༄༅། །ཕྱི་ལོ་ ༢༠༢༣ ཟླ་བ་ ༠༣ ཚེས་ ༠༩ ཉིན་ཨི་ཊ་ལཱིའི་གྲོས་ཚོགས་གོང་མའི་ཚོགས་ཁང་དུ་ཨི་ཊ་ལཱི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་ཡོད་པ་རེད།

དེ་ཡང་གོང་ཚེས་ཉིན་གྲོས་ཚོགས་གོང་མའི་ཚོགས་ཁང་དུ་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་དང་། སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས། ཕྱོགས་བཞུགས་སྤྱི་འཐུས་ཐུབ་བསྟན་རྒྱ་མཚོ་ལགས་ལྷན་ཞུགས་ཐོག་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་འབྲེལ་མཐུད་པ་གྲོས་ཚོགས་གོང་མའི་འཐུས་མི་ཊི་པ་རི་ཡ་མོ་ཨན་ཊི་ཡ་ (De Priamo Andrea) མཆོག་དང་། གྲོས་ཚོགས་གོང་མའི་འཐུས་མི་ཊར་ཛི་ཊི་སེན་ (Terzi di Sant´Agata Giulio) མཆོག གྲོས་ཚོགས་འོག་མའི་འཐུས་མི་མ་ལ་ཝ་སི་ཨི་ལི་ན་ (Malavasi Ilenia) མཆོག གྲོས་ཚོགས་གོང་མའི་འཐུས་མི་ཊོ་མི་ནི་ཀ་སི་པི་ནལ་ (Domenica Spinelli) མཆོག ཚོགས་པའི་འབྲེལ་མཐུད་པ་ཟུར་པ་ལུ་སེ་ནོ་ནོ་བེལ་(Luciano Nobil) མཆོག་བཅས་ཀྱིས་ཨི་ཊ་ལཱི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་གསར་འཛུགས་ཀྱི་གསར་འགོད་གསལ་བསྒྲགས་གནང་བ་མ་ཟད། ཕྱི་ཟླ་ ༠༣ ཚེས་ ༡༠ ཉིན་ཨི་ཊ་ལཱིའི་རྒྱལ་ས་རོམ་དུ་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་སྲུང་བརྩིའི་སྐོར་གྱི་གསལ་བསྒྲགས་ཀྱང་བསྐྱངས་ཡོད།གསར་འགོད་གསལ་བསྒྲགས་ཀྱི་ཐོག་མར་ཨི་ཊ་ལཱི་བོད་ཚོགས་ཀྱི་ཚོགས་གཙོ་ཀ་ལའུ་ཊི་ཀར་ཊེལ་ (Claudio Cardelli) ལགས་དང་ཨི་ཊ་ལཱི་བོད་རིགས་ཚོགས་པའི་ཚོགས་གཙོ་ཚེ་བརྟན་ལགས་ཀྱིས་ཕེབས་བསུ་ཞུས་གྲུབ་མཚམས་ཨི་ཊ་ལཱི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་འབྲེལ་མཐུད་པ་ཊི་པ་རི་ཡ་མོ་ཨན་ཊི་ཡ་མཆོག་གིས་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་དེའི་གལ་གནད་དང་། དེ་སྔའི་ཚོགས་པའི་ལས་དོན་རྒྱུན་སྐྱོང་གནང་རྒྱུ་ཡིན་སྐོར་འགྲེལ་བརྗོད་གནང་བ་མ་ཟད། ཕྱོགས་མཚུངས་ཁོང་གིས་གྲོས་ཚོགས་ནང་དུ་བོད་དོན་དང་འབྲེལ་བའི་ཁྲིམས་འཆར་གཏན་འབེབས་དང་། གྲོས་ཚོགས་ནང་བོད་ནང་གི་གནས་སྟངས་གསལ་བཤད་གནང་རྒྱུའི་འབད་རྩོལ་ཞུ་རྒྱུ་ཡིན་པ་གསུངས། དེ་ལྟར་གྲོས་ཚོགས་འཐུས་མི་གཞན་རྣམས་ནས་ཀྱང་རྒྱ་ནག་གི་དབང་བསྒྱུར་འོག་བོད་ནང་གི་གནས་སྟངས་ཛ་དྲག་ཅན་དུ་འགྱུར་བཞིན་ཡོད་སྐོར་ངོ་སྤྲོད་གནང་ཡོད་པ་རེད།

སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་ཨི་ཊ་ལཱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་གསར་འཛུགས་ཐུབ་པར་བསྔགས་བརྗོད་དང་ཐུགས་རྗེ་ལེགས་འབུལ་ཞུས་པ་དང་ཆབས་ཅིག ཚོགས་བཅར་བ་རྣམས་ལ་བོད་མིའི་རང་དབང་སྒེར་ལངས་ཀྱི་རྒྱབ་ལྗོངས་གནས་ཚུལ་དང་། ད་ལྟའི་བོད་ནང་གི་ཛ་དྲག་གནས་སྟངས་སྐོར་ངོ་སྤྲོད་གནང་ཡོད།

མཛད་སྒོའི་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས་བོད་ནང་གི་གནས་སྟངས་ཇེ་སྡུག་ཏུ་འགྲོ་བཞིན་པ་དང་། རྒྱ་ནག་དམར་ཤོག་གཞུང་གིས་འཆར་གཞི་ལྡན་པའི་ཐོག་བོད་ཀྱི་ཆོས་དང་རིག་གཞུང་། སྐད་ཡིག་ངོ་བོ་དང་བཅས་པ་རྩ་མེད་གཏོང་བཞིན་ཡོད་སྐོར་འགྲེལ་བརྗོད་དང་། དེ་མཚུངས་ཁོང་མོས་རྒྱ་གཞུང་གི་ལྟ་རྟོག་སྟངས་འཛིན་འོག་ཡོད་པའི་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་ཁག་ཏུ་བོད་ཕྲུག་ས་ཡ་གཅིག་ལྷག་སློབ་འཇུག་གིས་བོད་ཀྱི་རིག་གཞུང་རྒྱ་ནག་ཅན་དུ་སིམ་ཡལ་གཏོང་ཐབས་རྩོམ་བཞིན་པར་ཐུགས་འཚབ་ཆེན་པོ་བསྟན་པ་མ་ཟད། མཉམ་འབྲེལ་རྒྱལ་ཚོགས་ནས་དེ་དོན་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་ཞིབ་འཇུག་འཐུས་གཙང་གནང་དགོས་པའི་རེ་སྐུལ་ཞུས་ཡོད། དེ་བཞིན་ཚོགས་གཞོན་མཆོག་གིས་བོད་མཐོ་སྒང་གི་ཁོར་ཡུག་གི་གལ་གནད་དང་། རྒྱ་ནག་གཞུང་གིས་གཏེར་ཁ་སྔོག་འདོན་དང་ཆུ་མཛོད་གསར་རྒྱག་སོགས་ལ་བརྟེན་ནས་ཁོར་ཡུག་ལ་དོ་ཕོག་ཆེན་པོ་གཏོང་གི་ཡོད་པས་རྒྱལ་སྤྱིའི་མི་མང་ནས་རྒྱ་ནག་གཞུང་ལ་གནོན་ཤུགས་སྤྲོད་དགོས་པའི་འབོད་སྐུལ་ཡང་གནང་ཡོད་པ་རེད།

ཕྱོགས་བཞུགས་སྤྱི་འཐུས་ཐུབ་བསྟན་རྒྱ་མཚོ་ལགས་ཀྱིས་ལོ་རྒྱུས་ཐོག་ནས་བོད་དེ་རང་དབང་རང་བཙན་ཡོད་པའི་རྒྱལ་ཁབ་ཅིག་ཡིན་པ་དང་། རྒྱ་ནག་གཞུང་གི་བོད་ས་བཙན་བཟུང་བྱས་པའི་གནད་དོན་དེ་དུས་ད་ལྟའང་ཐག་ཆོད་མེད་པའི་རྒྱལ་སྤྱིའི་དཀའ་རྙོག་ཅིག་རེད་ཅེས་སོགས་གསུངས།

མཛད་སྒོའི་ཐོག་གཞན་ཡང་ཨི་ཊ་ལཱིའི་ནང་པའི་མཐུན་ཚོགས་ཀྱི་ཚོགས་གཙོ་ཨི་སི་ཀེ་ན་ཧྤི་ལི་པོ་ (Scianna Fillippo) ལགས་ནས་ཀྱང་བོད་བརྒྱུད་ནང་བསྟན་གྱི་གལ་གནད་དང་། བོད་ནང་གི་བོད་མིའི་ཆོས་དད་རང་དབང་ལ་རྒྱ་ནག་གཞུང་གི་འགོག་རྐྱེན་བཟོ་བཞིན་པའི་སྐོར་ངོ་སྤྲོད་གནང་ཡོད་པ་བཅས།།