༄༅། །ཧིན་བོད་མཛའ་འབྲེལ་ཚོགས་པའི་བི་ཧཱར་མངའ་སྡེའི་ཡན་ལག་ནས་བོད་ཀྱི་རང་དབང་འཐབ་རྩོད་ཐོག་རྒྱ་གར་མི་མང་གི་ལས་འགན་ཞེས་པའི་བརྗོད་གཞིའི་ཐོག་ཚེ་འདས་རཱམ་ཅནྡྲ་ཁཱན་ལགས་རྗེས་དྲན་གྱི་གསུང་བཤད་ལས་རིམ་ཞིག་གོ་སྒྲིག་ཞུས་ཡོད།
དེ་ཡང་རྗེས་དྲན་གསུང་བཤད་ལས་རིམ་ཐོག་བི་ཧར་མངའ་སྡེའི་ཧིན་བོད་མཛའ་འབྲེལ་ཚོགས་པའི་ཚོགས་གཙོ་འབུམ་རམས་པ་ཧ་རེནྡྲ་ཀུ་མཱར་ལགས་དང་། ཚོགས་གཞོན་འབུམ་རམས་པ་བི་ཀཱས་ནཱ་རཱ་ཡཎ་ཨུ་པཱ་དྷྱཱ་ཡ་ལགས་ཀྱི་གཙོ་སྐྱོང་འོག་སྐུ་མགྲོན་གཙོ་བོ་རྒྱ་གར་དབུས་གཞུང་གི་བློན་ཆེན་ཟུར་པ་དང་མངའ་སྡེའི་གྲོས་ཚོགས་འཐུས་མི་ཟུར་པ་འབུམ་རམས་པ་སཾ་ཇ་ཡ་པཱས་བཱན་ལགས་དང་། དཔལ་འབྱོར་རིག་གནས་མཁས་པ་ན་བལ་ཀི་ཤོར་ཅཻདྷ་རཱི་ལགས། ཚེ་འདས་རཱམ་ཅནྡྲ་ཁཱན་ལགས་ཀྱི་བུ་མོ་ལྕམ་ཨ་ནུ་རཱ་དྷཱ་ཤཾ་ཀར་ལགས། འཕགས་བོད་འབྲེལ་མཐུད་ལས་ཁུངས་ཀྱི་འབྲེལ་མཐུད་པ་བཀྲ་ཤིས་བདེ་སྐྱིད་ལགས་བཅས་མཉམ་ཞུགས་གནང་ཡོད་པ་རེད།
སྐབས་དེར་སྐུ་ཞབས་སུ་རེནྡྲ་ཀུ་མཱར་ལགས་ཀྱིས་ཚེ་འདས་རཱམ་ཅནྡྲ་ཁཱན་ལགས་ཀྱིས་བོད་ཀྱི་རང་དབང་འཐབ་རྩོད་ལ་ཞབས་འདེགས་ཇི་ཞུས་དྲན་གསོ་གནང་ཞིང་། འབུམ་རམས་པ་སཾ་ཇ་ཡ་པཱས་བཱན་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་འཛམ་གླིང་ཞི་བདེའི་དགོངས་གཞི་ངོ་སྤྲོད་དང་། རྒྱ་ནག་གཞུང་གིས་བོད་བཙན་བཟུང་བྱས་ཏེ་དྲག་པོའི་ཁྲིམས་གནོན་བྱེད་བཞིན་པར་སྐྱོན་བརྗོད་གནང་ཡོད་པ་རེད། དེ་བཞིན་འབུམ་རམས་པ་ན་བལ་ཀི་ཤོར་ཅཻདྷ་རཱི་ལགས་ཀྱིས་རྒྱ་ནག་གཞུང་ནས་བོད་མཐོ་སྒང་གི་ཁོར་ཡུག་གཏོར་སྐྱོན་ཚབས་ཆེ་གཏོང་བཞིན་པར་བློ་འཚབ་དང་། རྒྱ་གར་ནང་དུ་རྒྱ་ནག་གི་དངོས་ཟོག་ཚོང་འགྲེམས་མཚམས་འཇོག་དགོས་པའི་འབོད་སྐུལ་གནང་ཡོད།
འཕགས་བོད་འབྲེལ་མཐུད་ལས་ཁུངས་ཀྱི་འབྲེལ་མཐུད་པ་བཀྲ་ཤིས་བདེ་སྐྱིད་ལགས་ཀྱིས་བོད་དོན་རྒྱབ་སྐྱོར་བ་རྣམས་ནས་བོད་ཀྱི་རང་དབང་འཐབ་རྩོད་ལ་རྒྱབ་སྐྱོར་གཡོ་མེད་གནང་དང་གནང་བཞིན་པར་ཐུགས་རྗེ་ལེགས་འབུལ་ཞུས་པ་དང་ཆབས་ཅིག་རྒྱ་གར་གྱིས་བོད་ཀྱི་རང་དབང་བདེན་པའི་འཐབ་རྩོད་ལ་ཤུགས་རྐྱེན་ཆེན་པོ་སྤྲོད་ཐུབ་ཚུལ་འགྲེལ་བརྗོད་གནང་ཡོད་པ་རེད།
སྐབས་དེར་ཚོགས་བཅར་བ་རྣམས་ནས་བསམ་གྲོས་ཞིབ་བསྡུར་གྱིས་བསྒྲགས་གཏམ་ཞིག་སྤེལ་བའི་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་གྱི་སྤྱི་དམངས་གཟེངས་རྟགས་བྷཱ་རཏ་རཏྣ་ཞེས་པ་འབུལ་བཞེས་དགོས་སྐོར་དང་། འཕགས་བོད་ས་མཚམས་སུ་རྒྱ་ནག་གི་ཉེན་ཚབས་སླེབས་བཞིན་པར་ཁ་གཏད་བཅོག་དགོས་སྐོར་གསལ་ཡོད།
གཞན་ཡང་རྗེས་དྲན་གསུང་བཤད་ལས་རིམ་ཐོག་གནད་ཡོད་མི་སྣ་དང་བི་ཧར་མངའ་སྡེའི་བོད་དོན་རྒྱབ་སྐྱོར་བ་སོགས་ཚོགས་བཅར་གནང་ཡོད།
སྤྱིར་ཚེ་འདས་རཱམ་ཅནྡྲ་ཁཱན་ལགས་ནི་རྒྱ་གར་གཞུང་གི་མཐོ་རིམ་སྲི་ཞུ་བ་ (IPS Officer) ཟུར་པ་དང་། ཧིན་བོད་མཛའ་འབྲེལ་ཚོགས་པའི་བི་ཧཱར་ཡན་ལག་གི་ཚོགས་ཟུར་ཡིན་ཞིང་། ཁོང་གིས་བོད་ཀྱི་རང་དབང་འཐབ་རྩོད་ཐད་ཞབས་འདེགས་རྒྱ་གང་ཆེ་ཞུས་ཡོད་པ་བཅས།།
