༄༅། །ཕྱི་ལོ་ ༢༠༢༣ ཟླ་བ་ ༢ ཚེས་ ༡༤ ཉིན་ཧིན་བོད་མཛའ་འབྲེལ་ཚོགས་པ་དང་། སྦོང་ལོར་དུ་རྟེན་གཞི་བྱས་པའི་མོན་ཊི་ཁར་མེལ་མཐོ་སློབ་ (Mount Carmel College) ཀྱི་ཆབ་སྲིད་སྡེ་ཚན་གཉིས་ཀྱིས་བོད་ཀྱི་རང་དབང་དང་། རྒྱ་གར་གྱི་བདེ་འཇགས་དང་ཨེ་ཤི་ཡའི་ཞི་བདེ་ཞེས་པའི་བགྲོ་གླེང་ཞིག་གོ་སྒྲིག་གནང་ཡོད། བགྲོ་གླེང་ཐོག་ཐུབ་བསྟན་རྒྱལ་མཚན་ལགས་དང་། བཀྲ་ཤིས་དབང་འདུས་ལགས། ཨེན་ཇཱ་ཡཱ་རཱམ་ (N. Jayaram) ལགས། སཱཏིཤ་ (Col. Satish) ལགས་བཅས་མཉམ་ཞུགས་གནང་ཡོད།

ཐུབ་བསྟན་རྒྱལ་མཚན་ལགས་དང་བཀྲ་ཤིས་དབང་འདུས་ལགས་ཀྱིས། རྒྱ་ནག་དམར་ཤོག་གཞུང་གིས་བོད་མིའི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་བཏང་བ་དང་། ཆོས་དང་རིག་གཞུང་གཏོར་བཤིག་བཏང་བ། བོད་མི་རྣམས་ཉེན་ཁ་ལ་མ་འཛེམས་པར་བཙན་བྱོལ་དུ་ཇི་ལྟར་ཕེབས་པ། བོད་མིའི་སྒྲིག་འཛུགས་སོགས་ཀྱི་སྐོར་གསུངས་ཡོད།

ཨེན་ཇཱ་ཡཱ་རམ་ (N. Jayaram) ལགས་ཀྱིས། རྒྱ་ནག་གི་ལོ་རྒྱུས་དང་། རིག་གནས་གསར་བརྗེ། དཔལ་འབྱོར་བསྒྱུར་བཅོས་སོགས་ཀྱི་སྐོར་གསུངས་པ་མ་ཟད། རྒྱ་ནག་གཞུང་གིས་ཧོང་ཀོང་དབང་བསྒྱུར་བྱས་རྗེས་ཉེན་རྟོག་པས་མི་མང་འཛིན་བཟུང་བཀག་ཉར་བྱས་ཏེ་དམ་བསྒྲགས་ཤུགས་ཆེ་བྱས་ཡོད་པ་སོགས་ཀྱི་སྐོར་གསུངས་ཡོད། སཱཏིཤ་ (Col. Satish) ལགས་ཀྱིས་རྒྱ་གར་གྱི་ས་མཚམས་ཁག་གིས་གཙོས་ཁྱིམ་མཚེས་རྒྱལ་ཁབ་ཁག་དང་ཁོར་ཡུག་སོགས་ཀྱི་སྐོར་གསུངས་ཡོད་པ་བཅས།།