༢༠༡༡ ཟླ་ ༡༡ ཚེས་ ༨ རེས་གཟའ་མིག་དམར།
༄༅། །ཕྱི་ལོ་ ༢༠༡༡ ཟླ་ ༡༡ ཚེས་ ༧ ཉིན་གྱི་སྔ་དྲོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་ཁུལ་གྱི་ཉིན་བཅུའི་མཛད་འཕྲིན་གྱི་ཉིན་མཐའ་མའི་སྔ་དྲོར་བཞུགས་གནས་མགྲོན་ཁང་དུ་ཉི་ཧོང་གི་
༸གོང་ས་མཆོག་གིས་ཉི་ཧོང་སྲིད་བློན་ཟུར་པ་ཤིན་ཇོ་ཨ་བྷེ་མཆོག་(Shinzo Abe)དང་མཇལ་འཕྲད་མཛད་བཞིན་པ།
སྲིད་བློན་ཟུར་པ་སྐུ་ཞབས་ཤིན་ཇོ་ཨ་བྷེ་(Mr.Shinzo Abe) མཆོག་གིས་དབུ་ཁྲིད་པས་གྲོས་ཚོགས་འཐུས་མི་ཁག་གཅིག་དང་ལྷན་མཇལ་འཕྲད་མཛད་ཡོད།
སྐབས་དེར་སྲིད་བློན་ཟུར་པ་མཆོག་གིས་༸གོང་ས་མཆོག་ལ་ས་ཡོམ་དང་མཚོ་རླབས་ཀྱི་གོད་ཆག་ཕོག་པའི་ཉི་ཧོང་གི་གྲོང་ཆེ་ཆུང་ཁག་གི་ནང་ཆིབས་སྒྱུར་བསྐྱངས་པ་མ་ཟད། རྡུལ་ཕྲན་འོད་རླངས་ཁྱབ་པའི་ས་གནས་ཁག་གི་མང་ཚོགས་རྣམས་དང་མཇལ་འཕྲད་ཀྱིས་ཁོང་རྣམ་པར་སྙིང་སྟོབས་སྤེལ་ཏེ་སེམས་གསོ་མཛད་པར་བཀའ་དྲིན་ཆེ་ཞེས་ཞུས་ཡོད། ཕྱོགས་མཚུངས་གྲོས་ཚོགས་འཐུས་མི་རྣམས་ཀྱིས་བོད་དོན་བདེན་མཐའ་སེལ་ཆེད་༸གོང་ས་མཆོག་གིས་གཉིས་སྨན་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་གནང་ཡོད་པ་མ་ཟད། ད་ལྟའི་བོད་ནང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་པ་དེར་བློ་འཚབ་ཡོད་སྐོར་ཡང་ཞུས་ཡོད།
མཇལ་འཕྲད་གྲུབ་བསྟུན་༸གོང་ས་མཆོག་གིས་ཊོག་ཁྱོའི་ནང་རྟེན་གཞི་བྱས་པའི་རང་དབང་ཅན་གྱི་གསར་འགོད་མཐུན་ཚོགས་ཀྱིས་གོ་སྒྲིག་ཞུས་པའི་གསར་འགོད་ལྷན་ཚོགས་སུ་ལྷན་ཞུགས་མཛད་དེ་གསར་འགོད་པའི་དྲི་བར་བཀའ་ལན་མཛད། སྐབས་དེར་ཉི་ཧོང་
གི་བརྙན་འཕྲིན་བརྒྱུད་ལམ་ཆེ་ཁག་དང། ཚགས་ཤོག དུས་དེབ་བཅས་ཀྱི་གསར་འགོད་པ་བརྒྱད་བཅུ་ལྷག་བཅར་ཡོད་འདུག ཐོག་མར་༸གོང་ས་མཆོག་གིས་འཚམས་འདྲི་མཛད་པ་དང་སྦྲགས་བཀའ་སློབ་སྩལ་དོན། ངོས་རང་ཐེངས་འདིར་ཉི་ཧོང་དུ་ཡོང་དགོས་དོན་རྒྱུ་མཚན་དང་པོ་ནི། ཉི་ཧོང་གི་ཀོ་ཡ་སན་གཙུག་ལག་སློབ་ཁང་གིས་མགྲོན་འབོད་ལྟར་ཀོ་ཡ་སན་དང་གྲོང་ཁྱེར་ཨོ་ས་ཀའི་ནང་ཆོས་འབྲེལ་དང། གཉིས་པ་ནི། འདི་ལོ་ཉི་ཧོང་ཁུལ་དུ་ས་ཡོམ་དང་མཚོ་རླབས་ཀྱིས་གོད་ཆག་འོག་དཀའ་སྡུག་ཚད་མེད་མྱངས་པའི་མང་ཚོགས་རྣམས་ཐུག་སྟེ་ཁོང་ཚོའི་སྡུག་བསྔལ་མཉམ་མྱོང་བྱེད་རྒྱུ་དེ་ཡིན་ཞེས་བཀའ་སློབ་སྩལ། དེ་ནས་མགོན་པོ་གང་ཉིད་མཆོག་གི་སྐུ་ཚེ་ཧྲིལ་པོའི་རིང་མཛད་འགན་གཙོ་བོ་གསུམ་ཡོད་པའི་ནང་གི་གཉིས་ཏེ་འགྲོ་བ་མིའི་རིན་ཐང་གོང་མཐོར་གཏོང་རྒྱུ་དང་ཆོས་ལུགས་མཐུན་སྒྲིལ་གོང་འཕེལ་གཏོང་རྒྱུའི་སྐོར་བཀའ་སློབ་སྩལ། གཞན་ཡང་སྐབས་དེར་གསར་འགོད་པ་ཚོས་བོད་ནང་གི་བོད་མི་ཚོས་རང་ལུས་མེར་སྲེག་བཏང་བའི་དོན་རྐྱེན་སྐོར་གྱི་དྲི་བ་ཡང་འབུལ་སྐབས། ༸གོང་ས་མཆོག་གིས་བཀའ་ལན་སྩལ་དོན། འདི་ལོ་ཕྱི་ཟླ་གསུམ་པ་ནས་ངོས་ཀྱིས་བོད་མིའི་ཆབ་སྲིད་ཀྱི་འགན་དབང་ཡོངས་རྫོགས་མང་ཚོགས་གིས་འོས་འདེམས་བྱས་པའི་འགོ་ཁྲིད་ལ་རྩིས་སྤྲོད་བྱས་ཟིན། དེར་བརྟེན་ད་ཆ་ཏཱ་ལའི་བླ་མའི་སྒྲིག་འཛུགས་ཀྱི་ལས་དོན་གཙོ་བོ་དེ་ཆོས་ཕྱོགས་ཁོ་ན་ཡིན། འོན་ཀྱང་དེའི་གོ་དོན་ནི་ངོས་རང་ཏཱ་ལའི་བླ་མའི་གོ་གནས་ནས་རྒན་ཡོལ་ཞུས་པའི་དོན་མིན། དེ་སྔ་ཏཱ་ལའི་བླ་མ་སྐུ་ཕྲེང་དང་པོ་ནས་བཞི་པའི་བར་ཆོས་ཕྱོགས་ཁོ་ན་གཙོ་བཟུང་མཛད་པའི་ཕྱག་སྲོལ་དེ་ད་ཆ་སླར་ཡང་རྒྱུན་མཐུད་པ་ཞིག་ཡིན། ངོས་རང་མང་གཙོའི་ལམ་ལུགས་ལ་མཐའ་གཅིག་ཏུ་རྒྱབ་སྐྱོར་ཞུ་བཞིན་ཡོད། ངོས་སྒེར་གྱི་བསམ་ཚུལ་ལྟར་ན་བོད་མི་ཚོས་རང་ལུས་མེར་སྲེག་བཏང་བ་དེར་ཆབ་སྲིད་དང་ཆོས་ཕྱོགས། དེ་བཞིན་ལྟ་གྲུབ་ཀྱི་རྒྱབ་ལྗོངས་ལ་བསམ་ཞིབ་ནན་པོའི་ཐོག་ནས་ལྟ་དགོས་པ་ཞིག་ཆགས་ཡོད། རྒྱ་ནག་
གིས་ལོ་ངོ་དྲུག་ཅུ་ལྷག་ཙམ་རིང་དབང་བསྒྱུར་བྱས་ཀྱང་བོད་ནང་གི་དོན་དངོས་གནས་སྟངས་ཇི་ཡིན་དོན་རྐྱེན་དེ་དག་ལས་གསལ་པོར་རྟོགས་ཐུབ། རང་ལུས་མེར་སྲེག་བཏང་བའི་འུ་ཐུག་ཐབས་ཟད་ཀྱི་བྱ་སྤྱོད་བརྒྱུད་བོད་མི་ཚོས་རང་དབང་དང་དྲང་བདེན་རྩོད་བཞིན་ཡོད། རྒྱ་ནག་གི་དཔོན་རིགས་ཚོས་དོན་རྐྱེན་དེ་དག་ཛ་དྲག་པོར་བརྩིས་ཏེ་བོད་མི་ཚོའི་དཀའ་ངལ་སེལ་ཐབས་བྱེད་དགོས། རྒྱ་ནག་དཔོན་རིགས་ཚོས་བོད་ཀྱི་དངོས་ཡོད་གནས་སྟངས་ཁས་ལེན་བྱེད་དགོས། བོད་ནང་གི་དངོས་ཡོད་གནས་སྟངས་ནི་བོད་མི་ཚོའི་འགྲོ་བ་མིའི་ཐོབ་ཐང་ལ་དཀའ་ངལ་འཕྲད་བཞིན་ཡོད་པའི་ཁར་ཆོས་དད་དང་རིག་གཞུང་། དེ་བཞིན་ཁོར་ཡུག་སོགས་རྩ་གཏོར་འགྲོ་བཞིན་ཡོད། གནས་སྟངས་འདི་བཅིངས་བཀྲོལ་བཏང་བ་ཞིག་ཡིན་ནམ་ཡང་ན་བཙན་བཟུང་བྱས་པ་ཞིག་ཡིན། ངོས་ཀྱིས་གང་བརྗོད་པར་ཆ་མ་བཞག་པར་གསར་འགོད་པ་ཚོས་བོད་ནང་དུ་བསྐྱོད་དེ་དངོས་ཡོད་གནས་སྟངས་གང་ཡིན་རྟོག་ཞིབ་བྱེད་དགོས། ཞེས་སོགས་ཀྱི་བཀའ་སློབ་སྩལ། ཉིན་རྒྱབ་༸གོང་ས་མཆོག་ཉི་ཧོང་ནང་ཉིན་བཅུའི་མཛད་འཕྲིན་ལེགས་པར་གྲུབ་སྟེ་སོག་ཡུལ་ལ་ཆིབས་ཞལ་བསྒྱུར་ཡོད་པ་བཅས།།
