༄༅། །ཕྱི་ལོ་ ༢༠༢༣ ཟླ་བ་ ༤ ཚེས་ ༢༧ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་ཨིན་ཡུལ་ཁུལ་གྱི་ལས་རིམ་ཁག་ལེགས་པར་གྲུབ་རྗེས་ཨི་ཌེན་བྷག་ཏུ་ཕེབས་འབྱོར་སྐབས་སི་ཀོཊ་ལེནཊ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་དྲུང་ཆེ་ལྕམ་སྐུ་ཨི་ལི་ཡ་ནོར་བར་ནི་རོ་སིན་གི་རིན་ (Eleanor Byrne-Rosengren) ལགས་ཀྱིས་ཕེབས་བསུའི་སྣེ་ལེན་ཞུས་གནང་ཡོད་པ་དང་སི་ཀོཊ་ལེནཊ་གྲོས་ཚོགས་འཐུས་མི་སྐུ་ཞབས་རོ་སི་གྷི་རིར་ (Ross Greer) ལགས་ཀྱིས་སི་ཀོཊ་ལེནཊ་གྲོས་ཚོགས་སུ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལ་ཉིན་གུང་གསོལ་ཚིགས་གོ་སྒྲིག་ཞུས་གནང་ཡོད། སྐབས་དེར་སི་ཀོཊ་ལེནཊ་གྲོས་ཚོགས་འཐུས་མི་སྐུ་ཞབས་ཕེ་སོལ་ཅོ་དི་རི་ (Faysal Choudhury, Shadow Minister for Culture, Europe and International Development) མཆོག་དང་། གྲོས་ཚོགས་འཐུས་མི་སྐུ་ཞབས་ཌོ་ནལ་ཌི་ཀེ་མེ་རོན་ (Donald Cameron) ལགས། གྲོས་ཚོགས་འཐུས་མི་ལྕམ་སྐུ་པཱུ་ལིན་མེཀ་ནེལ་ (Pauline McNeill) ལགས་བཅས་ཆེད་ཕེབས་ཀྱིས་དཔལ་ལྡན་སྲིད་སྐྱོང་མཆོག་ལ་འཚམས་འདྲི་ཞུས་གནང་ཡོད།
ཕྱི་ཚེས་ ༢༧ ཉིན་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སི་ཀོཊ་ལེནཊ་གྲོས་ཚོགས་སུ་སི་ཀོཊ་ལེནཊ་ལྗང་ཁུ་སྲིད་དོན་ཚོགས་པའི་དབུ་ཁྲིད་སྐུ་ཞབས་པེ་ཊི་རིག་ཧར་ཝེ་ (Patrick Harvie) མཆོག་དང་། སི་ཀོཊ་ལེནཊ་མང་གཙོ་གུ་ཡངས་སྲིད་དོན་ཚོགས་པའི་དབུ་ཁྲིད་སྐུ་ཞབས་ཨེ་ལེ་ཛན་ཌར་ཁོ་ལེ་ (Alex Cole-Hamilton) མཆོག སི་ཀོཊ་ལེནཊ་ལྗང་ཁུ་སྲིད་དོན་ཚོགས་པའི་ཚོགས་མི་གྲོས་ཚོགས་འཐུས་མི་སྐུ་ཞབས་མརྐ་རུས་ཀིལ་ (Mark Ruskell) མཆོག སི་ཀོཊ་ལེནཊ་གྲོས་ཚོགས་ཀྱི་རྒྱལ་སྤྱིའི་འབྲེལ་ལམ་སྡེ་ཚན་གྱི་དབུ་ཁྲིད་ལྕམ་སྐུ་ཇེ་ནི་ཅེ་ནི་བྷེ་རི་ (Jennie Chinembiri) མཆོག ཨི་ཌེན་བྷག་གྲོང་སྡེ་ལྷན་ཚོགས་ཀྱི་ཚོགས་མི་སྐུ་ཞབས་ཌེན་ཧིཔ་ (Dan Heap) ལགས་དང་། ལྕམ་སྐུ་ཀེ་ལི་ཨོ་ནི་ཡལ་ (Kayleigh O’Neill) ལགས་སོགས་དང་མཇལ་འཕྲད་གནང་ཡོད་པ་མ་ཟད། ཨེ་ཌིན་བྷག་གི་སྤྱི་ཁྱབ་པ་རོ་བྷརཌ་ (Robert Aldridge) ལགས་དང་ཨི་ཌེན་བྷག་གྲོང་སྡེ་ལྷན་ཚོགས་ཀྱི་འགོ་ཁྲིད་སྐུ་ཞབས་ཀེ་མི་ཌེ་ (Cammy Day ) ལགས་དང་མཇལ་འཕྲད་གནང་ཡོད།
གཞན་ཡང་དཔལ་ལྡན་སྲིད་སྐྱོང་མཆོག་གིས་སི་ཀོཊ་ལེནཊ་གནས་སྡོད་བོད་རིགས་རྣམས་དང་ཐུག་འཕྲད་ཀྱིས་གསུང་བཤད་གནང་རྗེས་སི་ཀོཊ་ལེནཊ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་རོ་སི་གྷི་རེར་ (Ross Greer) མཆོག་དང་། ཚོགས་པའི་དྲུང་ཆེ་ལྕམ་སྐུ་ཨེ་ལེ་ནོར་རོ་སན་གྷི་རེན་ (Eleanor Byrne-Rosengren) ལགས། ཚོགས་མི་སྐུ་ཞབས་མེ་ཐི་སི་རོ་སན་གྷི་རེན་ (Mathias Rosengren) ལགས། སྐུ་ཞབས་མར་ཊིན་མི་ལི་སི་ (Dr Martin Mills) ལགས། སྐུ་ཞབས་རོན་སི་ཁིར་མེ་གོར་ (Ron Scrimegour) ལགས། ལྕམ་སྐུ་ཇི་ལི་སུ་བྷུ་རེ་ (Jill Sudbury) ལགས། ལྕམ་སྐུ་ལིན་ཌ་ཧན་རེ་ (Linda Hendry) ལགས། སྐུ་ཞབས་ཁེ་མེ་རོན་ (Cameron Garett) ལགས་དང་སི་ཀོཊ་ལེནཊ་གནས་སྡོད་ཧོང་ཀོང་བ་ཁག་གཅིག་དང་མཇལ་འཕྲད་གནང་གྲུབ་མཚམས་ཨི་ཌེན་བྷག་གཙུག་ལག་སློབ་གཉེར་ཁང་དུ་ཨེ་ཤི་ཡ་སི་ཀོཊ་ལེནཊ་བསྟི་གནས་ཁང་གི་གོ་སྒྲིག་འོག་བོད་ཀྱི་དཀའ་རྙོག་ནི། སེལ་མེད་པའི་རྒྱལ་སྤྱིའི་དཀའ་རྙོག་ཅིག་ (Tibet: An Unresolved International Conflict) ཅེས་པའི་བརྗོད་གཞིའི་ཐོག་གསུང་བཤད་གནང་ཡོད་པ་བཅས། །