༢༠༡༡ ཟླ་ ༡༡ ཚེས་ ༢༡ རེས་གཟའ་ཟླ་བ།
༄༅། །ཉེ་ལམ་ཐེ་ལན་ཌི་ཁུལ་དུ་ཆུ་ལོག་གི་གོད་ཆག་ཚབས་ཆེ་ཕོག་སྟེ་རྒྱལ་ས་བྷེང་ཀོག་ནང་དང་ཉེ་འཁོར་ས་གནས་ཁག་ཏུ་ཁང་ཁྱིམ་མང་པོ་རྩ་གཏོར་གྱུར་བ་མ་ཟད། མི་གྲངས་མང་པོ་འདས་གྲོངས་སུ་གྱུར་བར་བརྟེན་༸གོང་ས་༸སྐྱབས་མགོན་ཆེན་པོ་མཆོག་གིས་ཐེ་ལེན་ཌིའི་སྲིད་བློན་ལྕམ་སྐུ་ཡིང་ལུག་ཤི་ན་ཝ་ཊ་མཆོག་བརྒྱུད་ཐུགས་གསོའི་གསུང་འཕྲིན་ཞིག་སྩལ་ཡོད། དེ་ཡང་གསུང་འཕྲིན་ནང་།  དེ་སྔ་བྱུང་མྱོང་མེད་པའི་ཐེ་ལན་ཌིར་ཆུ་ལོག་གི་གོད་ཆག་དེའི་འོག་མི་མང་པོའི་ཚེ་སྲོག་ཤོར་བ་དང་ཁང་ཁྱིམ་དང་ནོར་ཕྱུགས་ལ་གནོད་སྐྱོན་ཧ་ཅང་ཆེན་པོ་ཕོག་པར་མགོན་པོ་གང་ཉིད་མཆོག་ཐུགས་བློ་ཧ་ཅང་ཕམ་པོ་བྱུང་ཡོད་པར་བརྟེན། ཚེ་འདས་རྣམས་ལ་ཐུགས་གསོའི་སྨོན་ལམ་དང་རྗེས་ཤུལ་ནང་མི་སྤུན་མཆེད་ཚོར་གདུང་སེམས་མཉམ་སྐྱེའི་ཐུགས་གསོ་མཛད་རྒྱུ་མ་ཟད། གོད་ཆག་འོག་དཀའ་སྡུག་མྱོང་བཞིན་པ་རྣམས་དཀའ་ངལ་ལས་མྱུར་དུ་རྒྱལ་ཐུབ་པའི་ཐུགས་སྨོན་མཛད་བཞིན་ཡོད་སྐོར་སོགས་འཁོད་ཡོད། ཕྱོགས་མཚུངས་༸གོང་ས་མཆོག་གིས་ཐེ་ལན་ཌིའི་མང་ཚོགས་ལ་གདུང་སེམས་མཉམ་སྐྱེ་མཚོན་ཆེད་ཏཱ་ལའི་བླ་མའི་ཐེབས་རྩ་ནས་ངལ་སེལ་རོགས་སྐྱོབས་ཆེད་ཞལ་འདེབས་གསོལ་རས་སྩལ་ཡོད་པ་བཅས།།