༢༠༡༡ ཟླ་ ༡༡ ཚེས་ ༡༡ རེས་གཟའ་པ་སངས།
༄༅། །ཡུ་རོབ་གྲོས་ཚོགས་ཀྱི་ཚོགས་གཞོན་མཆོག་གིས་བོད་མིར་གདུང་སེམས་མཉམ་སྐྱེའི་གསུང་བཤད་གནང་བ་དང་ཆབས་ཅིག་བོད་དོན་ལ་མུ་མཐུད་རྒྱབ་སྐྱོར་གནང་རྒྱུ་ཁས་ལེན་གནང་འདུག
དེ་ཡང་གསར་འགྱུར་བརྒྱུད་ལམ་ཁག་ནས་གནས་ཚུལ་ཐོན་གསལ་ལྟར་ན། སྦེལ་ཇམ་ནང་གནས་སྡོད་བོད་མི་ཚོས་ཡུ་རོབ་གྲོས་ཚོགས་ཀྱི་མདུན་དུ་ཟས་བཅད་ངོ་རྒོལ་ལས་འགུལ་ཉིན་གྲངས་དྲུག་གནང་བའི་ཉིན་མཐའ་སྟེ་ཕྱི་ལོ་ ༢༠༡༡ ཟླ་ ༡༡ ཚེས་ ༩ ཉིན་ལས་འགུལ་མཇུག་སྒྲིལ་གནང་སྐབས་ཡུ་རོབ་གྲོས་ཚོགས་ཀྱི་ཚོགས་གཞོན་སྐུ་ཞབས་ཨི་ཌེ་ཝེ་ནེཀ་མོན་ལན་སེ་ཀོ་མཆོག་ཆེད་ཕེབས་གནང་སྟེ་ཁོང་གིས་བོད་མིར་གདུང་སེམས་མཉམ་སྐྱེའི་གནང་བ་དང་སྦྲགས་བོད་དོན་ཐོག་མུ་མཐུད་རྒྱབ་སྐྱོར་གནང་རྒྱུའི་ཁས་ལེན་བྱ་རྒྱུ་ཡིན་སྐོར་གསུང་དོན། ང་རང་ཡུ་རོབ་གྲོས་ཚོགས་ཀྱི་ཚོགས་གཞོན་ཡིན་པའི་ཆ་ནས་འོས་འགན་གཙོ་བོ་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ཐོག་འགན་འཁུར་ལེན་བཞིན་ཡོད། དེར་བརྟེན་ཁྱེད་རང་ཚོ་བོད་པའི་རྩ་དོན་དེ་བཞིན་དེ་དག་དང་འབྲེལ་བ་ཡོད་པར་བརྟེན། ང་རང་སྒེར་ལ་ཧ་ཅང་སེམས་འཚབ་ཆེན་པོ་ཡོང་གི་འདུག་པས་ངའི་ངོས་ནས་གོ་སྐབས་ནམ་བྱུང་ལ་ཁྱེད་ཚོར་རྒྱབ་སྐྱོད་བྱེད་བཞིན་ཡོད་ལ་མ་འོངས་པར་ཡང་བྱ་རྒྱུ་ཡིན། གང་ལ་ཞེ་ན་ཁྱེད་རང་ཚོས་ལས་དོན་དེ་དག་དྲང་བདེན་དང་འཚེ་བ་མེད་པའི་ཐོག་ནས་བྱེད་བཞིན་ཡོད་སྟབས་རླབས་ཆེན་རེད། དེ་རིང་ང་རང་འདིར་ཡོང་དགོས་དོན་ཡང་ཁྱེད་རང་ཚོར་རྒྱབ་སྐྱོར་མཚོན་ཆེད་དང་དེ་བཞིན་ཁྱེད་རང་ཚོ་ཐུག་པར་ཧ་ཅང་དགའ་པོ་བྱུང་། ཞེས་སོགས་ཀྱི་གསུང་བཤད་གནང་འདུག
ཕྱོགས་མཚུངས་སྐབས་དེར་ཡུ་རོབ་གྲོས་ཚོགས་ཀྱི་ཚོགས་གཞོན་ཙམ་མ་ཡིན་པར་གྲོས་ཚོགས་ཀྱི་འཐུས་མི་སཱ་ཁ་ས་གྷ་ལགས་ཀྱིས་གཙོས་སུ་ཌན་དང་སི་པན་སོགས་ཀྱི་འཐུས་མི་ཁག་གཅིག་ནས་ཀྱང་ཟས་བཅད་ལས་འགུལ་སྤེལ་སར་ཕེབས་ཏེ་གདུང་སེམས་མཉམ་སྐྱེའི་གསུང་བཤད་གནང་བ་མ་ཟད། ཁོང་རྣམ་པས་བོད་དོན་ལ་རྒྱབ་སྐྱོར་མུ་མཐུད་གནང་རྒྱུ་ཡིན་སྐོར་ཡང་གསུངས་འདུག་པ་བཅས། །