༢༠༡༡ ཟླ་ ༡༡ ཚེས་ ༢༢ རེས་གཟའ་མིག་དམར།
༅༅། །ཕྱི་ལོ་ ༢༠༡༡ ཟླ་ ༡༡ ཚེས་ ༡༨ ཉིན་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གིས་གོ་སྒྲིག་གནང་སྟེ་ཧ་རི་ཡ་ན་མངའ་སྡེའི་སུ་རཱཇ་ཀུནྡ་གྲོང་གི་རཱཇ་ཧན་ས་མགྲོན་ཁང་དུ་ཆབ་སྲིད་ཀྱི་ཐབས་བྱུས་ཐོག་སྐབས་བཅོ་ལྔ་པའི་སྤྱི་འཐུས་གྲོས་ཚོགས་ཀྱི་འཐུས་མི་ཉི་ཤུ་ཙམ་ནང་ཁུལ་ལྷན་འཛོམས་ཤིག་ཚོགས་འདུག
དེ་ཉིན་སྔ་དྲོ་ཆུ་ཚོད་ ༩ ཐོག་ཨ་ཡི་ཨ་ཡི་ཚོགས་ཁང་དུ་ཨེ་ཤི་ཡའི་གཙང་ཆུ་ཁག་ལས་འབྱུང་བའི་གནད་དོན་གྱི་ཚོགས་འདུར་བཅར་བ་དང་། སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་ལས་རིམ་དབུ་འབྱེད་དང་ལས་རིམ་བསྒྲུབ་བྱ་ཁག་ངོ་སྤྲོད་གནང་ཡོད། དེ་བཞིན་མཁས་དབང་སུ་བྷཱཥ་ཀཱཥ་ཡབ་དང་ལྷན་༸གོང་ས་མཆོག་གིས་ཆབ་སྲིད་དང་འཛིན་སྐྱོང་གི་འགན་དབང་མི་མང་ནས་ཐད་ཀར་འོས་འདེམས་བྱས་པའི་འགོ་ཁྲིད་ཚོར་གསོལ་སྩལ་དང་། དེ་འབྲེལ་སྤྱི་འཐུས་ལྷན་ཚོགས་ནས་བཅས་ཁྲིམས་བསྐྱར་བཅོས་བྱས་རྗེས་བོད་མིའི་སྒྲིག་འཛུགས་ཀྱི་འཕེལ་རྒྱས་དང་སྲ་བརྟན་སླད་བགྲོ་གླེང་གནང་ཡོད། ཕྱི་ཚེས་ ༡༩ ཉིན་སྤྱི་འཐུས་ནང་ཁུལ་གྱི་ཕྱི་ལོ་ ༢༠༠༩ ལོའི་ལྷན་འཛོམས་ཀྱི་གྲུབ་དོན་ཁག་ལ་དཔྱད་ཞིབ་དང་། བརྗོད་གཞི་ཁག་ལས་ལག་བསྟར་བྱ་ཐུབ་ངེས་ལེགས་ཤོས་གཉིས་འདེམས་གནང་བ་དང་། དེ་བཞིན་རྒྱ་གར་གཞུང་ཚབ་ཟུར་པ་ཇི་པར་ཐཱ་སར་ཐི་མཆོག་གིས་རྒྱ་དཀར་ནག་གི་འབྲེལ་ལམ་གནས་མུས་འོག་རྒྱ་གར་གྱི་ད་ལྟའི་གནས་སྟངས་ཐོག་འཛིན་པའི་སྲིད་བྱུས་སྐོར་ལ་གསུང་བཤད་དང་། སྐུ་ཞབས་པི་ཌི་རཱ་ཨི་མཆོག་གིས་རྒྱ་གར་གྲོས་ཚོགས་ཀྱི་ཚོགས་མི་ལྷན་འབྲེལ་ལམ་བྱ་ཕྱོགས་སྐོར་བཅས་གསུང་བཤད་གནང་ཡོད།
ཕྱི་ཚེས་ ༢༠ ཉིན་ཚོགས་ཆུང་ཆ་བགོས་ཀྱི་འདེམས་སྒྲུག་བྱས་པའི་བརྗོད་གཞིའི་ཐོག་ལས་འཆར་བཟོས་གནང་དང་། ཕྱི་ཚེས་ ༢༡ ཉིན་ཚོགས་ཆུང་སོ་སོ་ནས་འཆར་གཞི་ལག་བསྟར་བྱ་རྒྱུ་ངོ་སྤྲོད་དང་ལྷན་འཛོམས་ཀྱི་གཏན་འབེབས་གནང་རྗེས་ཚོགས་འདུའི་དཔྱད་ཞིབ་དང་། མ་འོངས་པར་ལས་འཆར་གཞན་ཇི་དགོས་ཐད་དགོངས་ཚུལ་གནང་ཡོད།
ཕྱི་ཚེས་ ༢༢ ཉིན་སེམས་པ་ཆེན་པོ་གྷན་དྷིའི་འགྲེམས་སྟོན་ཁང་དང་། རྒྱ་གར་དབུས་གྲོས་ཚོགས། དབུས་བོད་སློབ་འཛིན་ཚོགས་ལས་ཁུངས། ཀེ་ལེ་ཇེས་མགྲོན་ཁང་དུ་རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་ལྷན་དགོང་དྲོའི་གསོལ་ཚིགས་ཤིག་གནང་རྒྱུ་དང་།
ཕྱི་ཚེས་ ༢༣ ཉིན་ཅ་ནཀྱ་པུ་རིར་གདུང་སེམས་མཉམ་སྐྱེའི་ལས་རིམ་ཆེད་དང་། རྒྱ་གར་གྱི་མེ་འཁོར་འགྲེམ་སྟོན་ཁང་དང་། རྒྱ་གར་རྒྱལ་ཡོངས་འགྲེམ་སྟོན་ཁང་། ལྡི་ལི་བོད་ཀྱི་ཁང་པར་གཟིགས་སྐོར་གནང་རྒྱུ་ཡིན་འདུག་པ་བཅས།
