༄༅། །ཉི་འོང་བོད་མི་དང་བོད་རང་བཙན་སློབ་ཕྲུག་ཚོགས་པའི་ས་གནས་ཡན་ལག་བཅས་ནས་ཉི་འོང་གི་རྒྱལ་ས་ཊོག་ཡོར་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༤ སྲུང་བརྩིའི་མཛད་སྒོ་དང་ཞི་བའི་གོམ་བགྲོད་གོ་སྒྲིག་གནང་ཡོད་པ་རེད།
དེ་ཡང་དུས་དྲན་དང་འབྲེལ་བའི་གསུང་བཤད་ལས་རིམ་ཞིག་གོ་སྒྲིག་གནང་བའི་ཐོག་མར་བོད་བསྟན་སྲིད་མི་རིགས་ཆེད་ལུས་སྲོག་བློས་གཏོང་གནང་མཁན་རྒྱལ་གཅེས་པ་རྣམས་ལ་གུས་འདུད་མཚོན་ཆེད་ངག་བཅད་མྱ་ངན་སྐར་མ་གཅིག་རིང་གནང་རྗེས་ཉི་འོང་བོད་རིགས་ཚོགས་པའི་ཚོགས་གཙོ་བསྟན་འཛིན་ཤེས་རབ་ལགས་ཀྱིས་ཚོགས་བཅར་བ་རྣམས་ལ་ཕེབས་སུ་དང་བོད་དོན་ལ་རྒྱབ་སྐྱོར་གཡོ་མེད་གནང་བར་ཐུགས་རྗེ་ལེགས་འབུལ་ཞུས་པ་ཆབས་ཅིག་ཚོགས་པའི་བསྒྲགས་གཏམ་སྒྲོགས་སྦྱང་གནང་།
དེ་རྗེས་ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཚོགས་བཅར་བ་རྣམས་ནས་བོད་དོན་ལ་མུ་མཐུད་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་སྦྲགས། ཉི་འོང་སྐད་ནང་བཀའ་ཤག་གི་གསུང་འཕྲིན་སྒྲོགས་སྦྱང་གནང་། དེ་བཞིན་ཁོང་གིས་བོད་ལ་ཁྱེད་ཀྱི་རོགས་སྐྱོར་དགོས། ཞེས་པའི་དཔེ་དེབ་དབུ་འབྱེད་དང་འགྲེམས་སྤེལ་གནང་ཞིང་། དཔེ་དེབ་དེའི་ནང་རྒྱ་ནག་གཞུང་གིས་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་བརྒྱུད་བོད་ཀྱི་རིག་གཞུང་རྩ་མེད་བཟོ་འཆར་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་བོད་ཀྱི་བླ་སྤྲུལ་རྣམ་པའི་ཡང་སྲིད་ངོས་འཛིན་བྱེད་ཕྱོགས་ལ་ཐེ་བྱུས་བྱེད་ཚུལ་ཞིབ་ཕྲ་འགྲེལ་བརྗོད་བྱས་ཡོད།
གཞན་ཡང་ཁོང་གིས་ཉི་འོང་ནང་པའི་དགེ་འདུན་ལྷན་ཚོགས་ནས་རྒྱ་གཞུང་གི་བོད་བརྒྱུད་ནང་བསྟན་གྱི་བླ་སྤྲུལ་ངོས་འཛིན་ལ་ཐེ་བྱུས་བྱེད་པར་སྐྱོན་བརྗོད་ཀྱི་བསྒྲགས་གཏམ་སྤེལ་བར་ཐུགས་རྗེ་ལེགས་འབུལ་ཞུས་པ་མ་ཟད། དེ་མཚུངས་ཉི་འོང་བོད་དོན་རྒྱབ་སྐྱོར་ཚོགས་པ་དང་། ཉི་འོང་ནང་པའི་ལྷན་ཚོགས་ནས་རྒྱ་ནག་གཞུང་གིས་བོད་ནང་གི་བོད་མིའི་ཆོས་དད་རང་དབང་དང་། འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་གཏོང་བཞིན་པར་སྐྱོན་བརྗོད་གནང་བར་བཀའ་དྲིན་རྗེས་དྲན་ཞུས། དེ་ལྟར་ཁོང་གིས་རྒྱ་ནག་གི་དྲག་གནོན་མཚམས་འཇོག་དང་བོད་ཀྱི་རིག་གཞུང་སྲུང་སྐྱོབ་ཆེད་ཉི་འོང་གྲོས་ཚོགས་འཐུས་མི་རྣམ་པ་དང་། གཞུང་ཁོངས་མིན་པའི་ཚོགས་པ་སོགས་ནས་དེ་མཚུངས་ཀྱི་བསྒྲགས་གཏམ་སྤེལ་དགོས་པའི་རེ་སྐུལ་ཞུས་ཡོད་པ་རེད།
བོད་རང་བཙན་སློབ་ཕྲུག་ཚོགས་པའི་ཉི་འོང་ཡན་ལག་གི་ཚོགས་མི་ཚེ་རིང་རྡོ་རྗེ་ལགས་ཀྱིས་རྒྱ་གཞུང་གིས་བོད་ཕྲུག་རྣམས་བཙན་པོ་དབང་ཡོད་ཀྱིས་མི་སེར་སྤེལ་ཡུལ་གྱི་གཏན་འཇགས་སློབ་གྲྭར་སློབ་འཇུག་བྱེད་བཞིན་པ་དང་། བྱ་ལུགས་དེ་ནི་བོད་ཕྲུག་རྣམས་ཀྱི་ཕ་སྐད་སྦྱང་སྤྱོད་ཀྱི་རང་དབང་འཕྲོག་པ་ཡིན་ཞེས་གསུངས། དེ་ལྟར་ཉི་འོང་དགེ་འདུན་ལྷན་ཚོགས་ཀྱི་ཚོགས་མི་ཏ་རོ་ཀ་མི་ཊ་ལགས་ཀྱིས་ཚོགས་པའི་བསྒྲགས་གཏམ་ལྗགས་ཀློག་གནང་ཞིང་། བསྒྲགས་གཏམ་ནང་གཙོ་བོ་རྒྱ་ནག་གཞུང་ལ་བོད་ཀྱི་བླ་སྤྲུལ་རྣམ་པའི་ཡང་སྲིད་ངོས་འཛིན་གནང་ཕྱོགས་ལ་ཐེ་བྱུས་བྱེད་རྒྱུའི་ཐོབ་ཐང་མེད་ཅེས་གསལ་བཤད་གནང་ཡོད།
གསུང་བཤད་ལས་རིམ་གྲུབ་རྗེས་བོད་མི་དང་། ཉི་འོང་། ཡུ་གུར། ལྷོ་སོག རྒྱ་རིགས་བོད་དོན་རྒྱབ་སྐྱོར་བ་བརྒྱ་ལྷག་གིས་ཞི་བའི་རྔམ་སྟོན་ཁྲོམ་སྐོར་གནང་བཞིན་རྒྱ་ནག་གཞུང་ཚབ་ཁང་ཕྱོགས་སུ་མདུན་སྐྱོད་བྱས་ཏེ་བོད་མིའི་རང་དབང་དང་། འགྲོ་བ་མིའི་ཐོབ་ཐང་། ཆོས་དད་རང་དབང་དགོས་སྐོར་སྐད་འབོད་ཤུགས་ཆེ་གནང་བ་མ་ཟད། བོད་ནང་རྒྱ་གཞུང་གི་དྲག་གནོན་འཕྲལ་དུ་མཚམས་འཇོག་དགོས་པའི་ཞུ་ཡིག་དང་། བཀའ་ཤག་གི་གསུང་འཕྲིན་བཅས་གཞུང་ཚབ་ཁང་གི་ཡིག་སྣོད་དུ་བླུགས་ཡོད་པ་བཅས།།
