༄༅། །ཕྱི་ལོ་ ༢༠༢༣ ཟླ་བ་ ༣ ཚེས་ ༢༨ ཉིན་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་དྲུང་ཆེ་ཀརྨ་ཆོས་དབྱིངས་ལགས་རྣམ་གཉིས་ཀྱིས་ཐའེ་ཝན་གྱི་ཕྱི་སྲིད་བློན་ཆེན་སྐུ་ཞབས་ཝུ་ཀྲའོ་ཤེད་ (Jaushich Joseph Wu) མཆོག་དང་མཇལ་འཕྲད་གནང་ཡོད།

དེ་ཡང་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་ཐའེ་ཝན་གྱི་ཕྱི་སྲིད་བློན་ཆེན་མཆོག་ལ་འཚམས་འདྲི་དང་འབྲེལ་རྒྱ་ནག་གཞུང་ནས་འཆར་གཞི་ལྡན་པའི་ཐོག་བོད་ཀྱི་ཆོས་དང་རིག་གཞུང་། སྐད་ཡིག མི་རིགས་བཅས་རྩ་མེད་ཇི་ལྟར་གཏོང་བཞིན་པའི་སྐོར་དང་། དེ་བཞིན་རྒྱལ་སྤྱིའི་ཆབ་སྲིད་ཀྱི་གནས་བབ་དང་། ཐའེ་བོད་གཉིས་རྒྱ་ནག་དམར་ཤོག་གི་གདུག་རྩུབ་ཅན་གྱི་གཞུང་གིས་མནར་གཅོད་དང་རྡུང་རྡེག འཇིགས་སྐུལ་ཐེབས་མཁན་ཡིན་པའི་ཆ་ནས་ཐུན་མོང་གི་གདོང་ལེན་བྱེད་ཕྱོགས་སོགས་ཀྱི་སྐོར་བཀའ་མོལ་ཞིབ་ལྷུག་གནང་རྗེས། ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་ཐའེ་ཝན་ནང་ཡོད་པའི་བོད་བརྒྱུད་ནང་བསྟན་གྱི་ཆོས་ཚོགས་ཁག་གི་དགེ་འདུན་པ་དང་། རྒྱ་ཡིག་སློབ་གཉེར་བྱེད་མཁན་བོད་ཕྲུག་རྣམས་ལ་མཐོང་མཆན་གྱི་དཀའ་ངལ་འཕྲད་བཞིན་པ་དེ་དག་སེལ་ཐབས་དང་། བོད་པའི་སློབ་ཕྲུག་རྣམས་ལ་རྒྱ་ཡིག་སློབ་གཉེར་བྱེད་རྒྱུའི་གོ་སྐབས་ཙམ་མིན་པར་ལག་འཁྱེར་ཡོད་པའི་སློབ་ཚན་ཐོག་སློབ་སྦྱོང་གི་མཐོང་མཆན་གནང་ཐབས་ཀྱི་དགོངས་བཞེས་གནང་ཐབས་ཡོང་བ་སོགས་ཞུས་གནང་བ་དང་ཆབས་ཅིག ཐའེ་ཝན་ནི་རྒྱལ་སྤྱིའི་ནང་མིག་དཔེ་འོས་པའི་མང་གཙོ་ཅན་གྱི་རྒྱལ་ཁབ་ཅིག་ཡིན་སྟབས། བོད་ཀྱི་གནད་དོན་ཐད་རྒྱབ་སྐྱོར་ཇི་ཙམ་གནང་ཐུབ་ན་ཐའེ་ཝན་རང་ཉིད་ལའང་རྒྱལ་སྤྱིའི་ཐོག་མཐོང་ཆེ་རུ་འགྲོ་རྒྱུའི་དགེ་མཚན་ཡོད་སྐོར་གསུངས་པར། ཐའེ་ཝན་གྱི་ཕྱི་སྲིད་བློ་ཆེན་མཆོག་གིས་ཕྱི་དྲིལ་བཀའ་བློན་མཆོག་ཐའེ་ཝན་དུ་འཚམས་གཟིགས་ལ་ཕེབས་པར་དགའ་བསུའི་འཚམས་འདྲི་ཞུས་གནང་པ་དང་སྦྲགས་ཐའེ་ཝན་ནས་བོད་ཀྱི་གནད་དོན་ཐད་དུས་རྒྱུན་དུ་དོ་སྣང་དང་སེམས་ཁུར་ཆེན་པོ་གནང་བཞིན་ཡོད་ཅེས་འགྲེལ་བརྗོད་གནང་།ཐའེ་ཝན་གྱི་ཕྱི་སྲིད་བློན་ཆེན་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དད་གུས་ཆེན་པོ་ཡོད་ཅེས་དང་། བོད་ཀྱི་གནད་དོན་ཐད་ལའང་མུ་མཐུད་རྒྱབ་སྐྱོར་གནང་རྒྱུ་ཡིན་པའི་འགྲེལ་བརྗོད་ཁ་གསལ་གནང་ཡོད། དེ་བཞིན་ཕྱི་སྲིད་བློན་ཆེན་མཆོག་གིས་ཡུ་རོབ་ཁུལ་དུ་ཐའེ་ཝན་གཞུང་ཚབ་ཁང་དང་བོད་མིའི་སྒྲིག་འཛུགས་ཀྱི་སྐུ་ཚབ་དོན་ཁང་ཁག་གི་དབར་འབྲེལ་ཐག་ཟབ་ཏུ་གཏོང་དགོས་པའི་དགོངས་འཆར་འདོན་གནང་བར་ཕྱི་དྲིལ་བཀའ་བློན་མཆོག་གིས་དགའ་བསུ་ཞུས་གནང་ཡོད། ཐའེ་ཝན་གྱི་ཕྱི་སྲིད་བློན་ཆེན་མཆོག་གིས་ཐའེ་ཝན་ནང་ཡོད་པའི་བོད་མི་ཚོར་མཐོང་མཆན་གྱི་དཀའ་ངལ་སེལ་ཕྱོགས་སྐོར་སྲིད་བློན་ལས་ཁུངས་ཀྱི་འབྲེལ་ཡོད་སྲིད་དོན་འགོ་འཛིན་ནས་ལྷན་ཁང་ཁག་དང་འབྲེལ་བ་གནང་སྟེ་དཀའ་ངལ་སེལ་ཕྱོགས་ཀྱི་ཐབས་ལམ་བཙལ་དང་འཚོལ་མུས་ཡིན་པ་དང་། ཕྱི་སྲིད་ལས་ཁུངས་ནས་ཀྱང་དུས་ཚོད་ཕྲན་བུ་འགོར་སྲིད་ཀྱང་། དཀའ་ངལ་སེལ་ཕྱོགས་སྐོར་ད་དུང་སྲིད་བློན་ལས་ཁུངས་དང་མུ་མཐུད་འབྲེལ་བ་གནང་སྟེ་ཐབས་ཤེས་ཡོད་རྒུ་རྩལ་སྤྲུག་ཞུ་རྒྱུའི་འགན་ལེན་གཙང་མ་ཞུ་རྒྱུ་ཡིན་ཞེས་གསུངས།སྐབས་དེར་ཐའེ་ཝན་ཕྱི་སྲིད་ལས་ཁུངས་ཀྱི་ཤར་ཨེ་ཤ་ཡ་དང་ཞི་བདེ་རྒྱ་མཚོ་སྡེ་ཚན་གྱི་འགན་འཛིན་སྐུ་ཞབས་ (Amb. Wallace M. G Chow) མཆོག་དང་། ཐའེ་ཝན་བོད་ཀྱི་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས། དོན་ཁང་གི་དྲུང་ཆེ་མི་འགྱུར་གཡུ་སྒྲོན་ལགས་བཅས་མཉམ་ཞུགས་གནང་ཡོད། །