༢༠༡༡ ཟླ་ ༡༡ ཚེས་ ༩ རེས་གཟའ་ལྷག་པ།
༄༅། །ཨོ་སི་ཊོ་ལི་ཡར་རྟེན་གཞི་བྱས་པའི་རྒྱ་ནག་འགྲོ་བ་མིའི་ཐོབ་ཐང་གི་རྒྱལ་སྤྱིའི་ཡར་འགུལ་ཚོགས་པའི་ངོས་ནས་བོད་ནང་གི་བོད་མི་ཚོས་རྒྱ་ནག་གཞུང་གི་དྲག་སྤྱོད་ལ་ངོ་རྒོལ་གྱི་ལས་འགུལ་སྤེལ་བར་རྒྱབ་སྐྱོར་གནང་བ་དང་ལྷན་རྒྱ་ནག་དམར་ཤོག་གིས་དུས་རབས་ཉི་ཤུའི་ནང་གི་ཇར་མན་གྱི་ན་ཛི་རིང་ལུགས་ལྟར་བོད་ནང་གི་བོད་མི་སོགས་ཀྱི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་གི་ཡོད་པར་བསྐྱོན་བརྗོད་གནང་འདུག
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༡ ཟླ་ ༡༡ ཚེས་ ༧ ཉིན་རྒྱ་ནག་འགྲོ་བ་མིའི་ཐོབ་ཐང་རྒྱལ་སྤྱིའི་ཡར་འགུལ་ཚོགས་པས་གསར་འགོད་གསལ་བསྒྲགས་ཤིག་སྤེལ་ཡོད་པའི་ནང་འཁོད་དོན། རྒྱ་ནག་གཞུང་ནས་བོད་ནང་གི་བོད་མིར་དྲག་གནོན་བྱེད་རྒྱུ་དེ་དག་ངེས་པར་དུ་མཚམས་འཇོག་བྱེད་དགོས་པ་མ་ཟད། དྲག་པོའི་དམག་དཔུང་ཕྱིར་འཐེན་བྱེད་དགོས། འཆམ་མཐུན་གྱི་སྤྱི་ཚོགས་ཤིག་བསྐྲུན་པར་དྲག་གནོན་འོག་ནས་ཡོང་ཐབས་མེད། དཀའ་ངལ་གང་ཞིག་ཡིན་རུང་འཚེ་བ་མེད་པའི་ཐབས་ལམ་བརྒྱུད་ནས་སེལ་དགོས། རྒྱལ་སྤྱིའི་སྤྱི་ཚོགས་ངོས་ནས་བོད་དོན་ཐོག་རྟོག་ཞིབ་དང་ཉན་ཞིབ་ཀྱི་ལས་རིམ་དགོས་པ་དང་། འཛམ་གླིང་མང་གཙོའི་རྒྱལ་ཁབ་ཁག་ནས་རྒྱལ་སྤྱིའི་འགྲོ་བ་མིའི་ཁྲིམས་ཡིག་དང་རྒྱལ་སྤྱིའི་དྲང་བདེན་གྱི་འོས་འགན་འོག་རྒྱ་ནག་གཞུང་ལ་གནོན་ཤུགས་དང་བསྐྱོན་བརྗོད་ངེས་པར་དུ་གནང་དགོས། རྒྱ་ནག་གཞུང་ཕྱོགས་ནས་འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་གཏོང་དགོས་པ་དང་ཆབས་ཅིག་བོད་མིའི་སེམས་རྟེན་དང་འཚོ་གནས་ལ་འགན་ཁུར་བླང་སྟེ་མི་རིགས་རྩ་མེད་བཟོ་རྒྱུའི་སྲིད་བྱུས་ཁག་མཚམས་འཇོག་བྱེད་དགོས། མཐའ་དོན་བོད་མི་རྣམས་ཀྱིས་༸གོང་ས་ཏཱ་ལའི་བླ་མ་མཆོག་གིས་འདོན་གནང་མཛད་པའི་དབུ་མའི་ལམ་གྱི་ཐོག་ཤར་བསྐྱོད་གནང་སྟེ་རང་ཉིད་ཀྱི་ཚེ་སྲོག་ལ་གཅེས་སྤྲད་ཀྱིས་རྒྱལ་སྤྱིའི་སྤྱི་ཚོགས་དང་མང་གཙོ་ཚོགས་པ། དེ་བཞིན་འགྲོ་བ་མིའི་ཐོབ་ཐང་ཚོགས་པ་སོགས་ནས་རྒྱབ་སྐྱོར་འཚོལ་སྒྲུབ་གནང་སྟེ་ཆིག་སྒྲིལ་གྱི་སྟོབས་ཤུགས་ཐོག་རྒྱ་ནག་གཞུང་ལ་མཐའ་གཅིག་ཏུ་ངོ་རྒོལ་གནང་དགོས། ཞེས་འཁོད་ཡོད་པ་བཅས། །