༄༅། །འདི་གར་ལྡི་ལི་བསམ་ཡས་གླིང་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༣ ཟླ་བ་ ༣ ཚེས་ ༡༠ ཉིན་རྒྱ་གར་རྒྱལ་ས་ལྡི་ལིའི་བོད་སྒར་བསམ་ཡས་གླིང་དུ་བོད་མིའི་རང་དབང་སྒེར་ལངས་གསུམ་བཅུ་དུས་དྲན་ཐེངས་ ༦༤ པའི་གཞུང་འབྲེལ་མཛད་སྒོ་སྲུང་བརྩི་གཟབ་རྒྱས་ཞུས་ཡོད།

དེ་ཉིན་གྱི་སྐུ་མགྲོན་གཙོ་བོ་རྒྱ་གར་གྲོས་ཚོགས་གོང་མའི་གྲོས་ཚོགས་འཐུས་མི་སྐུ་ཞབས་སཱན་ཇེ་སིངྒ་ (Shri Sanjay Singh) ལགས་དང་།དམིགས་བསལ་སྐུ་མགྲོན་ལྡི་ལི་སྐུ་ཚབ་དོན་གཅོད་སྤྱི་ཟུར་བློ་བཟང་ཤསྟྲི་ལགས་དང་། ལྡི་ལི་མངའ་སྡེ་གྲོས་ཚོགས་འཐུས་མི་པྲ་ལཏ་སིངྒ་སཧ་ནི་ (Shri Prahlad Singh Sahwney) ལགས་ཀྱིས་གཙོས་སེར་སྐྱ་མི་མང་སློབ་ཕྲུག་བཅས་པ་བོད་ཁྱིམ་ཉིན་སློབ་ཏུ་ཚང་འཛོམས་ཀྱིས་ཐོག་མར་རྒྱ་བོད་གཉིས་ཀྱི་རྒྱལ་གླུ་དང་། གསུམ་བཅུའི་དྲན་གླུ་འབུལ་ལམ་ཞུས་རྗེས། བོད་དང་བོད་མིའི་རྩ་དོན་ཆེད་གཅེས་པའི་ལུས་སྲོག་ལོངས་སྤྱོད་དང་བཅས་པ་བློས་གཏོང་གནང་བའི་རྒྱལ་གཅེས་པ་ཕོ་མོ་རྣམས་དང་། དེ་བཞིན་རྒྱའི་བཙན་འོག་ཏུ་དཀའ་སྡུག་སྣ་ཚོགས་མྱོང་མུས་སུ་ཡོད་པ་རྣམས་ལ་གདུང་སེམས་མཉམ་བསྐྱེད་མཚོན་ཆེད་ངག་བཅད་སྐར་མ་གཅིག་ཞུས།

དེ་ནས་ལྡི་ལི་ས་གནས་རང་བདེན་ཚོགས་ཆུང་གི་ཚོགས་གཙོ་ནས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་སྒྲོགས་སྦྱང་གནང་། ལྡི་ལི་སྐུ་ཚབ་དོན་གཅོད་ནས་བཀའ་ཤག་གི་གསུང་བཤད་སྒྲོགས་སྦྱང་གནང་རྗེས་སྐུ་མགྲོན་གཙོ་བོ་སཱན་ཇེ་སིངྒ་ལགས་ཀྱིས་བོད་དང་རྒྱ་གར་གཉིས་བར་ལོ་ངོ་སྟོང་ཕྲག་བརྒལ་བའི་ལོ་རྒྱུས་རང་བཞིན་ལྡན་པའི་འབྲེལ་ལམ་དམ་གཟབ་ཡོད་པ་དང་། དེང་སྐབས་བོད་དང་རྒྱ་གར་གཉིས་ཀྱི་གདོང་ལེན་བྱེད་ས་དེ་ཡང་རྒྱ་ནག་ཡིན་པ། དབང་ཤུགས་བཙན་གནོན་གྱི་སྒོ་ནས་འཛམ་གླིང་དབང་བསྒྱུར་ཐུབ་རྒྱུ་མིན་པ་དང་། འཛམ་གླིང་ཁ་ལོ་བསྒྱུར་དགོས་ན་སྟོན་པ་ཤཀྱཱ་ཐུབ་པ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉམས་བཞེས་མཛད་བཞིན་པའི་འཚེ་མེད་ཞི་བའི་ཐབས་ལམ་དེ་དག་ལ་བསྟེན་དགོས་པ་སོགས་ཀྱི་གསུང་བཤད་གནང་གྲུབ་བསྟུན་གཞུང་འབྲེལ་མཛད་སྒོ་རྒྱལ་ཁའི་ངང་གྲུབ་ཡོད་པ་བཅས། །