༄༅། །ཕྱི་ལོ་ ༢༠༢༣ ཟླ་བ་ ༠༢ ཚེས་ ༢༣ ཉིན་འབུམ་རམས་པ་ཕེ་ལོ་པི་རི་བྷེ་རོ་ (Dr.H.C. Felipe Ribeiro) ལགས་དང་། ཆོས་ལུགས་མཉམ་སྦྲེལ་ལས་གཞིའི་ཚོགས་པ།(United Religions Initiative (URI) International) འབུམ་རམས་པ་མ་རི་ལ་མེ་ལོ་ (Dr. Marilia Mello Pisani) ལགས། ལྷོ་ཨ་མི་རི་ཀའི་བོད་ཀྱི་སྐུ་ཚབ་དོན་ཁང་ཐུན་མོང་ནས་གོ་སྒྲིག་ཞུས་པའི་ཞི་བདེའི་བདེ་ཐབས་སླད་རྒྱལ་སྤྱིའི་ཚན་རིག་དང་ཆོས་དད་ཀྱི་ཚོགས་འདུའི་ཐོག་ལྡི་ལི་བོད་ཁང་གི་འགན་འཛིན་དགེ་བཤེས་རྡོ་རྗེ་དགྲ་འདུལ་ལགས་ལྷན་ཞུགས་ཀྱིས་གསུང་བཤད་གནང་ཡོད་པ་རེད།

ཚོགས་འདུའི་ཐོག་གཞན་ཡང་ཚན་རིག་པ་དང་། ཆོས་ལུགས་སྣ་ཚོགས་ཀྱི་སྐུ་ཚབ་ལྷན་ཞུགས་གནང་སྟེ་བརྗོད་གཞི་དང་འབྲེལ་བའི་གནད་དོན་ཁག་གཅིག་གསུང་བཤད་དང་བགྲོ་གླེང་གནང་ཡོད། ཕྱོགས་མཚུངས་ཕྱི་ཚེས་ ༢༧ ཉིན་དགེ་བཤེས་རྡོ་རྗེ་དགྲ་འདུལ་ལགས་དང་། སྐུ་ཚབ་དོན་གཅོད་འཇིགས་མེད་ཚེ་རིང་ལགས་ཀྱིས་ཝ་ལིན་ཧོ་སི་ (Valinhos) གྲོང་ཁྱེར་སྤྱི་ཁྱབ་ལྕམ་སྐུ་ལུ་སི་མ་ར་ (Lucimara) ལགས་ལ་འཚམས་འདྲིའི་མཇལ་འཕྲད་གནང་ཡོད་པ་དང་། ཕྱི་ཚེས་ ༢༨ ཉིན་ཞི་བ་ལྷ་ནང་པའི་ཆོས་ཚོགས་ཀྱི་གོ་སྒྲིག་ཞུས་ཐོག་དགེ་བཤེས་རྡོ་རྗེ་དགྲ་འདུལ་ལགས་ཀྱིས་ནང་པའི་སེམས་ཁམས་རིག་པ་དང་། ལམ་རིམ་ཀྱི་ཆོས་འབྲེལ་གནང་ཡོད་པ་བཅས།།