༄༅། །ཕ་རཱན་སིའི་གྲོས་ཚོགས་གོང་མའི་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཇེ་ཁེ་ལིན་ (Jacqueline Eustache-Brinio) མཆོག་གིས་སྣེ་ཁྲིད་པའི་ཕ་རཱན་སིའི་གྲོས་ཚོགས་གོང་མའི་གྲོས་ཚོགས་འཐུས་མི་བཞི་ལས་གྲུབ་པའི་སྐུ་ཚབ་ཚོགས་ཆུང་ཞིག་བདུན་ཕྲག་རྗེས་མའི་ནང་བཞུགས་སྒར་རྡ་སར་ཉིན་གྲངས་ལྔའི་རིང་འཚམས་གཟིགས་སུ་ཕེབས་གཏན་ཁེལ་ཡོད་ཅིང་། འཚམས་གཟིགས་སྐབས་ཕ་རཱན་སིའི་གྲོས་ཚོགས་གོང་མའི་གྲོས་ཚོགས་འཐུས་མིའི་སྐུ་ཚབ་ཚོགས་ཆུང་གིས་བོད་མིའི་སྒྲིག་འཛུགས་ཀྱི་དབུ་ཁྲིད་རྣམ་པ་དང་མཇལ་འཕྲད། དེ་བཞིན་རྡ་ས་ཁུལ་གྱི་སློབ་གྲྭ་ཁག་དང་། རིག་གཞུང་བསྟི་གནས་ཁང་། གཞུང་དང་གཞུང་ཁོངས་མིན་པའི་ཚོགས་པ་ཁག་ལ་འཚམས་གཟིགས་སུ་ཕེབས་གཏན་ཁེལ་ཡོད།

ཉེ་ཆར་ཕ་རཱན་སིའི་སྲིད་འཛིན་སྐུ་ཞབས་ཨེམ་མེ་ནུལ་མེ་ཁི་རོན་ (Emmanuel Macron) མཆོག་རྒྱ་ནག་ལ་གཟིགས་སྐོར་མ་ཕེབས་གོང་ཕ་རཱན་སིའི་གྲོས་ཚོགས་གོང་མའི་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཇེ་ཁེ་ལིན་མཆོག་གིས་ཕ་རཱན་སིའི་གྲོས་ཚོགས་གོང་མའི་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ཀྱི་ཚབ་ཞུས་ཏེ་ཕ་རཱན་སིའི་སྲིད་འཛིན་སྐུ་ཞབས་ཨེམ་མེ་ནུལ་མེ་ཁི་རོན་མཆོག་རྒྱ་ནག་ལ་གཟིགས་སྐོར་ཕེབས་སྐབས་རྒྱ་ནག་གཞུང་གིས་བོད་ནང་བོད་པའི་སློབ་ཕྲུག་རྣམས་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་ཁག་ཏུ་བཏང་དང་གཏོང་བཞིན་པའི་སྐོར་དང་། བོད་རྒྱའི་གྲོས་མོལ་བསྐྱར་གསོ་ཡོང་ཐབས། བོད་མཐོ་སྒང་གི་ཁོར་ཡུག་གི་གལ་གནད་སོགས་ཀྱི་སྐོར་གླེང་སློང་གནང་དགོས་པའི་འབོད་སྐུལ་ཞུས་གནང་ཡོད་ལ། དེ་བཞིན་ཕ་རཱན་སིའི་གཞུང་ལའང་རྒྱ་ནག་གཞུང་གིས་བོད་ནང་བོད་པའི་སློབ་ཕྲུག་རྣམས་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་ཁག་ཏུ་གཏོང་བཞིན་པ་དང་། རིགས་རྫས་དཔེ་མཚོན་བསྡུ་རུབ་བྱས་དང་བྱེད་བཞིན་པའི་སྐོར་འདྲི་རྩད་གནང་ཡོད།

ཕ་རཱན་སི་བོད་ཀྱི་འབྲེལ་མཐུད་ལས་ཁུངས་ཀྱི་འབྲེལ་ཡོད་ལས་བྱེད་འཇིགས་མེད་རྡོ་རྗེ་ལགས་ཀྱིས་ཕ་རཱན་སིའི་གྲོས་ཚོགས་གོང་མའི་གྲོས་ཚོགས་གོང་མའི་འཐུས་མིའི་སྐུ་ཚབ་ཚོགས་ཆུང་རྡ་སར་འཁྲིད་གནང་རྒྱུ་ཡིན་པ་བཅས།།