༄༅། །ཕྱི་ལོ་ ༢༠༢༣ ཟླ་བ་ ༣ ཚེས་ ༢༩ ཉིན་གྱི་སྔ་དྲོ་ཆུ་ཚོད་ ༩།༠༠ སྟེང་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་བོད་ཀྱི་ཞོ་སྟོན་རྒྱས་པ་ཐེངས་ ༢༦ པའི་མཇུག་བསྡོམས་སྒོ་འཚོགས་ཤིང་། མཛད་སྒོའི་སྐུ་མགྲོན་གཙོ་བོ་༧སྐྱབས་གནས་འབྲས་སྤུངས་ཁྲི་པ་དགེ་བཤེས་དཀོན་མཆོག་དཔག་བསམ་རིན་པོ་ཆེ་མཆོག་གིས་གཙོས་སྐུ་མགྲོན་དང་རྒྱ་ཆེའི་མང་ཚོགས་སྟོང་ཚོ་གསུམ་ལྷག་འདུ་འཛོམས་ཀྱིས་མཇུག་བསྡོམས་མཛད་སྒོ་བསྲུ་བརྩི་གནང་སོང་།དེ་ཡང་མཛད་སྒོ་དབུ་འཛུགས་ཀྱིས་ཐོག་མར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེ་དང་བོད་ཀྱི་ལྷ་མོའི་སྲོལ་བྱེད་གྲུབ་ཆེན་ཐང་སྟོང་རྒྱལ་པོའི་སྐུ་བརྙན་དོ་རྭའི་ནང་གནད་འདྲེན་ཞུས།  

མཛད་སྒོའི་ཐོག་བོད་ཀྱི་ཟློས་གར་ཚོགས་པའི་སྤྱི་ཁྱབ་འགན་འཛིན་གྱིས་མཇུག་བསྡོམས་མཛད་སྒོའི་གསུང་བཤད་གནང་རྗེས་བོད་ཀྱི་ཟློས་གར་ཚོགས་པས་ལོ་རྒྱུས་ཀྱི་དོན་སྙིང་ལྡན་ཞིང་བོད་བཙན་པོའི་རྒྱལ་རབས་ཀྱི་ཡ་གྱལ་དུ་གཏོགས་པའི་ཆོས་རྒྱལ་སྲོང་བཙན་སྒམ་པོས་བཙུན་མོ་རྒྱལ་བཟའ་ཀོང་ཇོ་དང་བལ་བཟའ་ཁྲི་བཙུན་ཁབ་ཏུ་བཞེས་སྟངས་མཚོན་པའི་ལྷ་གཞུང་རྒྱལ་བཟའ་བལ་བཟའ་གཟིགས་འབུལ་ཞུས་ཡོད།ཉིན་དེར་མོན་གྷོ་འདོད་རྒུ་གླིང་སེར་སྐྱ་མི་མང་སྟོང་ཚོ་གསུམ་ལྷག་ལྷན་འཛོམས་ཀྱིས་དགའ་སྤྲོས་རབ་ཏུ་བརྟས་ཤིང་། སྒོས་སུ་སྐུ་མགྲོན་གཙོ་བོ་མཆོག་གིས་སེར་སྐྱ་མི་མང་ཡོངས་ལ་བོད་ཀྱི་ལྷ་མོའི་རིག་གཞུང་རྒྱུན་འཛིན་གནང་གལ་དང་། རྒྱུན་གནས་ཡོང་རྒྱུར་འབད་འབུངས་གནང་དགོས་པའི་གསུང་བཤད་གནང་རྗེས་བོད་ཀྱི་ཟློས་གར་ཚོགས་པའི་འཁྲབ་སྟོན་འགན་འཛིན་ལས་རོགས་རོལ་དགེ་བསྟན་འཛིན་ཕུན་ཚོགས་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་རྗེས་བོད་ཀྱི་ཟློས་གར་ཚོགས་པའི་འཁྲབ་སྟོན་པ་རྣམས་ཀྱིས་བཀྲ་ཤིས་བཅད་དེ་བོད་ཀྱི་ཞོ་སྟོན་དུས་ཆེན་མཇུག་སྒྲིལ།ཕྱི་ཚེས་ ༡༩ ནས་ ༢༩ བར་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་བོད་ཀྱི་ཞོ་སྟོན་དུས་ཆེན་སྲུང་བརྩི་གནང་སྐབས་སྤྱིར་གནམ་གཤིས་ཧ་ཅང་ཚ་དྲོད་ཆེ་ནའང་རྒྱ་ཆེའི་སེར་སྐྱ་མང་ཚོགས་ཀྱིས་ཐུགས་སྣང་ཆེན་པོས་རྒྱབ་སྐྱོར་ཆེ་བསྐྱེད་དང་། ས་གནས་འགོ་འཛིན་གྱིས་གཙོས་གཞིས་སྤྱི་ལྷ་ཚོགས་དང་སྤྱི་མི་གྲོང་སྡེ་ཁག་གི་བརྒྱ་དཔོན་ཡོངས་ནས་རང་ནུས་གང་ལྕོགས་ཀྱིས་མཐུན་འགྱུར་རྒྱབ་སྐྱོར་ཆེན་པོ་གནང་། དེ་བཞིན་བསྟན་བདག་བླ་ཆེན་གཙོས་རྒྱ་ཆེའི་སེར་སྐྱ་མང་ཚོགས་ནས་ཞལ་འདེབས་གང་ལེགས་གནང་བར་བཀའ་དྲིན་ཆེ་ཞེས་ཞུས་སོང་། །