༄༅།།ལྷོ་སྤྱི་ལས་ཁུངས་ནས་ལས་རིམ་གོ་སྒྲིག་གནང་བ་ལྟར་ལྷོ་སྤྱི་ལས་ཁུངས་དང་། མེ་སོར་དང་བྷེང་ལོར་ཁུལ་གྱི་འཕགས་བོད་མཛའ་འབྲེལ་ཚོགས་པ་ (Indo-Tibet Friendship Society) ཐུང་མོང་གིས་མེ་སོར་དུ་རྟེན་གཞི་བྱས་པའི་ཝི་ངྷི་ཡ་ཝར་ངྷ་ཀ་འཛུགས་སྐྲུན་འཆར་འགོད་རིག་པའི་མཐོ་སློབ་ (Vidyavardhaka College of Engineering) ཏུ་ས་གནས་ཀྱི་གནད་ཡོད་མི་སྣ་དང་འཕགས་བོད་མཛའ་འབྲེལ་ཚོགས་པའི་ཚོགས་མི་སོགས་ལ་བོད་ཀྱི་ཟློས་གར་ཚོགས་པའི་སྒྱུ་རྩལ་བ་རྣམས་ཀྱིས་བོད་ཆོལ་ཁ་གསུམ་གྱི་ཁྱད་ཆོས་མཚོན་པའི་གནའ་བོའི་གཞས་སྣ་འཁྲབ་སྟོན་གཟིགས་འབུལ་ཞུས་ཡོད།

གཞན་ཡང་བོད་ཀྱི་ཟློས་གར་ཚོགས་པའི་སྒྱུ་རྩལ་བ་རྣམས་ཀྱིས་མོན་གྷོ་འདོད་རྒུ་གླིང་དང་། སྦེལ་ཀོབ། ཧོན་སུར་རབ་རྒྱས་གླིང་། ཀོ་ལི་གྷལ་དོན་ལྡན་གླིང་བཅས་སུ་བོད་ཆོལ་ཁ་གསུམ་གྱི་ཁྱད་ཆོས་མཚོན་པའི་གནའ་བོའི་གཞས་ཞབས་བྲོ་འཁྲབ་སྟོན་གཟིགས་འབུལ་ཞུས་ཡོད། གསར་འགོད་ལྷན་ཚོགས་ཤིག་ཀྱང་བསྐོང་ཚོགས་གནང་སྟེ་བོད་ཀྱི་ལོ་རྒྱུས་སྙིང་བསྡུས་དང་། བོད་མིས་འདས་པའི་ལོ་ངོ་ ༦༠ ལྷག་གི་རིང་བདེན་པའི་འཐབ་རྩོད་གནང་དང་གནང་བཞིན་པ། ལྷག་པར་བོད་ལ་རིག་གཞུང་ཕྱུག་པོ་ཡོད་པའི་ཁྲོད་ནས་བོད་ཀྱི་དམངས་ཁྲོད་གླུ་དབྱངས་དང་ཞབས་བྲོའི་སྒྱུ་རྩལ་སྐོར་འགྲེལ་བརྗོད་ཞུས་གནང་ཡོད།ཕྱི་ཚེས་ ༡༣ ཉིན་ལྷོ་སྤྱི་ལས་ཁུངས་དང་བྷེང་ལོར་ཁུལ་གྱི་འཕགས་བོད་མཛའ་འབྲེལ་ཚོགས་པའི་གོ་སྒྲིག་འོག་བོད་ཀྱི་ཟློས་གར་ཚོགས་པའི་སྒྱུ་རྩལ་བ་རྣམས་ཀྱིས་པྲ་བྷཏ་ཀཱ་ལཱ་ཌ་ཝར་ཀ་ཚོགས་ཁང་(Prabath Kaladwarka Auditorium) དུ་བོད་ཀྱི་དམངས་ཁྲོད་གླུ་དབྱངས་དང་ཞབས་བྲོ་འཁྲབ་སྟོན་གནང་ཡོད་པ་དང་། སྐབས་དེར་བོད་ཀྱི་ཟློས་གར་ཚོགས་པའི་འགན་འཛིན་དོན་གྲུབ་ཚེ་རིང་ལགས་ཀྱིས་མང་ཚོགས་ལ་ཕེབས་བསུ་དང་ངོ་སྤྲོད་གསུང་བཤད་གནང་ཡོད།

ལྷོ་སྤྱི་འཇིགས་མེད་ཚུལ་ཁྲིམས་ལགས་ཀྱིས་བོད་ཀྱི་ཟློས་གར་ཚོགས་པའི་སྒྱུ་རྩལ་བ་རྣམས་ཆེད་ཕེབས་ཀྱིས་འཁྲབ་སྟོན་གནང་བར་རྗེས་སུ་ཡི་རང་ཞུས་གནང་ཞིང་། བྷེང་ལོར་ཁུལ་གྱི་འཕགས་བོད་མཛའ་འབྲེལ་ཚོགས་པའི་དྲུང་ཆེ་ནི་རན་ཇན་ (Niranjan Urs) ལགས་ཀྱིས་བོད་ཀྱི་ཟློས་གར་ཚོགས་པ་དང་ཚོགས་བཅར་ཡོངས་ལ་ཐུགས་རྗེ་ཆེ་ཞུའི་གསུང་བཤད་གནང་ཡོད་པ་བཅས།།