ཕྱི་ལོ་ ༢༠༠༨ ཟླ་ ༧ ཚེས་ ༡༥ རེས་གཟའ་ཟླ་བ།
ཨ་རིའི་སྲིད་འཛིན་བུ་ཤུ་མཆོག་ནས་ཨ་རིའི་ནང་ཆོས་དད་རང་དབང་གི་སྒྲིག་འཛུགས་བཙུགས་ནས་ལོ་ངོ་ ༡༠ འཁོར་བའི་དུས་དྲན་གྱི་མཛད་སྒོའི་ཐོག་གསུང་བཤད་གནང་བཞིན་པ།
༄༅། །རྒྱལ་སྤྱིའི་གསར་ལམ་ཁག་ནས་གནས་ཚུལ་སྤེལ་གསལ་ལྟར་ན། ཨ་རིའི་སྲིད་འཛིན་ཇོར་ཇི་ཌབལུ་བུ་ཤུ་མཆོག་གིས་ཕྱི་ལོ་ ༢༠༠༨ ཟླ་ ༧ ཚེས་ ༡༤ རེས་གཟའ་ཟླ་བའི་ཉིན་ཕོ་བྲང་དཀར་པོར་ཨ་མི་རི་ཀས་འཛམ་གླིང་ཁྱོན་ཡོངས་ཀྱི་ཆོས་དད་རང་མོས་ཀྱི་ཐོབ་ཐང་ལ་གཟིགས་ཞིབ་གནང་རྒྱུར་དམིགས་ཏེ་རྒྱལ་སྤྱིའི་ཆོས་དད་རང་དབང་གི་ཁྲིམས་གཞི་ཞིག་བཟོས་ཡོད་པའི་འོག་ཆོས་དད་རང་དབང་གི་སྒྲིག་འཛུགས་བཙུགས་ནས་ལོ་ངོ་ ༡༠ འཁོར་བའི་དུས་དྲན་གྱི་མཛད་སྒོའི་ཐོག་རྒྱ་ནག་ཚུད་པའི་འཛམ་གླིང་གི་དབུ་ཁྲིད་རྣམ་པའི་ཁྲོད་དུ་གསུང་བཤད་ཅིག་གནང་ནང་བའི་གསུང་དོན། ངོས་ཀྱིས་ཉེ་ཧོང་དུ་རྒྱ་ནག་གི་སྲིད་འཛིན་ཧུའུ་ཅིང་ཐའོ་དང་ཐུག་འཕྲད་སྐབས་འདི་ལྟར་བརྗོད་པ་ཡིན། མི་མང་ཚོས་སོ་སོའི་ཆོས་དད་རང་དབང་གི་ཆེད་དུ་འཐབ་རྩོད་བྱེད་རྒྱུའི་འདོད་མོས་ནམ་གནས་བར་དུ་ང་ཚོ་ཨ་མི་རི་ཀས་ཁོང་ཚོའི་རྒྱབ་ཏུ་མུ་མཐུད་དེ་ལངས་རྒྱུ་ཡིན། ཞེས་བརྗོད་པ་ཡིན། ང་ཚོས་རྒྱ་ནག་ནང་ཆོས་དད་རང་དབང་རྩོད་ལེན་བྱེད་མཁན་ཚོར་དྲན་གསོ་བྱེད་ཀྱི་ཡོད། ཅེས་དང་། ཤར་ཏུ་ཀི་སེ་ཐན་གྱི་མི་རིགས་ལྟ་བུའི་སོ་སོའི་རང་དབང་འཐབ་རྩོད་བྱེད་མཁན་ཚོར་ཆེས་བསྟོད་ཞུ་གི་ཡོད། ཅེས་གསུངས་ཡོད་པ་རེད།
ཁོང་གིས་མུ་མཐུད་གསུང་དོན། ངོས་ནས་བོད་མིའི་༸སྐྱབས་མགོན་ཏཱ་ལའི་བླ་མ་མཆོག་དང་། བོད་ནང་ཡོད་པའི་བོད་རིགས་ཚོའི་སྙིང་སྟོབས་ལ་བསྔགས་བརྗོད་རྒྱ་ཆེ་ཞུ་གི་ཡོད། ཅེས་གསུངས་ཡོད་པ་དང་། མཐའ་དོན་དུ་ངོས་ཀྱིས་དེ་རིང་རྒྱལ་ཁབ་དེ་དག་གི་དབུ་ཁྲིད་རྣམས་ལ་དེ་མ་ཉིད་དུ་ཆོས་དད་རང་དབང་ལ་གནོད་སྐྱོན་གཏོང་རྒྱུ་མཚམས་འཇོག་བྱས་ནས་སོ་སོའི་དཀོན་མཆོག་ལ་སྐྱབས་སུ་འགྲོ་མཁན་རྣམས་ཀྱི་མོས་པ་ལ་གུས་བརྩི་ཞུ་རྒྱུའི་འབོད་སྐུལ་ཞུ་རྒྱུ་ཡིན། ཅེས་གསུངས་ཡོད་པ་རེད།།
