༄༅། །འདི་གར་ཆོས་རིག་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༣ ཟླ་བ་ ༤ ཚེས་ ༡ དང་ ༢ ཉིན་འབྲས་ལྗོངས་ས་གནས་གཡང་སྒང་དུ་རྟེན་གཞི་བྱས་པའི་སོག་གཡུང་དྲུང་གླིང་བོན་པོ་དགོན་པ་ཕྱག་བཏབ་ནས་མི་ལོ་བཅུ་ཧྲིལ་པོ་འཁོར་བའི་རྟེན་འབྲེལ་མཛད་སྒོར་ཆོས་རིག་བཀའ་བློན་མཆོག་དམིགས་བསལ་སྐུ་མགྲོན་དུ་ཇི་ལྟར་མགྲོན་འབོད་གནང་དོན་བཞིན། ཆོས་རིག་བཀའ་བློན་མཆོག་གི་སྐུ་ཚབ་ཏུ་ཆོས་རིག་དྲུང་ཆེ་འཆི་མེད་ཚེ་དབྱངས་ལགས་ཆེད་ཕེབས་ཀྱིས་མཛད་སྒོར་མཉམ་ཞུགས་དང་གསུང་བཤད་གནང་ཡོད།
དེ་ཡང་ཕྱི་ཚེས་ ༡ ཉིན་ཏེ་མཛད་སྒོ་ཉིན་དང་པོར་༸སྐྱབས་རྗེ་སྨན་རིའི་ཁྲི་འཛིན་སོ་བཞི་པ་ལུང་རྟོགས་ཟླ་བ་དར་རྒྱས་རིན་པོ་ཆེ་མཆོག་གིས་སྣང་སྲིད་ཞི་བའི་སྦྱིན་སྲེག་མཆོད་འབུལ་གནང་རྗེས་བཀའ་སློབ་ཟབ་མོ་སྩལ། དེ་བཞིན་མཛད་སྒོའི་སྐུ་མགྲོན་གཙོ་བོ་འབྲས་ལྗོངས་གཞུང་གི་དྲུང་ཆེ་ཟུར་པ་ཡབ་ཚེ་རྒྱལ་ལགས་དང་ཆོས་རིག་དྲུང་ཆེ་འཆི་མེད་ཚེ་དབྱངས་ལགས་རྣམ་གཉིས་ཀྱིས་མཛད་སྒོ་དང་འབྲེལ་བའི་གསུང་བཤད་གནང་ཡོད།
མཛད་སྒོ་ཉིན་གཉིས་པ་སྟེ་ཕྱི་ཚེས་ ༢ ཉིན་༸སྐྱབས་རྗེ་སྨན་རིའི་ཁྲི་འཛིན་སོ་བཞི་པ་མཆོག་གིས་ཡུལ་མི་རྣམས་ལ་ཚེ་སྒྲུབ་བཀའ་དབང་བསྩལ་བ་དང་། མཛད་སྒོ་ཉིན་གཉིས་པའི་སྐུ་མགྲོན་གཙོ་བོ་འབྲས་ལྗོངས་གཞུང་གི་ཤིང་ནགས་བློན་ཆེན་ཀརྨ་བློ་གྲོས་བྷོ་ཊི་ཡ་མཆོག་དང་འབྲས་ལྗོངས་གཡང་སྒང་ས་གནས་གྲོས་ཚོགས་འཐུས་མི་རཱཇ་ཀུམཱརི་ཐཱ་པ་ལགས་བཅས་མཉམ་ཞུགས་དང་གསུང་བཤད་གནང་ཡོད།
གཞན་ཡང་མཛད་སྒོའི་ཐོག་གཡུང་དྲུང་བོན་གྱི་སྤྱི་འཐུས་རྣམ་གཉིས་དང་སྤྱི་ཟུར་བ་ར་ཚེ་དབང་བཀྲ་ཤིས་ལགས། སྒང་ཏོག་ས་གནས་འགོ་འཛིན་བཅས་ཀྱང་མཉམ་ཞུགས་གནང་ཡོད།
སྤྱིར་༸སོག་གཡུང་དྲུང་གླིང་བོན་པོ་དགོན་པ་ནི། ཕྱི་ལོ་ ༢༠༡༣ ཟླ་བ་ ༤ ཚེས་ ༢༤ ཉིན་མཁན་པོ་ཡོན་ཏན་རྒྱ་མཚོ་རིན་པོ་ཆེ་མཆོག་གིས་ཕྱག་བཏབ་པ་དང་། ཕྱི་ལོ་ ༢༠༡༦ ཟླ་བ་ ༡༢ ཚེས་ ༣༡ ཉིན་དགོན་པ་འདི་ཉིད་དངོས་སུ་དབུ་འབྱེད་གནང་ཡོད། ཕྱི་ལོ་ ༢༠༡༨ ཟླ་བ་ ༤ ཚེས་ ༢༢ ཉིན་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་གཙོས་གནད་ཡོད་མི་སྣ་ཁག་གཅིག་གིས་དགོན་པའི་སློབ་གྲྭ་ས་ཏྲིག་ཨེར་སངས་སློབ་གླིང་དབུ་འབྱེད་གནང་།
དེ་ཡང་དགོན་པ་འདི་གསར་བཞེངས་གནང་དགོས་པའི་དམིགས་ཡུལ་གཙོ་བོ་ནི། བོད་ཀྱི་ཆོས་ལུགས་དང་རིག་གཞུང་མི་ཉམས་རྒྱུད་འཛིན་དང་ཉམས་པ་སླར་གསོའི་ཆེད་དུ་ཡིན་པ་མ་ཟད། སྒོས་སུ་ཧི་མཱ་ལ་ཡའི་མི་རིགས་ཀྱི་ཉམ་ཐག་སློབ་མ་རྣམས་ལ་ཤེས་ཡོན་སྦྱང་བའི་གོ་སྐབས་སྤྲད་པའི་བརྒྱུད་མ་འོངས་པར་སློབ་མ་དེ་དག་རང་ཁ་རང་གསོ་ཆགས་ཏེ་རང་གཞན་གཉིས་ཕན་གྱི་བྱ་བར་འཇུག་མཁན་གྱི་མི་ཞིག་ཆགས་ཐུབ་པའི་རེ་བ་བྱེད་བཞིན་ཡོད་འདུག
ད་ལྟའི་ཆར་སློབ་གཉེར་བ་གྲྭ་བ་གྲངས་ ༤༤ དང་། བུ་མོ་གྲངས་ ༢༩ ཡོད་པས་ཁྱོན་བསྡོམས་སློབ་གྲངས་ ༧༣ ཡོད་པའི་ནང་ནས་གྲྭ་པ་བརྒྱད་བལ་ཡུལ་༸ཁྲི་བརྟན་ནོར་བུ་རྩེར་བོན་གཞུང་རིག་གནས་ཆེ་ཆུང་སོགས་སློབ་གཉེར་གནང་བཞིན་པ་དང་། སློབ་མ་གཉིས་དྷ་རམ་ས་ལར་ལྷ་འབྲི་སྦྱོང་བཞིན་པ། སློབ་མ་གཅིག་སློབ་གྲྭ་མཐར་ཕྱིན་ནས་འབྲས་ལྗོངས་གཞུང་གི་སྨན་གྱི་མཐོ་སློབ་གཅིག་ལ་སྨན་པའི་སློབ་སྦྱོང་བྱེད་བཞིན་ཡོད། དེ་བཞིན་སློབ་མ་གཉིས་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་དུ་འཛུལ་ཞུགས་ཀྱིས་ནང་ཆོས་ལ་སློབ་གཉེར་བྱེད་བཞིན་ཡོད་འདུག་པ་བཅས།།
