༄༅། །ཕྱི་ལོ་ ༢༠༢༣ ཟླ་བ་ ༣ ཚེས་ ༡༧ ཉིན་ཨོསྟྲེ་ལི་ཡཱ་སྐུ་ཚབ་དོན་གཅོད་ཀརྨ་སེང་གེ་ལགས་དབུ་བཞུགས་ཐོག་ཨོ་གླིང་རྒྱལ་ཡོངས་བོད་ཀྱི་རྐང་རྩེད་སྤོ་ལོ་རུ་ཁག་གཞུང་འབྲེལ་ཐོག་དབུ་འབྱེད་གནང་ཡོད་པ་དང་། ཨོ་གླིང་རྒྱལ་ཡོངས་བོད་ཀྱི་རྐང་རྩེད་སྤོ་ལོ་རུ་ཁག་ཐེངས་དང་པོ་འདི་ལོ་ཕྱི་ཟླ་ ༦ ནང་བཞུགས་སྒར་རྡ་སར་༸རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་རྐང་རྩེད་སྤོ་ལོའི་འགྲན་བསྡུར་ཚུགས་སྐབས་མཉམ་ཞུགས་གནང་གཏན་ཁེལ་ཡོད།

ཨོ་གླིང་རྒྱལ་ཡོངས་བོད་ཀྱི་རྐང་རྩེད་སྤོ་ལོ་རུ་ཁག་དབུ་འབྱེད་མཛད་སྒོར་ཨོསྟྲེ་ལི་ཡཱ་སྐུ་ཚབ་དོན་གཅོད་ཀརྨ་སེང་གེ་ལགས་དང་། ཨོསྟྲེ་ལི་ཡཱའི་གྲོས་ཚོགས་འཐུས་མི་ཇམ་སི་ (James Griffin) ལགས། བྱང་མཚོ་ངོགས་གྲོང་སྡེ་ལྷན་ཁང་གི་སྤྱི་ཁྱབ་པ་མ་ཡི་ཀེལ་རེ་གྷན་ (Michael Regan) ལགས། ཨོ་གླིང་རྒྱལ་ཡོངས་བོད་ཀྱི་རྐང་རྩེད་སྤོ་ལོ་རུ་ཁག་གི་རུ་དཔོན་འཇིགས་མེད་ལགས། ཨོ་གླིང་རྒྱལ་ཡོངས་བོད་རིགས་སྤྱི་མཐུན་ཚོགས་པའི་ཚོགས་གཙོ་སྐལ་བཟང་ཚེ་རིང་ལགས། སིཌ་ནི་བོད་རིགས་མཐུན་ཚོགས་ཀྱི་ཚོགས་གཙོ་རྔ་བ་ཆོས་འཛིན་ལགས། འཕྲོད་བསྟེན་ཞབས་ཞུ་ (Multicultural Health Service) ཁང་གི་སྐུ་ཚབ་བློ་བཟང་སྒྲོལ་མ་ལགས། གསར་འགྱུར་བརྒྱུད་ལམ་ཚན་པའི་ (Bondi Rocks Media) ངེས་སྟོན་པ་མར་ཀི་གྷོལ་ཌི་ (Mark Gould) ལགས། ཨོ་གླིང་རྒྱལ་ཡོངས་བོད་ཀྱི་རྐང་རྩེད་སྤོ་ལོ་རུ་ཁག་གི་སྦྱོང་ཁྲིད་པ་གཙོ་བོ་བྷིར་ཌི་པལ་མར་ (Brad Palmer) ལགས། སིཌ་ནི་བོད་རིགས་མཐུན་ཚོགས་ཀྱི་དྲུང་ཆེ་མིག་དམར་ཚེ་རིང་ལགས། དེ་བཞིན་སྦྱིན་བདག་དང་རྒྱབ་སྐྱོར་བ་རྣམ་པ་བཅས་མི་གྲངས་ ༥༠ ལྷག་མཉམ་ཞུགས་གནང་ཡོད།ཨོ་གླིང་རྒྱལ་ཡོངས་བོད་ཀྱི་རྐང་རྩེད་སྤོ་ལོ་རུ་ཁག་དབུ་འབྱེད་མཛད་སྒོའི་སྐུ་མགྲོན་གཙོ་བོ་བོད་མིའི་གྲོགས་པོ་དང་ཨོསྟྲེ་ལི་ཡཱའི་རྐང་རྩེད་སྤོ་ལོ་བ་གྲགས་ཅན་ཁི་རག་ཧྥོ་སི་ཊར་ (Craig Foster AM) ལགས་ལས་བྲེལ་གྱི་རྐྱེན་པས་དབུ་འབྱེད་མཛད་སྒོར་ཕེབས་ཐུབ་མེད།   དབུ་འབྱེད་མཛད་སྒོར་ཨོ་གླིང་རྒྱལ་ཡོངས་བོད་ཀྱི་རྐང་རྩེད་སྤོ་ལོ་རུ་ཁག་གི་སློབ་སྟོན་པའི་གྲས་ཁེ་ཐི་བྷུ་ལེར་ (Cathy Butler) ལགས་ཀྱིས་ཕྱི་ལོ་ ༢༠༢༢ ལོའི་ཨོ་གླིང་གཞོན་སྐྱེས་ཆིག་སྒྲིལ་རྐང་རྩེད་སྤོ་ལོ་འགྲན་བསྡུར་དང་དེའི་གྲུབ་འབྲས་འཕེལ་རིམ་སོགས་ཀྱི་སྐོར་གསུངས་ཡོད། བྱང་མཚོ་ངོགས་གྲོང་སྡེ་ལྷན་ཁང་གི་སྤྱི་ཁྱབ་པ་མ་ཡི་ཀེལ་རེ་གྷན་ལགས་ཀྱིས་ཨོ་གླིང་རྒྱལ་ཡོངས་བོད་ཀྱི་རྐང་རྩེད་སྤོ་ལོ་རུ་ཁག་གི་ལས་གཞིར་རྒྱབ་སྐྱོར་གནང་རྒྱུའི་ཆོད་སེམས་བརྟན་པོ་ཡོད་སྐོར་གསུངས་ཡོད།

ཨོསྟྲེ་ལི་ཡཱ་སྐུ་ཚབ་དོན་གཅོད་ཀརྨ་སེང་གེ་ལགས་ཀྱིས།  ཨོ་གླིང་རྒྱལ་ཡོངས་བོད་ཀྱི་རྐང་རྩེད་སྤོ་ལོ་རུ་ཁག་ལ་དགའ་བསུའི་འཚམས་འདྲི་ཞུས་གནང་པ་དང་འབྲེལ་ཨོ་གླིང་རྒྱལ་ཡོངས་བོད་ཀྱི་རྐང་རྩེད་སྤོ་ལོ་རུ་ཁག་གི་སློབ་སྟོན་པའི་གྲས་ཁེ་ཐི་བྷུ་ལེར་(Cathy Butler) ལགས་ཀྱིས་གཙོས་སློབ་སྟོན་པའི་ཚོགས་མི་ཡོངས་དང་། དེ་བཞིན་སྦྱིན་བདག་དང་རྒྱབ་སྐྱོར་གནང་མཁན་ཡོངས་ལ་ཐུགས་རྗེ་ཆེ་ཞུས་གནང་ཡོད་པ་བཅས།།