༄༅། །ཕྱི་ལོ་ ༢༠༢༣ ཟླ་བ་ ༥ ཚེས་ ༡༦ ཉིན་གྱི་དགོང་དྲོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གནས་མཆོག་མཚོ་པདྨར་ཕེབས་འབྱོར་སྐབས་མཚོ་པདྨའི་ས་གནས་འབྲེལ་མཐུད་པ་དང་། ས་གནས་ཀྱི་གཞུང་དང་གཞུང་ཁོངས་མིན་པའི་ཚོགས་པ་ཁག་གི་ལས་སྣེ་རྣམ་པ། ས་གནས་མང་ཚོགས་བཅས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་མཚོ་པདྨ་ཁ་འཐོར་བོད་མིའི་གཞིས་ཆགས་སུ་འཚམས་གཟིགས་ཀྱི་ཐོག་མར་འོག་མིན་ཐུབ་བསྟན་བཤད་སྒྲུབ་གླིང་དགོན་པར་གནས་གཟིགས་དང་། དེ་རྗེས་མཚོ་པདྨའི་ས་གནས་འབྲེལ་མཐུད་པའི་ལས་ཁུངས་དང་། ས་གནས་རང་བདེན་ཚོགས་ཆུང་། མི་མང་སྤྱི་ཁང་། ས་གནས་འཕྲོད་བསྟེན་སྨན་ཁང་བཅས་ལ་འཚམས་གཟིགས་སུ་ཕེབས་ཡོད་པ་མ་ཟད། གནས་མཆོག་མཚོ་པདྨར་གནས་གཟིགས་དང་། མཚོ་པདྨ་དབུ་རྩེ་རི་ཁྲོད་དང་། གུ་རུའི་སྐུ། འཛི་སྒར་བཀྲ་ཤིས་ཐུབ་བསྟན་ཆོས་འཁོར་དགེ་འཕེལ་གླིང་དགོན་པ། ཟངས་མདོག་དཔལ་རི། ཨོ་རྒྱན་ཧེ་རུ་ཀའི་རྙིང་དགོན་བཅས་སུ་རིམ་པས་གནས་གཟིགས་སུ་ཕེབས་ཡོད།
ཉིན་རྒྱབ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་མཚོ་པདྨ་ཁུལ་དུ་གནས་སྡོད་བོད་རིགས་མང་ཚོགས་དང་ཐུག་འཕྲད་ཀྱིས་གསུང་བཤད་གནང་སྐབས་གཙོ་བོ་བཀའ་ཤག་སྐབས་བཅུ་དྲུག་པའི་ལས་གཞི་སྤྱིའི་སྐོར་དང་། ལྷག་པར་བཀའ་ཤག་སྐབས་བཅུ་དྲུག་པས་བཙན་བྱོལ་བོད་མིའི་མི་འབོར་གྲངས་བཤེར་གནང་གི་ཡོད་པ། གཏན་འཇགས་ཐབས་བྱུས་ཚོགས་ཆུང་གསར་འཛུགས་གནང་བ། དབུ་མའི་ལམ་གྱི་སྲིད་བྱུས་གཞིར་བཞག་ཐོག་བོད་རྒྱའི་དཀའ་རྙོག་སེལ་ཐབས་གནང་བཞིན་པ། བོད་པའི་གཞོན་སྐྱེས་རྣམས་རྒྱ་གར་གྱི་གྲོང་ཁྱེར་དང་ཕྱི་རྒྱལ་ཁག་ཏུ་བསྐྱོད་དང་སྐྱོད་བཞིན་པར་བརྟེན་གཞིས་ཆགས་སྲ་བརྟན་ཡོང་བར་ཐུགས་འཚབ་ཡོད་པ། སྡོད་ཁང་མེད་མཁན་རྣམས་ཀྱི་གྲངས་ཐོ་བསྡུ་རུབ་དང་ཞིབ་འཇུག་གནང་སྟེ་དཀའ་ངལ་སེལ་ཐབས་གནང་བཞིན་པ་སོགས་ཀྱི་སྐོར་གསུངས་ཡོད།
དཔལ་ལྡན་སྲིད་སྐྱོང་མཆོག་དང་ལྷན་སུན་མཚོ་མན་གསུམ་དང་སྤོན་ཌོ་བཀྲ་ཤིས་གླིང་ས་གནས་འགོ་འཛིན་དང་ལས་བྱེད། མཚོ་པདྨའི་འབྲེལ་མཐུད་པ། ནང་སྲིད་ལས་ཁུངས་ཀྱི་དྲུང་འཕར་བསྟན་འཛིན་ནོར་བུ་ལགས་དང་། ཟུང་དྲུང་བཀྲ་ཤིས་བདེ་སྐྱིད་ལགས། སུན་མཚོ་མན་གསུམ་དང་སྤོན་ཌོ་བཀྲ་ཤིས་གླིང་ས་གནས་འཐུས་ཚོགས་ཀྱི་ཚོགས་གཞོན་དང་ཚོགས་མི། མཚོ་པདྨ་ས་གནས་རང་བདེན་ཚོགས་ཆུང་གི་ཚོགས་གཙོ་བཅས་ལྷན་བཅར་ཞུས་ཡོད་པ་བཅས། །
