༄༅། །འདི་གར་ཀུལླུ་མ་ནཱ་ལི་ས་གནས་འགོ་འཛིན་ལས་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༣ ཟླ་བ་ ༠༤ ཚེས་ ༢༨ ནས་ ༢༩ བར་ཉིན་གྲངས་གཉིས་རིང་ཀུ་ལུ་རྫོང་ཁོངས་བོད་མིའི་གཞིས་ཆགས་ཀྱི་ས་གནས་འགོ་འཛིན་གསར་རྙིང་དབར་རྩིས་སྤྲོད་རྩིས་ལེན་གནང་ཡོད་ལ་སྐབས་དེར་སྤྲོད་དཔང་དུ་ནང་སྲིད་སྐུ་ཚབ་ཅོན་ཏ་ར་ས་གནས་འགོ་འཛིན་མེ་རི་སྐྱབས་ལགས་ཕེབས་ཡོད། 

དེ་ཡང་རྩིས་སྤྲོད་རྩིས་ལེན་ཉིན་དང་པོར་ས་འགོ་ཟུར་པ་ཐུབ་བསྟན་ཆོས་འཕེལ་ལགས་ཀྱིས་ས་འགོའི་བདག་དབང་དུ་ཡོད་པའི་ཡིག་ཆ་དང་འཛིན་ཆས། རྩིས་ཁྲ་སོགས་ས་འགོ་གསར་པ་ཚུལ་ཁྲིམས་རྡོ་རྗེ་ལགས་སུ་རྩིས་སྤྲོད་ལེགས་པར་གནང་གྲུབ་རྗེས་ཞབས་སྟེགས་བརྗེ་ལེན་གནང་། དེ་ནས་ཀུ་ལུ་རྫོང་ཁོངས་ཀྱི་ལས་ཀྱི་སྣེ་མོ་བ་ཚོགས་འཛོམས་སྐབས་ས་འགོ་གསར་པས་རང་ཉིད་ངོ་སྤྲོད་དང་།  སྤྲོད་དཔང་ནས་རྩིས་སྤྲོད་རྩིས་ལེན་སྐབས་ཀྱི་གཟིགས་ཚུལ་ཇི་བྱུང་ཁག་ངོ་སྤྲོད། ས་འགོ་ཟུར་པ་ནས་རང་གི་ལས་ཡུན་རིང་མྱོང་ཚོར་ཁག་གསུངས་ཡོད། དེ་རྗེས་ཉིན་ཕྱེད་ནས་འགོ་འཛུགས་ཀྱིས་ཕྱི་ཚེས་ ༢༩ བར་ས་འགོ་ཟུར་པས་ས་འགོ་གསར་པར་ཀུ་ལུ་ཁུལ་གྱི་བོད་མི་ཁ་འཐོར་ས་ཁག་དྲུག་དང་དགོན་སྡེ་ཁག ཡན་ལག་སྨན་རྩིས་ཁང་དང་མ་ན་ལི་སཾ་བྷོ་ཊ་ཉིན་སློབ་ཏུ་འཚམས་གཟིགས་དང་ངོ་སྤྲོད་བཅས་གནང་ཡོད། །