༢༠༡༡ ཟླ་ ༡༡ ཚེས་ ༢༥ རེས་གཟའ་པ་སངས།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༢༠༡༡ ཟླ་ ༡༢ ནང་ཅེཀ་སྤྱི་མཐུན་རྒྱལ་ཁབ་ནང་ཆིབས་སྒྱུར་བསྐྱང་གཏན་འཁེལ་འདུག
དེ་ཡང་རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་ཅེཀ་སྤྱི་མཐུན་རྒྱལ་ཁབ་ཀྱི་གཞུང་ཚབ་ཆེན་མོ་(Miloslov Stasek)མཆོག་བདུན་ཕྲག་སྔོན་མའི་ནང་བཞུགས་སྒར་རྡ་སར་ཆེད་ཕེབས་གནང་སྟེ་༸གོང་ས་མཆོག་ལ་ཅེཀ་སྤྱི་མཐུན་རྒྱལ་ཁབ་ནང་ཆིབས་སྒྱུར་གནང་སྐྱོང་ཡོང་བའི་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་ཟབ་མོ་ཐོབ་འདུག དེའི་སྐོར་ཅེཀ་སྤྱི་མཐུན་རྒྱལ་ཁབ་ཀྱི་གཞུང་ཚབ་ཆེན་མོ་དང་ལྷན་བཞུགས་སྒར་དུ་བཅར་མཁན་གྱི་སྐུ་ཚབ་འཐུས་མི་(Steve Lichtag)ལགས་ཀྱིས་གསར་འགྱུར་བརྒྱུད་ལམ་ཁག་གཅིག་ལ་འགྲེལ་བརྗོད་གནང་དོན། ང་ཚོའི་སྲིད་འཛིན་ཟུར་པ་(Vclav Havel) ཝེས་ལེ་ཧ་ཝེལ་མཆོག་གིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ཕྱི་ཟླ་ ༡༢ ཚེས་ ༡༠ ནས་ཉིན་གྲངས་བཞི་རིང་ཡུལ་དེའི་ནང་ཆིབས་སྒྱུར་གནང་སྐྱོང་ཡོང་བའི་ཇི་ལྟར་གདན་ཞུ་གསོལ་འདེབས་ཞུས་ཡོད། ༸གོང་ས་ཏཱ་ལའི་བླ་མ་མཆོག་ང་ཚོའི་རྒྱལ་ཁབ་ནང་གདན་འདྲེན་ཞུ་རྒྱུའི་གོ་སྐབས་ཐོབ་པར་ཧ་ཅང་དགའ་སྤོབས་སྐྱེ་བཞིན་འདུག བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གི་ཐེངས་འདིའི་ཆིབས་སྒྱུར་བརྒྱུད་དེ་སྔ་དམར་པོའི་བཙན་དབང་འོག་མནར་གཅོད་མྱངས་པའི་ཅེཀ་སྤྱི་མཐུན་རྒྱལ་ཁབ་ཀྱི་མི་མང་ཚོས་བོད་མི་མང་གིས་དེང་སྐབས་མྱངས་དང་མྱོང་བཞིན་པའི་དཀའ་སྡུག་དང་འཐབ་རྩོད་ལ་རྒྱུས་མངའ་ཡོང་རྒྱུར་ཕན་ཐོགས་ཆེན་པོ་ཡོང་གི་རེད། ཅེས་གསུངས་འདུག
ལྷག་པར་ཁོང་གིས་གསུང་དོན། ཉེ་ལམ་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་ཡོད་པ་མ་ཟད། བོད་མིས་རང་ལུས་མེར་སྲེག་བཏང་བ་ནི་དེ་སྔ་ཇར་མན་ན་ཛིའི་བཙན་དབང་ལྟ་བུའི་གནས་སྟངས་དེ་རིགས་དུས་རབས་ཉེར་གཅིག་ནང་ཡོང་བཞིན་ཡོད་པ་དེ་ནི་ཧ་ཅང་བློ་ཕམ་གྱི་གནས་སྟངས་ཤིག་ཡིན། ཞེས་གསུངས་འདུག
ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་ཟུར་པ་ཝེས་ལེ་ཧ་ཝེལ་མཆོག་ཕྱི་ལོ་ཆིག་སྟོང་དགུ་བརྒྱ་དགུ་བཅུའི་ལོར་མང་གཙོའི་ལམ་ནས་འོས་འདེམས་བྱས་ཏེ་ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་ཆགས་སྐབས་༸གོང་ས་༸སྐྱབས་མགོན་ཆེན་པོ་མཆོག་གཞུང་འབྲེལ་ཐོག་གདན་འདྲེན་ཞུ་མཁན་གྱི་དབུ་ཁྲིད་དང་པོ་དེ་ཡིན་འདུག ཐེངས་འདིར་མགོན་པོ་གང་ཉིད་མཆོག་ཅེཀ་སྤྱི་མཐུན་རྒྱལ་ཁབ་ནང་ཆིབ་སྒྱུར་བསྐྱང་ཐེངས་བརྒྱད་པ་དེ་ཆགས་རྒྱུ་ཡིན་འདུག་པ་བཅས། །