༄༅། །སུད་སིའི་གྲོང་ཁྱེར་ཇི་ནི་ཝར་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་འདུ་ཐེངས་ ༥༢ པ་དེ་བཞིན་ཕྱི་ལོ་ ༢༠༢༣ ཟླ་བ་ ༢ ཚེས་ ༢༧ ནས་ཟླ་བ་ ༤ ཚེས་ ༤ བར་འཚོག་བཞིན་པ་དང་བསྟུན།  ཕྱི་ལོ་ ༢༠༢༣ ཟླ་བ ༢ ཚེས་ ༢༧ རེས་གཟའ་ཟླ་བའི་ཉིན་སུད་སི་དང་ལིག་ཏེན་སིཊཡན་བོད་རིགས་མི་མང་སྒྲིག་འཛུགས་ཀྱི་གོ་སྒྲིག་འོག་ས་གནས་མི་མང་གིས་མཉམ་འབྲེལ་རྒྱལ་ཚོགས་ཀྱི་མདུན་དུ་རྒྱ་ནག་གཞུང་གི་དབང་བསྒྱུར་འོག་བོད་ནང་འགྲོ་བ་མིའི་ཐོབ་ཐང་ཇེ་ཞན་ཇེ་སྡུག་ཏུ་འགྲོ་བཞིན་པར་ངོ་རྒོལ་ལས་འགུལ་སྤེལ་ཡོད།

དེ་ཡང་ངོ་རྒོལ་ལས་འགུལ་གྱི་འདུ་འཛོམས་ཐོག་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས། ང་ཚོས་བོད་ནང་གི་བོད་མི་རྣམས་ལ་གདུང་སེམས་མཉམ་སྐྱེ་དང་རྒྱབ་སྐྱོར་ཞུ་ཡི་ཡོད་པའི་དྲན་གསོ་དང་། བཙན་བྱོལ་དུ་ཡོད་པའི་བོད་མི་རྣམས་ལའང་དེ་ལྟར་དྲན་གསོ་ཞུ་དགོས་པ་གལ་ཆེན་པོ་རེད། ཅེས་དང་། འདི་ལོའི་གསུམ་བཅུའི་དུས་དྲན་སྲུང་བརྩི་ཞུ་སྐབས་ཡུ་རོབ་བོད་རིགས་ཚོགས་པ་ཁག་དང་མི་མང་གང་མང་གིས་རྒྱབ་སྐྱོར་དང་མཉམ་ཞུགས་གནང་རོགས། ཞེས་གསུངས་ཡོད།གཞན་ཡང་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས། བོད་རྒྱའི་དཀའ་རྙོག་ད་དུང་སེལ་མེད་པའི་རྒྱལ་སྤྱིའི་དཀའ་རྙོག་ཅིག་ཆགས་ཡོད་སྟབས། རྒྱ་ནག་གཞུང་གིས་ད་བར་བོད་ནང་གི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་བཏང་དང་གཏོང་བཞིན་ཡོད་པ་དང་། རྒྱལ་ཚོགས་ཀྱི་ངོས་ནས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཆེད་མཁས་པ་རྣམས་ལ་གསན་བཞེས་ཀྱིས་རྒྱ་ནག་གཞུང་ལ་རྒྱ་ནག་གཞུང་གིས་བོད་དང་རྒྱ་ནག་གི་དབང་བསྒྱུར་འོག་ཡོད་པའི་ས་ཁུལ་གཞན་ཁག་གི་ནང་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པའི་འགན་འཁུར་དུ་འཇུག་དགོས་པ། རྒྱལ་ཚོགས་ཀྱི་ཚོགས་མི་རྒྱལ་ཁབ་རྣམས་ཀྱིས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་འདུ་ཐེངས་ ༥༢ པའི་སྐབས་བོད་ནང་གི་འགྲོ་བ་མིའི་ཐོབ་ཐང་གི་སྐོར་གླེང་སློང་ཤུགས་ཆེ་གནང་དགོས་པའི་འབོད་སྐུལ་ཞུས་གནང་ཡོད།སུད་སི་དང་ལིག་ཏེན་སིཊཡན་བོད་རིགས་མི་མང་སྒྲིག་འཛུགས་ཀྱི་ཚོགས་གཙོ་ཀརྨ་ཆོས་སྐྱིད་ལགས་ཀྱིས་རྩོམ་པ་པོ་གྲགས་ཅན་སྒོ་ཤེས་རབ་རྒྱ་མཚོ་ལགས་ཀྱིས་གཙོས་འགྲོ་བ་མིའི་ཐོབ་ཐང་སྲུང་སྐྱོབ་པ་རྣམས་ཆ་རྐྱེན་གང་ཡང་མེད་པའི་ཐོག་གློད་བཀྲོལ་གཏོང་དགོས་པའི་དྲན་གསོ་གནང་ཡོད། སུད་བོད་མཛའ་འབྲེལ་ཚོགས་པའི་སྐུ་ཚབ་ཁོན་ཊ་ཊི་ (Marguarite Contat) ལགས་ཀྱིས། རྒྱ་ནག་གཞུང་གིས་བོད་ནང་འཆར་གཞི་ལྡན་པའི་སྒོ་ནས་བོད་མིའི་རིག་གཞུང་དང་ངོ་བོ་རྩ་གཏོར་གཏོང་བཞིན་ཡོད་པས། བོད་ནང་གི་འགྲོ་བ་མིའི་ཐོབ་ཐོང་གི་གནད་དོན་སྐོར་སུད་སིའི་གྲོས་ཚོགས་སུ་ཞུ་གཏུག་གནང་གི་ཡིན། ཞེས་གསུངས།།