༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་བྱང་ཕྱོགས་ཧི་མཱ་ཅལ་མངའ་སྡེའི་རྒྱལ་ས་སིམ་ལ་ཁུལ་གྱི་མཛད་རིམ་ཁག་ལེགས་པར་གྲུབ་རྗེས་ཕྱི་ལོ་ ༢༠༢༣ ཟླ་བ་ ༥ ཚེས་ ༡༢ ཉིན་གྱི་དགོང་དྲོ་སིམ་ལ་ནས་ཀུ་ལླུ་དཔལ་རབ་གླིང་རྫོང་ཁོངས་ཀྱི་བོད་མིའི་གཞིས་ཆགས་སུ་ཕེབས་འབྱོར་སྐབས། ས་གནས་འགོ་འཛིན་ཚུལ་ཁྲིམས་རྡོ་རྗེ་ལགས་དང་། ས་གནས་འཐུས་ཚོགས་ཀྱི་ཚོགས་གཙོ་ཚོགས་གཞོན། ས་གནས་རང་བདེན་ཚོགས་ཆུང་། ས་གནས་ཀྱི་དགོན་སྡེ་ཁག་གི་སྐུ་ཚབ། ས་གནས་གཞོན་ནུ་དང་བུད་མེད་ལྷན་ཚོགས་ཀྱི་ཚོགས་མི། ས་གནས་དྭང་ཟུར་སྐྱིད་སྡུག་ཚོགས་པའི་ཚོགས་མི། ས་གནས་ཚོང་པའི་སྐྱིད་སྡུག་ཚོགས་ཆུང་གི་ཚོགས་མི། ས་གནས་ཧི་མཱ་ལ་ཡའི་ནང་པའི་ཚོགས་ཆུང་གི་ཚོགས་མི། ས་གནས་རྒྱལ་ཡོངས་མང་གཙོ་ཚོགས་པའི་ཚོགས་མི། ཧིན་བོད་མཛའ་འབྲེལ་ཚོགས་པའི་ཚོགས་མི། ས་གནས་འགོ་འཛིན་ལས་ཁུངས་ཀྱི་ལས་བྱེད་བཅས་ནས་ཕེབས་བསུའི་སྣེ་ལེན་གཟབ་རྒྱས་ཞུས་གནང་ཡོད།
དེ་ཡང་ཕྱི་ཚེས་ ༡༣ ཉིན་གྱི་སྔ་དྲོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཀུལླུ་མ་ན་ལི་ཁུལ་གྱི་གཞུང་འབྲེལ་མཛད་འཆར་ཁག་དབུ་འཛུགས་ཀྱིས་ཐོག་མར་རྡོ་སྦིར་ས་གནས་དགོན་པར་གནས་གཟིགས་དང་ཀུལླུ་མ་ན་ལི་ས་གནས་འགོ་འཛིན་ལས་ཁུངས་ཀྱི་ལས་ཤག་གསར་པ་དབུ་འབྱེད་གནང་རྗེས་ས་གནས་འགོ་ལས་ཁུངས་དང་། ས་གནས་འཐུས་ཚོགས་ཀྱི་ཚོགས་ཁང་། དེ་བཞིན་གཞུང་དང་གཞུང་ཁོངས་མིན་པའི་ཚོགས་པ་ཁག་གི་ལས་ཁུངས་ཁག ས་གནས་འཕྲོད་བསྟེན་སྨན་ཁང་བཅས་ལ་གཟིགས་སྐོར་གནང་ཡོད། སྐབས་དེར་དཔལ་ལྡན་སྲིད་སྐྱོང་མཆོག་གིས་ས་གནས་ཀྱི་དཀའ་ངལ་ཁག་ལ་རྒྱུས་ལོན་དང་དཀའ་ངལ་སེལ་ཐབས་སྐོར་ལམ་སྟོན་གནང་ཡོད། ཉིན་རྒྱབ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་འོན་མངའ་རིས་དགོན་པར་གནས་གཟིགས་དང་ཡན་ལག་སྨན་རྩིས་ཁང་དུ་གཟིགས་སྐོར་ཕེབས་གྲུབ་རྗེས་མ་ན་ལི་བདེ་སྐྱིད་གླིང་བོད་མིའི་གཞིས་སྒར་ལ་འཚམས་གཟིགས་སུ་ཕེབས་ཡོད།
གཞན་ཡང་དཔལ་ལྡན་སྲིད་སྐྱོང་མཆོག་གིས་ས་སྐྱ་ཨེ་ཝམ་བཤད་སྒྲུབ་ཆོས་འཁོར་གླིང་དགོན་པར་གནས་གཟིགས་དང་། མ་ན་ལི་སཾ་བྷོ་ཊ་ཉིན་སློབ་ཏུ་གཟིགས་སྐོར་གནང་རྗེས་སློབ་གྲྭའི་དགེ་ལས་སློབ་ཕྲུག་རྣམས་ལ་གསུང་བཤད་གནང་ཡོད། དཔལ་ལྡན་སྲིད་སྐྱོང་མཆོག་གིས་ས་གནས་ཀྱི་བོད་མིའི་གནས་སྟངས་སྐོར་རྟོག་ཞིབ་དང་དགོས་ངེས་ཅན་རིགས་ལ་བོད་མིའི་སྒྲིག་འཛུགས་ནས་མཐུན་འགྱུར་གནང་རྒྱུ་ཡིན་སྐོར་གསུངས།
ཕྱོགས་མཚུངས་དཔལ་ལྡན་སྲིད་སྐྱོང་མཆོག་མ་ན་ལི་བོད་མིའི་གཞིས་སྒར་མེ་ལེ་ ༡༥ དང་། པ་ཀུལ་བོད་ཁྱིམ་ལག་ཤེས་སློབ་གྲྭར་འཚམས་གཟིགས་དང་། དེ་བཞིན་སྤང་སྒང་རི་ཁྲོད་སྔ་འགྱུར་བསམ་གཏན་ཆོས་གླིང་དང་དྭགས་པོ་བཤད་སྒྲུབ་གླིང་གྲྭ་ཚང་དུ་གནས་གཟིགས་སུ་ཕེབས་ཡོད་པ་མ་ཟད། པ་ཀུལ་བོད་མི་གནས་སྡོད་ཁག་ལ་འཚམས་གཟིགས་སུ་ཕེབས་གནང་ཡོད། དཔལ་ལྡན་སྲིད་སྐྱོང་མཆོག་གིས་ཧི་མ་ཅཱལ་མངའ་སྡེ་གཞུང་ནས་བོད་མིའི་དགོན་སྡེ་ཁག་ལ་རྒྱབ་སྐྱོར་དང་རོགས་རམ་གནང་རྒྱུའི་རེ་བ་ཡོད། ཅེས་གསུངས།
ཕྱི་ཚེས་ ༡༤ ཉིན་གྱི་སྔ་དྲོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཀུལླུ་གཡུ་ལོ་བཀོད་བོད་མིའི་གཞིས་ཆགས་དང་བྷུན་ཏར་ཕུན་ཚོགས་རབ་བརྟན་གླིང་བོད་མིའི་གཞིས་སྒར་དུ་འཚམས་གཟིགས་གནང་རྗེས་འབྲུག་བདེ་ཆེན་ཆོས་འཁོར་གླིང་དུ་གནས་གཟིགས་སུ་ཕེབས་ཡོད། ཕྱི་ཚེས་ ༡༤ ཉིན་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་དཔལ་སྤུངས་ཡེ་ཤེས་རབ་རྒྱས་གླིང་བཙུན་དགོན་དུ་གནས་གཟིགས་གནང་གྲུབ་རྗེས་པ་ཀུལ་བོད་ཁྱིམ་ཚོགས་ཁང་དུ་ཀུལླུ་རྫོང་ཁོངས་ཀྱི་གཞིས་མི་རྣམས་ལ་གསུང་བཤད་གནང་ཡོད། སྐབས་དེར་དཔལ་ལྡན་སྲིད་སྐྱོང་མཆོག་གིས། རྒྱ་ནག་གཞུང་གིས་རྒྱལ་སྤྱིའི་སྟེང་བོད་ཀྱི་ལོ་རྒྱུས་འཁྱོག་བཤད་བྱེད་ཀྱི་ཡོད་སྟབས། བོད་མི་རྣམས་ནས་བོད་ཀྱི་ལོ་རྒྱུས་སྐོར་སློབ་སྦྱོང་ངེས་པར་དུ་གནང་སྟེ་རྒྱལ་སྤྱིའི་སྟེང་བོད་ཀྱི་ལོ་རྒྱུས་སྐོར་འགྲེལ་བཤད་རྒྱག་དགོས་པའི་གལ་གནད་དང་། དེ་བཞིན་བཙན་བྱོལ་བོད་མིའི་གཞིས་ཆགས་སྲ་བརྟན་དང་། བོད་མིའི་བདེན་པའི་འཐབ་རྩོད་རྒྱུན་སྐྱོང་གནང་དགོས་པའི་གལ་གནད་སོགས་ཀྱི་སྐོར་གསུང་བཤད་གནང་སྟེ་ཐེངས་འདིའི་ཀུལླུ་མ་ན་ལི་ཁུལ་གྱི་གཞུང་འབྲེལ་མཛད་འཆར་ཁག་ཡོངས་སུ་ལེགས་པར་གྲུབ་གནང་ཡོད་པ་བཅས། །
