ཝེ་ནེ་མར་སི་ཊོན།
༢༠༡༡ ཟླ་ ༡༡ ཚེས་ ༩ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༡༡ ཚེས་ ༢ ཉིན་ཁེ་ཎ་ཌའི་གྲོས་ཚོགས་འོག་མའི་ནང་ཆབ་སྲིད་ཚོགས་པ་བཞི་ཡོད་པའི་ཁོངས་ནས་འཐུས་མི་རེ་རེས་ཁེ་ཎ་ཌའི་གྲོས་ཚོགས་སུ་བོད་མི་ཚོར་རྒྱབ་སྐྱོར་གྱིས་གདུང་སེམས་མཉམ་སྐྱེ་ཞུས་ཡོད། དེ་ཡང་ཐོག་མར་གྲོས་ཚོགས་འཐུས་མི་ལྕམ་སྐུ་ཨེ་ལི་ཛེ་བྷེ་ཐི་མེའི་(Ms.Elizabeth May)མཆོག་གིས་གྲོས་ཚོགས་སུ་གསུང་བཤད་གནང་དོན།
རྒྱ་ནག་གཞུང་གི་སྲིད་བྱུས་འོག་དཀའ་སྡུག་མྱོང་བཞིན་པའི་བོད་མི་ཚོར་རྒྱབ་སྐྱོར་ཞུ་ཆེད་ཁེ་ཎ་ཌར་གནས་སྡོད་བོད་མི་རྣམས་ཀྱིས་བོད་མི་བྱིངས་དང་ལྷན་གདུང་སེམས་མཉམ་སྐྱེ་ཞུ་བཞིན་ཡོད། བོད་མི་ཚོ་དཀའ་ངལ་འོག་འུ་ཐུག་ཐབས་ཟད་ཀྱིས་ད་ཆ་རང་ལུས་མེར་སྲེག་གཏོང་དགོས་པའི་གནས་སྟངས་ཆགས་ཡོད། ནང་ཆོས་ལ་གཞི་བཅོལ་བའི་རིག་གཞུང་དེའི་རྒྱབ་ལྗོངས་ཀྱི་གནས་ཚུལ་སྐོར་ཤེས་རྟོགས་ཡོད་མཁན་ཞིག་ཡིན་ཚེ། བྱ་སྤྱོད་དེ་ཧ་ཅང་འུ་ཐུག་པའི་གནས་སྟངས་ཤིག་ཆགས་ཡོད་པ་ཚོད་དཔག་བྱེད་ཐུབ། བྱ་སྤྱོད་དེ་འདྲ་ཞིག་སྤེལ་དགོས་ཐུག་པ་དེ་ནི་བོད་ནང་གི་གནས་སྟངས་ཧ་ཅང་དཀའ་ངལ་ཡོད་པའི་རྟགས་མཚན་ཡིན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་བོད་ཀྱི་གནད་དོན་དེ་བཞིན་ཞི་བའི་ཐབས་ལམ་གྱི་ཐོག་ནས་སེལ་ཐབས་དགོས་པ་བཀའ་སློབ་སྩལ་ཡོད།
ཨེ་ལི་ཛེ་བྷེ་ཐི།
ཡུ་རོབ་གྲོས་ཚོགས་སུ་ཕྱི་ཟླ་ ༡༠ ཚེས་ ༢༧ ཉིན་རྒྱ་ནག་གིས་བོད་མི་ཚོར་འཛིན་བཞིན་པའི་དམ་བསྒྲགས་ཅན་གྱི་སྲིད་བྱུས་དེ་འཕྲལ་དུ་མཚམས་འཇོག་དགོས་པའི་གྲོས་ཆོད་བཞག་ཡོད། དེར་བརྟེན་ངས་གྲོས་ཚོགས་ཀྱི་འཐུས་མི་ཡོངས་ལ་ཡུ་རོབ་སྤྱི་མཐུན་རྒྱལ་ཁབ་དང་ལག་སྦྲེལ་ཐོག་བོད་མི་ཚོའི་ཆོས་དད་རང་དབང་ལ་སྲུང་སྐྱོབ་ཆེད་རྒྱབ་སྐྱོར་གནང་རོགས་ཞེས་འབོད་སྐུལ་ནན་པོ་ཞུ་རྒྱུ་ཡིན། ཞེས་གསུངས་ཡོད།
དེ་བཞིན་གྲོས་ཚོགས་འཐུས་མི་སྐུ་ཞབས་ཝེ་ནེ་མར་སི་ཊོན་(Mr.Wayne Marston)མཆོག་གིས་གསུང་དོན། ད་ཆ་འཛམ་གླིང་ཁྱོན་ཡོངས་སུ་བོད་མི་དང་བོད་དོན་རྒྱབ་སྐྱོར་བ་ཚོས་བོད་མི་ཚོར་གདུང་སེམས་མཉམ་སྐྱེའི་རྒྱབ་སྐྱོར་ཞུ་བཞིན་ཡོད། བོད་མི་བཅུས་རང་ལུས་མེར་སྲེག་བཏང་སྟེ་རྒྱ་ནག་གཞུང་གིས་དམ་བསྒྲགས་ཅན་གྱི་སྲིད་བྱུས་ལ་ངོ་རྒོལ་བྱས་ཡོད། རྒྱ་ནག་གཞུང་གིས་རྔ་པ་ཙམ་མ་ཟད།
བོད་ས་ཡོངས་ལ་དམ་བསྒྲགས་ཤུགས་ཆེ་བཏང་ཡོད།
གོར་ཌོན་བྷ་རོན།
བོད་པའི་དགོན་སྡེ་ཁག་སྔོག་བཤེར་བྱས་ཏེ་དགེ་འདུན་པ་གང་བྱུང་འཛིན་བཟུང་བྱེད་བཞིན་པ་མ་ཟད། དྲང་བདེན་མིན་པའི་ཁྲིམས་ཆད་གཏོང་བཞིན་པ་དེ་དག་ལ་ང་ཚོའི་སྲིད་གཞུང་གིས་འགུལ་བསྐྱོད་གཏོང་རྒྱུའི་དུས་ལ་བབ་ཡོད། ད་ཆ་ཁེ་ཎ་ཌ་སྲིད་གཞུང་གིས་གོ་སྒྲིག་འོག་རྒྱ་ནག་གཞུང་གིས་བོད་མི་ཚོར་དམ་བསྒྲགས་ཅན་གྱི་སྲིད་བྱུས་ལག་བསྟར་བྱེད་བཞིན་པ་དེར་རྒྱལ་སྤྱིའི་སྒྲིག་འཛུགས་ཀྱིས་སྐྱོན་བརྗོད་ཀྱི་ལས་འགུལ་ཤུགས་ཆེ་ཞིག་གོ་སྒྲིག་བྱ་རྒྱུའི་དུས་ལ་བབས་ཡོད་པ་མ་ཟད། ཁེ་ཎ་ཌའི་སྲིད་གཞུང་གིས་བོད་ནང་འཕྲལ་དུ་ཞིབ་འཇུག་མི་སྣ་གཏོང་དགོས་པ་མཉམ་འབྲེལ་རྒྱལ་ཚོགས་བརྒྱུད་རྒྱ་ནག་གཞུང་ལ་རེ་འདུན་འདོན་དགོས། ང་ཚོས་ད་ཆ་ཉི་མ་གཅིག་ཀྱང་ཕྱིར་འགྱངས་བྱ་མི་འོས་ཞེས་གསུངས། ཕྱོགས་མཚུངས་སྐབས་དེར་སྐུ་ཞབས་ཨིར་ཝིན་ཀོ་ཊི་ལར་མཆོག་གིས་གསུང་དོན། རྒྱ་ནག་གཞུང་གིས་བོད་མི་དགེ་འདུན་པ་དང་བཙུན་མ་རྣམས་ལ་དམ་བསྒྲགས་ཅན་གྱི་སྲིད་བྱུས་དེར་བོད་མི་བཅུས་རང་ལུས་མེར་སྲེག་བཏང་བའི་ལམ་ནས་ངོ་རྒོལ་བྱས་པ་དེ་ནི་དེ་སྔ་བྱུང་མྱོང་མེད་པའི་འུ་ཐུག་གི་བྱ་སྤྱོད་ཅིག་ཡིན། དེར་བརྟེན་ང་ཚོའི་ངོས་ནས་བརྗོད་རྒྱུར་རྒྱ་ནག་གཞུང་གིས་འཛིན་བཟུང་བྱས་པའི་བོད་མི་རྣམས་འཕྲལ་དུ་གློད་བཀྲོལ་གཏོང་དགོས། གང་ཡིན་བརྗོད་ན་བོད་མི་དེ་ཚོར་སོ་སོའི་ཆོས་དད་དང་སྨྲ་བརྗོད་རང་དབང་སྤྲོད་དགོས་པ་ཡིན། དེ་བཞིན་བོད་མི་རྣམས་ལ་དམ་བསྒྲགས་མཚམས་འཇོག་བྱས་ཏེ་བོད་མིའི་དབུ་ཁྲིད་དང་ལྷན་གྲོས་མོལ་དགོས་པའི་རེ་འདུན་བཏོན་པ་ཞིག་ཡིན། ང་ཚོས་ཁེ་ཎ་ཌའི་སྲིད་གཞུང་ལ་འཛམ་གླིང་དབུ་ཁྲིད་ཚོ་དང་གྲོས་མཐུན་ཐོག་བོད་མི་ཚོར་གདུང་སེམས་མཉམ་སྐྱེའི་རྒྱབ་སྐྱོར་གྱིས་རྒྱལ་སྤྱིའི་བོད་དོན་ལས་འགུལ་ཉིན་མོ་འདིར་རྒྱ་ནག་གཞུང་ལ་སྐྱོན་བརྗོད་བྱ་རྒྱུ་མ་ཟད། བོད་མི་ཚོར་སྲུང་སྐྱོབ་ཡོང་ཆེད་རྒྱ་ནག་གཞུང་གིས་བོད་མིའི་དབུ་ཁྲིད་དང་ལྷན་གྲོས་མོལ་དགོས་པའི་རེ་འདུན་འདོན་དགོས་པའི་འབོད་སྐུལ་ཞུ་རྒྱུ་ཡིན་ཞེས་གསུངས།
ཨིར་ཝིན་ཀོ་ཊི་ལར།
ཡང་སྐབས་དེར་གྲོས་ཚོགས་ཀྱི་འཐུས་མི་སྐུ་ཞབས་གོར་ཌོན་བྷ་རོན་(Mr.Gordon Brown)མཆོག་གིས་གསུང་དོན། དེ་རིང་བོད་མི་དང་བོད་མིར་རྒྱབ་སྐྱོར་གནང་མཁན་ཚོས་རྒྱ་ནག་གཞུང་གིས་བོད་མིའི་ཆོས་དད་རང་དབང་ལ་དམ་བསྒྲགས་བྱ་རྒྱུ་དེ་མཚམས་འཇོག་དགོས་པའི་ཛ་དྲག་གི་འབོད་སྐུལ་བྱེད་བཞིན་ཡོད། ཁེ་ཎ་ཌ་སྲིད་གཞུང་གིས་ད་ལྟ་བོད་ནང་རྒྱ་ནག་གཞུང་གིས་བོད་མི་ཚོའི་ཆོས་དད་དང་སྨྲ་བརྗོད། འདུ་འཛོམས་སོགས་ཀྱི་རང་དབང་ཐོག་དམ་བསྒྲགས་བྱེད་བཞིན་པ་དེར་སེམས་འཚབ་ཧ་ཅང་ཤུགས་ཆེ་ཡོད་སྐོར་བརྗོད་པ་དང་སྦྲགས། རྒྱ་ནག་ནང་འགྲོ་བ་མིའི་ཐོབ་ཐང་གི་གནས་སྟངས་ལ་སེམས་འཚབ་ཀྱི་རྣམ་པ་བསྟན་ནས་གསུང་དོན། ང་ཚོས་བོད་ནང་རྒྱ་ནག་གཞུང་གིས་བོད་མི་ཆབ་སྲིད་བཙོན་པ་རྣམས་བཙན་དབང་འོག་འཛིན་བཟུང་བཀག་ཉར་བྱེད་བཞིན་པ་མ་ཟད། བཙོན་ཁང་ནང་བོད་མི་དེ་དག་ལ་ཁྲིམས་གཅོད་གང་འདྲ་གཏོང་བཞིན་ཡོད་མེད་ཐོག་སེམས་འཚབ་ཧ་ཅང་ཡོད། དེར་བརྟེན་རྒྱལ་སྤྱི་དང་མཉམ་འབྲེལ་རྒྱལ་ཚོགས། དེ་བཞིན་ཁེ་ཎ་ཌ་དང་རྒྱ་ནག་གཞུང་འབྲེལ་ལྷན་ཚོགས་སྐབས་སུ་བོད་དང་རྒྱ་ནག་གི་ཆོས་བྱེད་གྲངས་ཉུང་མི་རིགས་ཚོའི་གནད་དོན་སྐོར་གླེང་ཡོད།
ང་ཚོའི་སྲིད་གཞུང་གིས་རྒྱ་ནག་དང་འཛམ་གླིང་ཁྱོན་ཡོངས་སུ་ཆོས་དད་རང་དབང་གི་གནད་དོན་དེར་འགན་ལྗིད་པོའི་ཐོག་ནས་ལྟ་བཞིན་ཡོད། ཆོས་དད་རང་དབང་དང་ཆོས་བྱ་རྒྱུའི་ཐོབ་ཐང་གི་གནད་དོན་དེ་དག་ནི་ང་ཚོའི་རྩ་ཁྲིམས་ཀྱི་ཕྱི་འབྲེལ་སྲིད་བྱུས་ཀྱི་ལངས་ཕྱོགས་ནང་ཆེ་མཐོང་ཆེན་པོ་ཞུ་བཞིན་ཡོད་ཅེས་སོགས་གསུངས་ཡོད་པ་བཅས།།
