༠༨།༧།༡༡
རྒྱ་གཞུང་གིས་བརྒྱད་གཅིག་ཏུ་ལི་ཐང་རྟ་རྒྱུགས་དུས་ཆེན་འཚོག་གཏན་འཁེལ་བ། ཕྱི་ཟླ་ ༧ ཚེས་ ༤ ཡས་མས་སུ་ཁམས་ལི་ཐང་རྫོང་ཁོངས་སུ་རྫོང་དམར་ཤོག་ཚོགས་པའི་དྲུང་ཆེ་དང་། རྫོང་དཔོན། སྤྱི་བདེ་ཉེན་རྟོག་པའི་འགོ་གཙོ་བཅས་མཐོ་རིམ་འབྲེལ་ཡོད་ཁག་ཅིག་ནས་ནང་དོན་ཚོགས་འདུ་ཞིག་འཚོགས་ཡོད་འདུག ཚོགས་འདུར་ཟླ་བ་ ༨ ཚེས་ ༡ ཉིན་ལི་ཐང་དུ་རྟ་རྒྱུགས་དུས་ཆེན་འཚོག་རྒྱུ་དང་། སྐབས་དེར་ལི་ཐང་ཁུལ་དུ་དམག་མི་ཁྱོན་ཆེ་འབྱོར་རྒྱུ་ཡིན་པར་སྣེ་ལེན་ཞུ་ཕྱོགས་སོགས་ཀྱི་སྐོར་གྲོས་སྡུར་བྱས་འདུག སྔ་ལོའི་ལི་ཐང་བརྒྱད་གཅིག་རྟ་རྒྱུགས་དུས་ཆེན་སྐབས་སུ་ངོ་རྒོལ་གྱི་ལས་འགུལ་ཤུགས་ཆེ་བྱུང་བར་བརྟེན། འདི་ལོར་ཐོག་མའི་འཆར་གཞི་ལྟར་བྱས་ན་རྟ་རྒྱུགས་དུས་ཆེན་བཀག་འགོག་བྱ་སྲིད་པའི་གནས་ཚུལ་བྱུང་ཡོད་ཀྱང་། རྒྱ་གཞུང་འབྲེལ་ཡོད་ཚན་པས་དེ་ལྟར་བྱས་ཚེ། ཁ་བྲལ་རིང་ལུགས་པ་ཚོར་རྒྱལ་ཁ་ཐོབ་པར་ངོས་འཛིན་བྱ་སྲིད་པས། དེ་ལས་དམག་མི་ཁྱོན་ཆེ་འགྲེམས་འཇོག་ཐོག་ཕྱི་ཕྱོགས་སུ་བོད་མི་རྣམས་ཡར་རྒྱས་ཕྱིན་པའི་དྲིལ་བསྒྲགས་ཀྱི་ལག་ཆ་ཞིག་ཏུ་བེད་སྤྱོད་བྱ་རྒྱུར་འདི་ལོར་རྟ་རྒྱུགས་དུས་ཆེན་འཚོག་གཏན་འཁེལ་ཡོད་འདུག
དཀར་མཛེས་དགོན་གྱི་དགེ་བསྐོས་ལས་གནས་ནས་མར་ཕབ་པ། ཕྱི་ཟླ་ ༧ ཚེས་ཤར་ཙམ་དུ་དཀར་མཛེས་རྫོང་ཁོངས་དཀར་མཛེས་དགོན་གྱི་དགེ་བསྐོས་དངོས་གྲུབ་ཕུན་ཚོགས་ལགས་རྒྱ་གཞུང་འབྲེལ་ཡོད་ཚན་པས་བཙན་ཤེད་ཀྱིས་དགེ་བསྐོས་ཀྱི་ལས་གནས་ནས་མར་ཕབ་ཡོད་འདུག གནས་ཚུལ་དེའི་འབྱུང་རྐྱེན་གཙོ་བོ་ནི། ཁོང་དགེ་བསྐོས་ཀྱི་ལས་ཐོག་རིང་བོད་ས་ཡོངས་ལ་རྒྱ་གཞུང་གིས་ཁྲག་དྲི་བྲོ་བའི་དྲག་གནོན་བྱས་ཏེ་བོད་མི་བརྒྱ་ཕྲག་ལྷག་རྐྱེན་འདས་སོང་བ་དང་རྨས་སྐྱོན་ཕོག་པ་བཅས་ཀྱི་ཆེད་དུ་དམིགས་ཏེ་དཀར་མཛེས་དགོན་གྱི་དགེ་འདུན་པ་ཚོས་སྨོན་ལམ་འཚོགས་ཡོད་པ་དང་། ཁོང་ནས་གྲྭ་མང་ལ་ཐུགས་སྨོན་སྐྱབས་འཇུག་གནང་དགོས་སྐོར་གསུངས་ཡོད་པ། ལས་དོན་རུ་ཁག་ནས་དགོན་པར་རྒྱ་མིའི་རྒྱལ་དར་སྒྲེང་འཛུགས་བྱ་འཆར་ལ་ཁོང་ནས་ངོ་རྒོལ་གྱི་རྣམ་འགྱུར་བསྟན་པ་སོགས་ལ་བརྟེན་ནས་ཡིན་པ་རེད་འདུག
