༄༅། །བོད་མིའི་རང་དབང་སྒེར་ལངས་གསུམ་བཅུའི་དུས་དྲན་དང་སྟབས་བསྟུན་རྒྱ་གར་བྱང་ཤར་ཨ་སམ་དུ་རྟེན་གཞི་བྱས་པའི་རྒྱ་གར་བོད་དོན་རྒྱབ་སྐྱོར་ཚོགས་པས་རྩོམ་པ་པོ་ལྕམ་ནོ་ཝི་ཏ་ཤར་མ་ལགས་ཀྱིས་བརྩམས་པའི་བོད་ཀྱི་རང་དབང་། ཨ་སམ་ཀྱི་འབོད་སྒྲ་ཞེས་པའི་དཔེ་དེབ་གྷུ་ཝ་ཧ་ཊིའི་གསར་འགོད་ལྷན་ཚོགས་སུ་དབུ་འབྱེད་གནང་ཡོད། རྩོམ་པ་པོ་ཁོང་ནི་ཨ་སམ་ནང་གི་བོད་དོན་རྒྱབ་སྐྱོར་ཚོགས་པའི་འབྲེལ་མཐུད་པ་ཡིན།

དཔེ་དེབ་འདིའི་ནང་གཙོ་བོ་རྒྱ་གར་བྱང་ཤར་ཁུལ་དུ་བོད་དོན་དང་འབྲེལ་བའི་ལས་འགུལ་ཇི་ལྟར་བརྩམས་དང་རྩོམ་བཞིན་པའི་སྐོར་གསལ་སྟོན་བྱེད་པ་མ་ཟད། དེབ་དེ་ཉིད་རྒྱ་གར་བྱང་ཤར་ཁུལ་དུ་བོད་དོན་དང་འབྲེལ་བའི་དཔེ་དེབ་རྩོམ་འབྲི་དང་པར་སྐུན་བྱེད་པ་ཐོག་མ་ཆགས་ཡོད།དེ་ཡང་བོད་མིའི་རང་དབང་སྒེར་ལངས་ཀྱི་དུས་དྲན་སྲུང་བརྩིའི་མཛད་སྒོའི་ཐོག་མར་བོད་རྒྱལ་ཁབ་ཆེན་པོ་རྒྱལ་གླུ་དབྱངས་སུ་གྱེར་ཞིང་། དེ་རྗེས་དཔེ་དེབ་དབུ་འབྱེད་གནང་ཡོད་པ་དང་། དཔེ་དེབ་དབུ་འབྱེད་ཀྱི་མཛད་སྒོར་སྙན་གྲགས་ཡོད་པའི་མཁས་པ་དང་། གསར་འགོད་པ། སྤྱི་ཚོགས་ལས་འགུལ་བ། སྒྱུ་རྩལ་བ། བོད་དོན་རྒྱབ་སྐྱོར་བ་སོགས་མཉམ་ཞུགས་གནང་ཡོད། སྐབས་དེར་མཁས་དབང་དང་ལས་འགུལ་བ་རྣམས་ནས་བོད་ནང་གི་ཛ་དྲག་གནས་སྟངས་དང་། བོད་དང་རྒྱ་གར་བར་གྱི་འབྲེལ་ལམ། བོད་ཀྱི་རང་དབང་དང་རྒྱ་གར་གྱི་བདེ་འཇགས་སོགས་ཀྱི་སྐོར་གསུང་བཤད་དང་བགྲོ་གླེང་གནང་ཡོད་པ་བཅས།།