༄༅། །ཕྱི་ལོ་ ༢༠༢༣ ཟླ་བ་ ༠༦ ཚེས་ ༡༤ ནས་ ༡༦ བར་ཉིན་གྲངས་གསུམ་རིང་བྱང་ཨ་རི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་བོད་རྒྱའི་དཀའ་རྙོག་ཞི་འགྲིག་དང་། བོད་མིའི་སྒྲིག་འཛུགས་ལ་རྒྱབ་སྐྱོར་ཐོབ་སླད་ཁེ་ན་ཊའི་ཨོ་ཊ་ཝ་ཁུལ་དུ་གཞུང་འབྲེལ་ཕྱོགས་ཕེབས་ཀྱིས་ཁེ་ན་ཊའི་གྲོས་ཚོགས་འཐུས་མི་དང་གཞུང་འབྲེལ་མི་སྣ་ཁག་གཅིག་དང་མཇལ་འཕྲད་གནང་ཡོད།
དེ་ཡང་གཞུང་འབྲེལ་ཕྱོགས་ཕེབས་ཀྱི་ཉིན་དང་པོར་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ཀྱིས་ཆབ་སྲིད་ཚོགས་པའི་དབུ་ཁྲིད་ཕ་རན་ཀི་ཧི་སི་བྷེ་ལེན་ཅིཊ་(Yves-Francois Blanchett) ལགས་ཀྱི་གཙོ་སྐྱོང་འོག་ (Bloc Quebecois) ཞེས་པའི་ཇུས་སྟོན་ཚོགས་ཆུང་ཐོག་གསུང་བཤད་གནང་ཡོད། སྐབས་དེར་སྐུ་ཚབ་དོན་གཅོད་ཀྱིས་བོད་ནང་གི་ཛ་དྲག་གནས་སྟངས་དང་། བོད་མིའི་སྒྲིག་འཛུགས་ཀྱི་དམིགས་ཡུལ་དང་སྲིད་བྱུས་ངོ་སྤྲོད་གནང་ཞིང་། དེ་རྗེས་སྐུ་ཞབས་ཕ་རན་ཀི་ཧི་སི་བྷེ་ལེན་ཅིཊ་ལགས་ཀྱིས་དགུང་ཚིགས་ཤིག་གོ་སྒྲིག་ཞུས་ཐོག་གྲོས་ཚོགས་འཐུས་མི་ཨེ་ལེག་སི་སི་བུ་རུ་ནེ་ལི་དྲུ་སེ་པི་ (Alexis Brunelle-Duceppe) ལགས་དང་། ཁེ་ན་ཊ་བོད་དོན་ལྷན་ཚོགས་ (CTC) ཀྱི་ངེས་སྟོན་པ་ཤེས་རབ་མཐར་ཕྱིན་ལགས་ལྷན་ཞུགས་གནང་ཡོད། དགུང་ཚིགས་མཇལ་མོལ་སྐབས་སུ་གྲོས་ཚོགས་འཐུས་མི་དང་གྲོས་ཚོགས་ཀྱི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཚོགས་ཆུང་གི་ཚོགས་གཞོན་ཨེ་ལེག་སི་སི་བུ་རུ་ནེ་ལི་དྲུ་སེ་པི་ (Brunelle-Duceppe) ལགས་ཀྱིས་རིང་མིན་འདོན་འཆར་ཡོད་པའི་ཚོགས་ཆུང་གི་བོད་ནང་གི་འགྲོ་བ་མིའི་ཐོབ་ཐང་དང་རྒྱ་ནག་གི་མི་སེར་སྤེལ་ཡུལ་གྱི་གཏན་འཇགས་སློབ་གྲྭའི་སྐོར་གྱི་སྙན་ཐོའི་སྐོར་ངོ་སྤྲོད་གནང་ཡོད་པ་རེད། ཆབ་སྲིད་ཚོགས་པའི་དབུ་ཁྲིད་ཕ་རན་ཀི་ཧི་སི་བྷེ་ལེན་ཅིཊ་ལགས་ཀྱིས་བོད་མིའི་ངོ་བོ་རྒྱུན་འཛིན་གོང་འཕེལ་གཏོང་བར་རྒྱབ་སྐྱོར་དང་བཅས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་སྒེར་ངོས་ནས་འཚམས་འདྲི་ཞུས་ཡོད་པ་མ་ཟད། བོད་དོན་རྒྱབ་སྐྱོར་བ་དང་གྲོས་ཚོགས་འཐུས་མི་ཇོ་ལི་ཝིག་ནོ་ལ་ (Julie Vignola) ལགས་དང་། གྲོས་ཚོགས་འཐུས་མི་ཨེ་ལེག་སི་སི་བུ་རུ་ནེ་ལི་དྲུ་སེ་པི་ (Alexis Brunelle-Duceppe) ལགས་ནས་ཀྱང་བོད་རྒྱའི་དཀའ་རྙོག་ཞི་འགྲིག་ཡོང་བར་རྒྱབ་སྐྱོར་གནང་ཡོད།
དེ་བཞིན་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ཀྱིས་ཁེ་ན་ཊ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཨ་རིཕ་ཝི་ར་ནི་ (Arif Virani) ལགས། ཚོགས་གཞོན་གྷར་ནེཊ་གྷི་ནི་སི་ (Garnett Genuis) ལགས་དང་ཇེམ་སི་མ་ལོ་ནི་ (James Maloney) ལགས་དང་མཇལ་འཕྲད་ཀྱིས་བོད་རྒྱ་འབྲེལ་མོལ་སྐོར་གྱི་ཁྲིམས་འཆར་དང་འབྲེལ་བའི་གནད་དོན་མཇུག་སྐྱོང་ཞུ་སྒོ་དང་། ཁེ་ན་ཊ་སྲིད་གཞུང་ངོས་ནས་བོད་མིའི་སྒྲིག་འཛུགས་དང་བཙན་བྱོལ་བོད་མིར་རྒྱབ་སྐྱོར་ཚད་མཐོར་གཏོང་ཐབས་སྐོར་གྲོས་མོལ་གནང་ཡོད།
དེ་མཚུངས་སྐུ་ཚབ་དོན་གཅོད་ཀྱིས་ཁེ་ན་ཊའི་རོགས་ཚོགས་ (Global Affairs Canada) ཀྱི་གནད་ཡོད་མི་སྣ་ཁག་དང་མཇལ་འཕྲད་གནང་སྟེ་བོད་མིའི་སྒྲིག་འཛུགས་ཀྱི་འཆར་གཞི་ཐབས་བྱུས་སྤྱི་དང་། ལྷག་པར་བོད་མིའི་སྒྲིག་འཛུགས་ཀྱི་ཕུགས་དམིགས་ཡིག་ཆ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་མགོན་པོ་མཆོག་གི་ཡང་སྲིད་གནད་དོན་སྐོར་སྙན་སེང་ཞུས་ཡོད་པ་མ་ཟད། ཁེ་ན་ཊ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་བ་རྣམ་པའི་ལས་ཁུངས་སུ་ཉམས་གསོག་ལས་ཀ་བྱེད་བཞིན་པའི་བོད་ཕྲུག་དྲུག་དང་། ཨོ་ཊ་ཝ་བོད་རིགས་མི་མང་དང་མཇལ་འཕྲད་གནང་ཡོད།
ཐེངས་འདིའི་བྱང་ཨ་རི་སྐུ་ཚབ་དོན་གཅོད་ཀྱི་གཞུང་འབྲེལ་ཕྱོགས་ཕེབས་སྐབས་ཁེ་ན་ཊ་བོད་དོན་ལྷན་ཚོགས་ཀྱི་ངེས་སྟོན་པ་ཤེས་རབ་མཐར་ཕྱིན་ལགས་ལྷན་བཅར་གྱིས་ཚོགས་འདུའི་འབྲེལ་མཐུད་གནང་ཡོད་པ་བཅས།།