༄༅། །འདི་གར་བལ་ཡུལ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། བོད་ཆུ་མོ་ཡོས་ལོའི་བོད་ཟླ་ ༡ ཚེས་ ༡༦ དང་ཕྱི་ལོ་ ༢༠༢༣ ཟླ་བ་ ༣ ཚེས་ ༨ ཉིན་བལ་ཡུལ་གནས་ཆེན་འཕགས་པ་ཤིང་ཀུན་གྱི་ཉེ་འགྲམ་དུ་གནས་ཆགས་པའི་གཡུང་དྲུང་བོན་གྱི་གདན་ས་ཆེན་མོ་དཔལ་ལྡན་ཁྲི་བརྟན་ནོར་བུ་རྩེའི་སྐབས་ ༡༢ པའི་བཀའ་རམས་དགེ་བཤེས་གྲངས་ ༡༦ སློབ་མཐར་སོན་ཏེ་དགེ་བཤེས་ཀྱི་མཚན་རྟགས་འབུལ་བཞེས་མཛད་སྒོ་ལེགས་གྲུབ་བྱུང་བ་དང་། མཛད་སྒོའི་ཐོག་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་སྐུ་ཚབ་ཏུ་བལ་དོན་རྩིབས་རི་ལོ་པཎ་སྤྲུལ་སྐུ་ངག་དབང་མཆོག་གྲུབ་ལགས་སྐུ་མགྲོན་གཙོ་བོར་མཉམ་ཞུགས་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཚུ་ཚོད་ ༩ ཐོག་ཚན་པའི་བསྟར་ཕྲེང་དང་དུང་རྒྱ་སྤོས་སྣེ་དྲངས་ཏེ་༸སྐྱབས་རྗེ་མཁན་སློབ་རྣམ་པ་དང་། བཀའ་རམས་པ་གྲངས་བཅུ་དྲུག་བཅས་གཙུག་ལག་ཁང་དུ་གདན་ཞུས་ཐོག་རང་རང་གི་བཞུགས་གདན་དུ་འཁོད་རྗེས་འདུས་མང་ནས་ཚོགས་འདོན་གསུངས་ཏེ་ཐུན་མོང་བཀྲ་ཇ་འབྲས་སིལ་འདེགས་འབུལ་དང་འབྲེལ་བཀའ་རམས་པ་རྣམས་ཀྱི་བཀྲ་ཤིས་དམ་བཅའ་བཞུགས།
མཛད་རིམ་ལྟར་༸སྐྱབས་རྗེ་མཁན་སློབ་སོགས་ནས་དགེ་བཤེས་ཀྱི་མཚན་རྟགས་དང་ཕྱག་འཁྱེར་སོགས་གནང་རྗེས་མཁན་སློབ་དབུ་བླ་དང་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་སྐུ་ཚབ་བཅས་ནས་རྟེན་འབྲེལ་ལེགས་མཚོན་དང་བཀྲ་ཤིས་པའི་མགུལ་དར་བཅས་གནང་། དེ་རྗེས་༸སྐྱབས་རྗེ་མཁན་ཆེན་ལུང་རྟོགས་བསྟན་པ་གཡུང་དྲུང་རིན་པོ་ཆེ་མཆོག་གིས་བཀའ་སློབ་དང་ལོ་རྒྱུས་སོགས་གསུངས། དེ་ནས་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་སྐུ་ཚབ་བལ་ཡུལ་དོན་གཅོད་རྩིབས་རི་ལོ་པཎ་སྤྲུལ་སྐུ་ངག་དབང་མཆོག་གྲུབ་ལགས་ཀྱིས་གཡུང་དྲུང་བོན་གྱི་ཆོས་དང་རིག་གཞུང་ནི་རང་རེའི་གདོད་མའི་བོད་མི་རིགས་ཀྱི་གལ་ཆེའི་ཆོས་རིག་ཡིན་པ་དེ་ཡང་བོད་རྒྱལ་ཐོག་མར་གཉའ་ཁྲི་བཙན་པོ་ནས་བཟུང་རྒྱལ་རབས་རིམ་པས་གྲི་གུམ་བཙན་པོའི་བར་ཧ་ཅང་དར་རྒྱས་བྱུང་བ་དང་། དེ་རྗེས་ཆོས་རྒྱལ་ཁྲི་སྲོང་ལྡེའུ་བཙན་གྱི་སྐུ་ཚེའི་སྟོད་ཙམ་བར་དུ་གངས་ལྗོངས་ཀྱི་ཆོས་ལུགས་དང་རིག་གཞུང་གལ་པོ་ཆེ་ཞིག་ཡིན་པ། དེ་ནས་རང་བཞིན་སྤྱི་ཚོགས་ཀྱི་འགྱུར་འགྲོས་དང་བསྟུན་དུས་རབས་བརྒྱད་པ་ཙམ་ནས་མཁན་ཆེན་ཞི་བ་འཚོ་དང་ཨོ་རྒྱན་མཧཱ་གུ་རུ་པདྨ་འབྱུང་གནས་སོགས་བྱོན་རྗེས་བོད་ལ་དཔལ་ནཱ་ལེནྡྲའི་ཆོས་བརྒྱུད་དར་རྒྱས་བྱུང་སྐོར་སོགས་དང་།
གཡུང་དྲུང་བོན་གྱི་ཆོས་ནི་སྔར་རྟག་གཟིགས་དང་། ཞང་ཞུང་། པུར་རྒྱལ་བོད་བཅས་ལ་ས་ཁྱབ་རྡོ་ཁྱབ་ཏུ་ཡོད་པ་ཇི་བཞིན་མེད་ན་ཡང་མི་ཉམས་གསོན་པའི་རྣམ་པར་བཞུགས་ཡོད་པ་ནི་དགའ་འོས་པ་ཞིག་དང་། ལྷག་པར་ཕྱི་ལོ་ ༡༩༥༩ རྗེས་གཡུང་དྲུང་བོན་གྱི་སྐྱེས་ཆེན་དམ་པ་༸སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་མཆོག་དང་། ༸སྐྱབས་རྗེ་ཡོངས་འཛིན་སྨྲ་བའི་དབང་པོ་སློབ་དཔོན་བསྟན་འཛིན་རྣམ་དག་རིན་པོ་ཆེ་མཆོག་རྣམ་གཉིས་ཀྱིས་དབུས་གཡུང་དྲུང་བོན་གྱི་བླ་གྲྭ་རྒན་གྲྭས་རྣམས་ཀྱི་རླབས་ཆེན་གྱི་མཛད་བཟང་དང་། ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་བསྐྱེད་ལམ་སྟོན་འོག་དེང་གི་འཆར་བཤད་སྒྲུབ་ཀྱི་བསྟི་གནས་ཚད་ལྡན་ཁག་སླར་གསོ་དང་སློབ་གཉེར་གནང་ཕྱོགས་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཞལ་ནས་གཡུང་དྲུང་བོན་གྱི་སློབ་སྦྱོང་གནང་སྟངས་ལ་མིག་དཔེ་ལྟ་དགོས་པའི་བཀའ་སློབ་ཕེབས་པ་མ་ཟད། ཆོས་བརྒྱུད་གྲུབ་མཐའ་རིས་མེད་ཀྱི་ཆོས་སྡེ་ཁག་ལ་གཞུང་ཆེན་ཐོས་བསམ་སློབ་གཉེར་གནང་དགོས་གལ་བཀའ་སློབ་སྩལ་ཞོར་ལ་དེ་རིང་ཁ་སང་བལ་ཡུལ་ན་གཡུང་དྲུང་བོན་གྱི་དགོན་པ་ཁྲི་བརྟན་ནོར་བུ་རྩེར་བསླབ་པ་སློབ་གཉེར་ཧ་ཅང་ཡག་པོ་ཡོད་བཟོ་འདུག་ཅེས་ཀྱང་བཀའ་སློབ་སྩལ་བ་སོགས་བལ་ཡུལ་སྐུ་ཚབ་དོན་གཅོད་ཀྱིས་ངོ་སྤྲོད་དང་ཆབས་ཅིག་གཡུང་དྲུང་བོན་གྱི་རྗེས་འབྲང་བོད་པ་ཙམ་མ་ཟད། ཧི་མ་ལ་ཡ་རི་རྒྱུད་དོལ་པོ་དང་། གློ་བ་སོགས་ལའང་སོ་སོའི་ཕ་མེས་ཀྱི་ཆོས་དང་རིག་གཞུང་བདག་གཅེས་གནང་དགོས་པའི་སྐོར་དང་། ལྷག་པར་བོད་ཀྱི་ལྷོ་ནུབ་ཕྱོགས་ཀྱི་ཧི་མ་ལ་ཡའི་མི་རིགས་དང་། རྟ་མང་བཅས་སོ་སོའི་མི་རྒྱུད་དང་ཆོས་རིག་བོད་རང་ནས་མཆེད་པ་ངེས་པར་དུ་ཤེས་དགོས་གལ་སོགས་ཀྱི་གསུང་བཤད་གནང་གྲུབ་རྗེས་༸སྐྱབས་རྗེ་མཁན་ཆེན་མཆོག་གིས་ཁྲུས་གནང་ཞིང་། འདུལ་མཆོག་ལྟར་ཞབས་སྐོར་དང་སྨོན་ལམ་གསུངས་རྗེས་ཀུན་གྱིས་བཀའ་རམས་དགེ་བཤེས་ཆེན་མོ་སྐལ་བ་བཟང་ཞེས་པའི་འབོད་སྒྲ་འབྲུག་སྟོང་ལྡིར་བ་ལྟར་གནང་ནས་རིམ་བཞིན་མཛད་སྒོ་ལེགས་གྲུབ་བྱུང་ཡོད་པ་བཅས། །
