དེ་ཡང་མཇལ་འཕྲད་སྐབས་ཐའེ་ཝན་གྲོས་ཚོགས་ཀྱི་ཚོགས་གཙོའི་ལས་ཁུངས་ནས་གསར་འགོད་ལྷན་ཚོགས་ཤིག་བསྐོངས་ཏེ་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་མཆོག་ལ་གཞུང་འབྲེལ་དགའ་བསུའི་འཚམས་འདྲི་ཞུས་གནང་རྗེས། ཚོགས་གཙོ་མཆོག་གིས་གཞུང་འབྲེལ་གསུང་བཤད་སྒྲོགས་སྦྱང་གནང་བ་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཀྱིས་བོད་སྐད་ཐོག་གསུང་བསྒྱུར་ཞུས་ཡོད།དེ་ནས་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་གསར་འགོད་ལྷན་ཚོགས་ཐོག་ད་ཐེངས་ཐའེ་ཝན་དུ་གཞུང་འབྲེལ་འཚམས་གཟིགས་ཕེབས་པ་ནི་ཨེ་ཤེ་ཡའི་ནང་དུ་གཞུང་དོན་འཚམས་གཟིགས་དང་པོ་དེ་ཆགས་ཀྱི་ཡོད་སྟབས། དམིགས་བསལ་གྱི་དགའ་ཚོར་ཞིག་ཡོང་གི་འདུག གང་ཡིན་ཞུས་ན་ཐའེ་ཝན་ནི་རང་དབང་མང་གཙོ་མིག་དཔེ་འོས་པའི་ལུང་པ་ཞིག་ཡིན་པ་མ་ཟད། མི་ཚོ་ཡ་རབས་བཟང་སྤྱོད་དང་ལྡན་པ། བོད་མི་མཚོན་ཉམ་ཆུང་དཀའ་ངལ་འོག་ཚུད་བཞིན་པའི་མི་རིགས་ལ་རོགས་སྐྱོར་དང་ཐུགས་འཁུར་བླ་ལྷག་ཏུ་ཡོད་པ་ཞིག་ཡིན་པ་དེ་རིང་གཟི་བརྗིད་ཆེ་བའི་མཇལ་འཕྲད་ཀྱི་མཛད་སྒོ་འདིའི་སྒང་ནས་མཚོན་གྱི་འདུག དེར་བརྟེན་ཐོག་མར་བཀུར་འོས་ཚོགས་གཙོ་མཆོག་དང་། འབྲེལ་ཡོད་གྲོས་ཚོགས་ཀྱི་འཐུས་མི་རྣམ་པ། གསར་འགྱུར་བརྒྱུད་ལམ་ཁག དེ་རིང་གི་མཇལ་འཕྲད་གོ་སྒྲིག་གནང་མཁན་ཚང་མར་འཚམས་འདྲི་དང་ཐུགས་རྗེ་ཆེ་ཞུ་རྒྱུ་ཡིན།