༄༅། །ཕྱི་ལོ་ ༢༠༢༣ ཟླ་བ་ ༠༣ ཚེས་ ༠༧ ཉིན་སུད་སིའི་དཔྱིད་ཀའི་གྲོས་ཚོགས་འཚོག་བཞིན་པ་དང་སྟབས་བསྟུན་སུད་སི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ནས་ཚོགས་འདུ་ཟུར་ཚོགས་ཀྱིས་བོད་དོན་དང་འབྲེལ་བའི་གནད་དོན་ཐོག་གྲོས་བསྡུར་གནང་ཡོད་པ་རེད།

དེ་ཡང་ཚོགས་འདུའི་ནང་གྲོས་ཚོགས་ཀྱི་སྐུ་ཚབ་ཏུ་གྲོས་ཚོགས་འཐུས་མི་ནི་ཀོ་ལ་སི་ཝལ་ཊར་ (Nicholas Walder) ལགས་དང་། གྲོས་ཚོགས་འཐུས་མི་ན་ཊ་ལི་ཨིམ་བྷོ་ཊན་(Natalie Imboden) ལགས་མཉམ་ཞུགས་གནང་ཡོད་པ་དང་། བོད་མིའི་སྐུ་ཚབ་ཏུ་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དང་། ཡུ་རོབ་སྤྱི་འཐུས་ཐུབ་བསྟན་རྒྱ་མཚོ་ལགས། སུད་སི་དང་ལེག་ཊིན་ཚིན་བོད་རིགས་ཚོགས་པའི་ཚོགས་གཙོ་ཀརྨ་ཆོས་སྐྱིད་ལགས། དེ་བཞིན་སུད་བོད་མཛའ་འབྲེལ་ཚོགས་པའི་ཚོགས་གཙོ་ཐོ་མ་སི་བྷུ་ཆིལ་ལགས་དང་ལས་བྱེད་བྷེ་ཊི་ན་ལགས་བཅས་མཉམ་ཞུགས་གནང་ཡོད།

སྐབས་དེར་གྲོས་ཚོགས་འཐུས་མི་རྣམས་ལ་ད་ལྟའི་བོད་ནང་གི་ཛ་དྲག་གནས་སྟངས་སྤྱི་དང་། ལྷག་པར་རྒྱ་ནག་གཞུང་གིས་བོད་ནང་གཏན་འཇགས་སློབ་གྲྭ་བརྒྱུད་བོད་ཀྱི་རིག་གཞུང་རྒྱ་ནག་ཅན་དུ་སིམ་ཡལ་གཏོང་ཐབས་རྩོམ་བཞིན་པའི་སྐོར། དེ་བཞིན་བོད་མིའི་རིགས་རྫས་དཔེ་མཚོན་བསྡུ་རུབ་བྱེད་བཞིན་པའི་གནས་ཚུལ་སྙན་སེང་ཞུས།

གཞན་ཡང་སྐབས་དེར་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་གྲོས་ཚོགས་འཐུས་མི་རྣམ་པ་གཉིས་ནས་རྒྱལ་ཚོགས་ཀྱི་གསར་འགོད་བསྒྲགས་གཏམ་ཤུགས་ཆེ་སྤེལ་བར་ཐུགས་རྗེ་ལེགས་འབུལ་ཞུས་ཡོད་པ་བཅས།།