༄༅། །ཕྱི་ལོ་ ༢༠༢༣ ཟླ་བ་ ༣ ཚེས་ ༡༩ ཉིན་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་བོད་ཀྱི་ཟློས་གར་ཚོགས་པའི་གོ་སྒྲིག་འོག་བོད་ཀྱི་ཞོ་སྟོན་རྒྱས་པ་ཐེངས་ ༢༦ པ་དབུ་འཛུགས་ཀྱི་མཛད་སྒོ་ཚོགས་ཡོད་པ་དང་། མཛད་སྒོའི་ཐོག་སྐུ་མགྲོན་གཙོ་བོ་༧སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་མཆོག་སྤྲུལ་རིན་པོ་ཆེ་མཆོག་དབུ་བཞུགས་ཐོག་བོད་ཀྱི་ཟློས་གར་ཚོགས་པ་གཙོས་ལྷ་མོ་ཚོགས་པ་ཁག་བཅུ་གཅིག་དང་མི་མང་སྟོང་ཚོ་གཉིས་ཙམ་འདུ་འཛོམས་ཀྱིས་བོད་ཀྱི་ཞོ་སྟོན་དུས་ཆེན་སྲུང་བརྩི་ཞུས་ཡོད།
མཛད་སྒོའི་ཐོག་བོད་ཀྱི་ཟློས་གར་ཚོགས་པའི་སྤྱི་ཁྱབ་འགན་འཛིན་དོན་གྲུབ་ཚེ་རིང་ལགས་ཀྱིས་བོད་ཀྱི་ཞོ་སྟོན་དུས་ཆེན་གྱི་ལོ་རྒྱུས་ངོ་སྤྲོད་དང་ལས་བསྡོམས་སྙན་སྒྲོན་གནང་རྗེས་ལྷ་མོ་ཚོགས་པ་ཁག་གིས་ལྷ་གཞུང་སྙིང་བསྡུས་སྐར་མ་སུམ་ཅུ་རེ་གཟིགས་འབུལ་གཟབ་རྒྱས་ཞུས་ཡོད། 
སྐུ་མགྲོན་གཙོ་བོ་༧སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་མཆོག་སྤྲུལ་རིན་པོ་ཆེ་མཆོག་གིས་བོད་ཀྱི་ཨ་ཅེ་ལྷ་མོའི་སྒྱུ་རྩལ་ཐོག་མི་ཚེ་ཧྲིལ་པོར་བློས་གཏོང་གནང་མཁན་གྱི་ལྷ་དགེ་དང་གཏོང་ཕོད་ཅན་གྱི་སྤྱི་སྒེར་སྤྱིན་བདག་རྣམས་ལ་ལེགས་སྐྱེས་གནང་རྗེས་ལྷ་མོའི་འཁྲབ་སྟོན་པ་དང་རྒྱ་ཆེ་མང་ཚོགས་རྣམས་ལ་བོད་ཀྱི་ལྷ་མོའི་སྒྱུ་རྩལ་གྱི་གལ་གནད་དང་རྒྱུན་འཛིན་དར་སྤེལ་གནང་དགོས་པའི་གལ་གནད་སོགས་ཀྱི་སྐོར་བཀའ་སློབ་གཟབ་རྒྱས་གནང་ཡོད་པ་མ་ཟད། ཉིན་གང་པོར་སྐུ་བཞུགས་ཀྱིས་ཕྱོགས་མཐའི་ལྷ་མོ་ཚོགས་པའི་གཟིགས་ཕུད་ཆ་ཚང་གསན་གཟིགས་གནང་སྟབས་རྒྱ་ཆེ་མང་ཚོགས་དང་སྒོས་སུ་ཕྱོགས་མཐའི་ལྷ་མོ་ཚོགས་པ་ཡོངས་ལ་མུ་མཐུད་ལྷ་མོའི་སྒྱུ་རྩལ་རྒྱུན་སྐྱོང་གནང་རྒྱུར་བློ་སྐྱེད་དང་སེམས་ཤུགས་འཕར་མ་བསྐྱེད་ཡོད།
ཐེངས་འདིའི་བོད་ཀྱི་ཞོ་སྟོན་རྒྱས་པའི་ཆེད་དུ་ཀུན་བདེ་གླིང་བླ་བྲང་ནས་ཧིན་སྒོར་འབུམ་གཅིག་དང་། ཨ་རི་ལྕགས་ཟམ་ལྷ་མོའི་གླུ་གར་ཚོགས་པ་ནས་ཨ་སྒོར་ ༡༥༠༠། ཨ་རི་ལྕགས་ཟམ་པའི་འགན་འཛིན་ཚེ་རིང་དབང་མོ་ལགས་ནས་ཧིན་སྒོར་འབུམ་གཅིག་ཞབས་འདེབས་གནང་ཡོད་པ་མ་ཟད། གདན་ས་ཆོས་སྒར་གཙོས་རྒྱ་ཆེ་མང་ཚོགས་ནས་རང་ནུས་གང་ལྕོགས་ཀྱིས་ཞལ་འདེབས་རྒྱ་མི་ཆུང་བ་ཞིག་གནང་ཡོད།
སྤྱིར་ཕྱི་ལོ་ ༡༩༩༣ ནས་བོད་ཀྱི་ཞོ་སྟོན་རྒྱས་པ་ཐོག་མར་འགོ་བཙུགས་ཏེ་ད་བར་ཞོ་སྟོན་དུས་ཆེན་ཐེངས་ཉེར་དྲུག་བར་སླེབས་ཡོད། ད་ལན་བོད་ཀྱི་ཞོ་སྟོན་ཐོག་ཕྱོགས་མཐའི་ལྷ་མོ་ཚོགས་པ་ཁག་བཅུ་གཅིག་མཉམ་ཞུགས་གནང་ཐུབ་པ་ནི་ད་བར་ཞོ་སྟོན་ནང་ལྷ་མོ་ཚོགས་པ་མཉམ་ཞུགས་གནང་མཁན་མང་ཤོས་ཆགས་ཡོད། བོད་ཀྱི་ཞོ་སྟོན་རྒྱས་པ་ཐེངས་ཉེར་དྲུག་པ་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་ཚོགས་པ་དང་། མོན་གྷོ་གཞིས་སྤྱི་ལྷ་མོ་ཚོགས་པ་དབུ་བརྙེས་ནས་མི་ལོ་ཉེར་ལྔ་ཧྲིལ་པོ་འཁོར་བའི་དུས་ཆེན་བཀྲ་ཤིས་གཉིས་བརྩེགས་ཁེལ་ཡོད་པས་རྒྱ་ཆེ་མང་ཚོགས་ནས་ཞོ་སྟོན་དུས་ཆེན་དགའ་སྤྲོའི་ངང་ནས་དགའ་བསུ་ཞུས་གནང་ཡོད། བོད་ཀྱི་ཟློས་གར་ཚོགས་པའི་འཁྲབ་སྟོན་འགན་འཛིན་ལས་རོགས་བསྟན་འཛིན་ཕུན་ཚོགས་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་ཡོད་པ་བཅས། །
