༄༅། །བོད་མིའི་སྒྲིག་འཛུགས་ཀྱི་སྤྱི་ཁྱབ་རྩིས་ཞིབ་ལས་ཁང་ནས་བཞུགས་སྒར་རྡ་སའི་ཉེ་འགྲམ་དུ་རྟེན་གཞི་བྱས་པའི་འཛིན་སྐྱོང་སྦྱོང་བརྡར་ཁང་དུ་སྤྱི་ཁྱབ་རྩིས་ཞིབ་ལས་ཁང་གི་རྩིས་ཞིབ་པ་རྣམས་ལ་ཕྱི་ལོ་ ༢༠༢༣ ཟླ་བ་ ༤ ཚེས་ ༢༤ ནས་ ༢༨ བར་ཉིན་གྲངས་ལྔའི་རིང་རྩིས་ཞིབ་ལམ་སྟོན་མ་དེབ་དང་། དེ་བཞིན་སྒྲིག་གཞི་ཁག་དང་མཚུངས་སྡུར་མཉེན་ཆས་ (Tally Software) སྐོར་ཟབ་སྦྱོང་གོ་སྒྲིག་གནང་འགོ་བཙུགས་ཡོད་པ་དང་། ཟབ་སྦྱོང་དབུ་འབྱེད་མཛད་སྒོའི་སྐུ་མགྲོན་གཙོ་བོ་སྤྱི་ཁྱབ་རྩིས་ཞིབ་ལས་ཁང་གི་སྤྱི་ཁྱབ་འགན་འཛིན་ཨརྱ་པདྨ་དགྲ་འདུལ་མཆོག་ཆེད་ཕེབས་ཀྱིས་ཟབ་སྦྱོང་དབུ་འབྱེད་གནང་སྐབས་རྩིས་ཞིབ་དྲུང་ཆེ་ལྷུན་གྲུབ་སྒང་བཀྲ་ཤིས་སྟོབས་རྒྱལ་ལགས་དང་སྤྱི་ཁྱབ་རྩིས་ཞིབ་ལས་ཁང་གི་རྩིས་ཞིབ་པ་རྣམ་པ་མཉམ་ཞུགས་གནང་ཡོད།
ཐེངས་འདིའི་ཟབ་སྦྱོང་གི་དམིགས་ཡུལ་གཙོ་བོ་ནི། རྩིས་ཞིབ་པ་རྣམས་ལ་རྩིས་ཞིབ་ལམ་སྟོན་མ་དེབ་དང་། དེ་བཞིན་སྒྲིག་གཞི་གསར་པ་ཁག་དང་མཚུངས་སྡུར་མཉེན་ཆས། རྒྱ་གར་གྱི་དངོས་ཟོག་དང་ཞབས་ཞུའི་ཁྲལ་སོགས་ཀྱི་སྐོར་གོ་རྟོགས་སྤེལ་སླད་ཡིན་པ་བཅས།།
