། སྤྱི་ཁྱབ་དྲུང་ཆེ་མཆོག་སྔ་ལོ་རྒྱ་ནག་ཏུ་ཕེབས་ཡོད། དེ་རྗེས་བཀའ་ཁྲི་མཆོག་གིས་ནོར་ཝེ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཨོ་ལེ་མིཀ་ཐོམ་མེ་སན་(Mr.Olemic Thommesen)མཆོག་དང་ནོར་ཝེ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་དང་ནོར་ཝེ་ཕྱི་འབྲེལ་ལས་དོན་ཚན་པའི་ཚོགས་མི་སྐུ་ཞབས་ཨུལ་ཨེ་རིག་(Mr.Ulf Erik knudsen)མཆོག་དང་མཇལ་འཕྲད་གནང་ཡོད། སྐབས་དེར་ཁོང་རྣམ་གཉིས་ནས་ནོར་ཝེ་གྲོས་ཚོགས་ཀྱི་ཚོགས་འདུ་ཚོགས་སའི་ཚོགས་ཁང་ཞིག་ཏུ་བཀའ་ཁྲི་མཆོག་ལ་ཕེབས་བསུ་གཟབ་རྒྱས་ཞུས་ཡོད་པ་མ་ཟད། ཚོགས་ཁང་དེ་ནི་སྤྱིར་ནོར་ཝེའི་གཞུང་འབྲེལ་གྱི་སྐུ་མགྲོན་མི་སྣ་གལ་ཆེ་ཁག་ལ་སྣེ་ལེན་ཞུ་ཡུལ་ཞིག་ཡིན་འདུག སྐབས་དེར་ནོར་ཝེའི་གྲོས་ཚོགས་ཀྱི་ལོ་འཁོར་སྔོན་རྩིས་དང་འབྲེལ་བའི་གྲོས་ཚོགས་ལྷན་ཚོགས་འཚོགས་བཞིན་པར་བརྟེན།
བཀའ་ཁྲི་མཆོག་གིས་ས་གནས་བོད་རིགས་ཚོར་གསུང་བཤད་གནང་བཞིན་པ།
གྲོས་ཚོགས་འཐུས་མི་མང་པོས་བཀའ་ཁྲི་བློ་བཟང་སེང་གེ་མཆོག་མཇལ་འདོད་ཡོད་ཀྱང་དེ་ལྟར་ཐུབ་མེད། གཞན་ཡང་ཁོང་རྣམ་གཉིས་ཀྱིས་སྐབས་དེར་བཀའ་ཁྲི་མཆོག་ལ་ནོར་ཝེ་གྲོས་ཚོགས་ཀྱིས་བོད་མི་ཚོའི་ཞི་བའི་ལམ་ནས་བདེན་པའི་འཐབ་རྩོད་དེར་རྒྱབ་སྐྱོར་གནང་བཞིན་པ་མ་ཟད། བོད་ཀྱི་བདེན་པའི་འཐབ་རྩོད་དེར་རྒྱབ་སྐྱོར་ཤུགས་ཆེ་ཡོད་སྐོར་གསལ་བཤད་གནང་ཡོད། ཕྱོགས་མཚུངས་ཁོང་རྣམ་གཉིས་ཀྱིས་བོད་ཀྱི་གནད་དོན་དེ་བཞིན་ནོར་ཝེའི་གྲོས་ཚོགས་སུ་བགྲོ་གླེང་ཆེད་གླེང་སློང་བྱ་རྒྱུའི་ཁས་ལེན་གནང་ཡོད། མཇལ་འཕྲད་གྲུབ་བསྟུན་ནོར་ཝེ་ཕྱི་འབྲེལ་ལས་དོན་ཚན་པའི་འབྲེལ་ཡོད་ལས་བྱེད་ཁག་གཅིག་གིས་བཀའ་ཁྲི་མཆོག་ལ་ཉིན་གུང་གསོལ་སྟོན་ཞིག་གོ་སྒྲིག་ཞུས་པའི་སྐབས་སུ་འབྲེལ་ཡོད་ལས་བྱེད་རྣམས་ལ་བོད་ནང་གི་ད་ལྟའི་གནས་སྟངས་དང་བཙན་བྱོལ་བོད་མིའི་སྒྲིག་འཛུགས་ནང་འཕོ་འགྱུར་གང་བྱུང་མིན་སོགས་ངོ་སྤྲོད་གནང་བ་དང་སྦྲགས། ནོར་ཝེ་གཞུང་གིས་བོད་མི་ཚོར་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཡོད། དེ་རྗེས་བཀའ་ཁྲི་མཆོག་གིས་ནོར་ཝེ་བོད་རིགས་ཚོགས་པའི་སྐུ་ཚབ་འཐུས་མི་རྣམས་ལ་གསུང་བཤད་ཀྱང་གནང་ཡོད། དེ་ཡང་བཀའ་ཁྲི་མཆོག་གིས་འཐུས་མི་ཚོས་ད་བར་བོད་དོན་ལ་སེམས་ཁུར་ཆེན་པོས་འབད་བརྩོན་གནང་བར་ཐུགས་རྗེ་ཆེ་ཞུས་པ་མ་ཟད། སླད་བོད་དོན་བདེན་མཐའ་མ་གསལ་བར་འབད་བརྩོན་མུ་མཐུད་གནང་རོགས་ཞེས་འབོད་སྐུལ་ཡང་ཞུས་ཡོད། དེ་ཉིན་བཀའ་ཁྲི་མཆོག་གི་ལས་རིམ་མཐའ་མར་ནོར་ཝེ་ས་གནས་ཀྱི་བོད་རིགས་ཚོར་གསུང་བཤད་གནང་རྗེས་ས་གནས་བོད་རིགས་ཚོས་བཀའ་ཁྲི་མཆོག་ལ་གསོལ་སྟོན་ཞིག་ཕུལ་ཡོད།
གཞན་ཡང་དེ་ཉིན་བཀའ་ཁྲི་མཆོག་གིས་ནོར་ཝེའི་བརྙན་འཕྲིན་ཁང་གི་(Norwegian Broadcasting Television) ཆེད་དོན་དྲི་བར་ལན་འདེབས་གནང་ཡོད། བཀའ་ཁྲི་མཆོག་ནོར་ཝེ་ཁུལ་དུ་གཞུང་འབྲེལ་འཚམས་གཟིགས་སྐབས་སྐུ་ཚབ་དོན་གཅོད་ཐུབ་བསྟན་བསམ་གྲུབ་ལགས་དང་ཡུ་རོབ་སྤྱི་འཐུས་ཆུང་བདག་ཀོ་རེན་ལགས་ཀྱང་ལྷན་དུ་བཅར་ཡོད་པ་བཅས།།
