༄༅། །ཨེ་ཤི་ཡ་རང་དབང་རླུང་འཕྲིན་ཁང་གིས་སྤེལ་བའི་གནས་ཚུལ་ལྟར་ན། བོད་མི་འབྱོར་ལྡན་པ་རྡོ་རྗེ་བཀྲ་ཤིས་ལགས་སུ་རྒྱ་ནག་གཞུང་གིས་གསང་བའི་ཁྲིམས་བཤེར་འོག་ཚེ་བཙོན་གྱི་ཁྲིམས་ཐག་བཅད་ཡོད་པ་བཞིན། ཕྱི་ཟླ་ ༣ ཚེས་ ༢༠ ཉིན་ཁོང་གི་གཅེན་མོ་མགོན་པོ་སྐྱིད་ཀྱིས་བོད་ལྗོངས་ཁྲིམས་ཁང་སྒོ་མདུན་དུ་རྡོ་རྗེ་བཀྲ་ཤིས་ཁྲིམས་འགལ་བཙོན་འཇུག་བྱས་པའི་གནད་དོན་ལ་ཁྲིམས་ཞིབ་བྱེད་དགོས་པ་དང་། ཁོང་ཐུག་འཕྲད་བྱེད་འཇུག་དགོས་པའི་ཞུ་གཏུག་ལས་འགུལ་སྤེལ་སྐབས། ལྷ་སའི་པེ་ཅིང་ལམ་གྱི་རྒྱ་ནག་གི་ཉེན་རྟོག་པས་གཅར་རྡུང་དང་བཅས་འཛིན་བཟུང་གིས་ལྷ་སའི་བཅིངས་གྲོལ་ལམ་གྱི་མངགས་གཏོང་ཁང་དུ་མཚན་གཅིག་རིང་བཀག་ཉར་རྗེས་གློད་བཀྲོལ་བཏང་ཡོད་ཀྱང་། མངགས་གཏོང་ཁང་ནས་གཅར་རྡུང་གིས་ཕྱི་ཚེས་ ༢༡ ཉིན་ཁོང་གི་སྤུན་མཆེད་རྡོ་རྗེ་ཚེ་བརྟན་ལགས་ཀྱིས་སྨན་ཁང་དུ་འཁྱེར་དགོས་བྱུང་ཡོད་པ། བོད་ནང་དང་བཙན་བྱོལ་ནང་ཡོད་པའི་འབྲེལ་ཡོད་བོད་མི་གཉིས་ནས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་བྱུང་།
གོང་ཞུས་གནས་ཚུལ་མཁོ་སྤྲོད་པ་གཅིག་ནས་མུ་མཐུད་བརྗོད་དོན་ལ། མགོན་པོ་སྐྱིད་ལགས་ཀྱིས་ངོ་རྒོལ་ཞུ་གཏུག་ལས་འགུལ་སྤེལ་བཞིན་པའི་སྐབས། ཉེན་རྟོག་པས་བཙན་ཐབས་ཀྱིས་ལས་འགུལ་མཚམས་འཇོག་དགོས་པར་སྐུལ་ཡོད་ན་ཡང་ཁོ་མོས་མུ་མཐུད་སྤུན་མཆེད་རྡོ་རྗེ་བཀྲ་ཤིས་ལགས་སུ་ནང་མིར་ཐུག་འཕྲད་དང་། ཁོང་མགྱོགས་མྱུར་ཀློད་གྲོལ་དགོས་པའི་ངོ་རྒོལ་བྱས་སྟབས། ཉེན་རྟོག་པས་བཙན་ཐབས་ཀྱིས་འཛིན་བཟུང་གིས་ཉེན་རྟོག་ལས་ཁུངས་སུ་ཁྲིད་དེ་མཚན་གཅིག་རིང་བཀག་ཉར་དང་གཅར་རྡུང་བྱས་ཡོད་པ་དང་། དེ་འབྲེལ་བརྙན་ཐུང་ཞིག་མཁོ་སྤྲོད་གནང་བའི་ནང་མགོན་པོ་སྐྱིད་ཀྱིས་གཅར་རྡུང་བྱས་པའི་གནས་ཚུལ་ངོ་སྤྲོད་དང་། གཅར་རྡུང་གིས་ལག་པའི་དཔུང་པར་ནག་ཐིག་ཁྱབ་ཡོད་པ་སོགས་མཐོང་རྒྱུ་འདུག
རྒྱ་ནག་གཞུང་གིས་རྡོ་རྗེ་བཀྲ་ཤིས་ལགས་ནས་བུ་ལོན་སྔ་གཡར་དང་འབྲེལ་བའི་ངན་ཇུས་བཤམས་པའི་ཉེས་འཛུགས་འོག་ཚེ་བཙོན་གྱི་ཁྲིམས་ཐག་བཅད་ཡོད་པ་རེད་ལ། གནས་ཚུལ་མཁོ་སྤྲོད་པས་མགོན་པོ་སྐྱིད་ཀྱིས་ཞུ་གཏུག་ལས་འགུལ་སྤེལ་བཞིན་པའི་བརྙན་ཐུང་ཞིག་མཁོ་སྤྲོད་གནང་བའི་ནང་། མགོན་པོ་སྐྱིད་ཀྱིས་ཉེས་ཁྲིམས་ཀྱི་ཡིག་ཆ་ཞིག་བསྟན་ནས། རྡོ་རྗེ་བཀྲ་ཤིས་དང་ཁྲིམས་ཁང་གཅིག་ཏུ་ཁྲིམས་ཐག་བཅད་པའི་རྒྱ་རིགས་ཚོང་པ་བཟའ་ཟླ་གཉིས་ལའང་མི་ལོ་ ༡༥ ཁྲིམས་ཐག་བཅད་ཡོད་ནའང་། ལོ་བཅུའི་རྗེས་ནས་བཙོན་འགྲོལ་བཏང་འདུག་ལ། རྡོ་རྗེ་བཀྲ་ཤིས་ཀྱིས་དེ་སྔ་ནས་ཁེ་ལས་ཀྱི་བུན་དངུལ་མཇལ་ཚར་ནའང་། ད་དུང་ལོ་ ༡༥ ཁྲིམས་ཆད་ཀྱིས་བཙོན་འཇུག་བྱས་པ་ནི་ཁྲིམས་མཐུན་ལུགས་མཐུན་མིན་པའི་ཁར། ཁྲིམས་ཐོག་ནས་མི་རིགས་དབྱེ་འབྱེད་བྱས་པ་ཞིག་ཡིན་པ་འགྲེལ་བརྗོད་གནང་གི་འདུག །
རྒྱ་ནག་གཞུང་གིས་རྡོ་རྗེ་བཀྲ་ཤིས་ལགས་སུ་མི་ལོ་༡༥ཁྲིམས་ཐག་བཅད་ཡོད་པ་དང་འབྲེལ། ཁོང་གི་གཅེན་པོ་རྡོ་རྗེ་ཚེ་བརྟན་ལགས་དང་གཅེན་མོ་མགོན་པོ་སྐྱིད་དང་། དེ་བཞིན་གཅེན་མོའི་ཁྱོ་ག་ཆོས་སྐྱོང་ལགས་གསུམ་གྱིས་ཐེངས་མང་ལ་ཡོངས་གྲགས་ངང་ཁོང་ཀློད་གྲོལ་དགོས་པའི་ཞུ་གཏུག་ངོ་རྒོལ་ལས་འགུལ་སྤེལ་ཡོད་པ་རེད་ལ། རྒྱ་ནག་གཞུང་གིས་རྡོ་རྗེ་ཚེ་བརྟན་ཡང་འཛིན་བཟུང་གིས་མི་ལོ་ ༦ བཙོན་འཇུག་ཁྲིམས་ཐག་བཅད་མྱོང་བ་དང་། མགོན་པོ་སྐྱིད་ཀྱང་སྔ་རྗེས་སུ་ཐེངས་༥ལ་འཛིན་བཟུང་དང་འདྲི་རྩད་གཅར་བརྡུང་ཐེངས་མང་བྱས་ཡོད་པའི་གནས་ཚུལ་ཐོན་ཡོད་པ་རེད། རྒྱ་ནག་གཞུང་གིས་རྡོ་རྗེ་བཀྲ་ཤིས་ལགས་སུ་ཕྱི་ལོ་༢༠༠༨ལོར་བོད་ནང་ས་བྱི་ཞི་རྒོལ་ཆེན་མོའི་སྐབས་བོད་མི་ཞི་རྒོལ་བ་ཚོར་རྒྱབ་སྐྱོར་བྱས་ལུགས་དང་བཙན་བྱོལ་བོད་མིའི་སྤྱི་ཚོགས་ཁྲོད་མ་དངུལ་གྱི་ཞལ་འདེབས་སྤྲད་ལུགས་བརྗོད་ནས་གྲྭ་བཞི་བཙོན་ཁང་དུ་བཙོན་འཇུག་དང་། ད་ལྟའི་ཆར་ལྷ་ས་བོད་ལྗོངས་ཁྲིམས་ཁང་དུ་བཙོན་འཇུག་བྱས་ཡོད་པ་རེད། །
