༄༅། །ཕྱི་ལོ་ ༢༠༢༣ ཟླ་བ་ ༢ ཚེས་ ༢༦ ཉིན་ཨོསྟྲེ་ལི་ཡཱ་སྐུ་ཚབ་དོན་གཅོད་ལས་ཁུངས་ཀྱི་གོ་སྒྲིག་འོག་ཨོསྟྲེ་ལི་ཡཱའི་གྲོང་ཁྱེར་སིཌ་ནིའི་ཌེ་ཝེ་ས་གནས་སུ་བོད་མིའི་གཟའ་མཇུག་བོད་ཡིག་སློབ་གྲྭ་ཁག་གི་རིག་གཞུང་འཁྲབ་སྟོན་འདུ་འཛོམས་ཐེངས་དང་པོ་ཚོགས་གནང་ཡོད་པ་དང་། ཐེངས་འདིའི་རིག་གཞུང་འཁྲབ་སྟོན་གྱི་ལས་རིམ་དེ་བཞིན་མཉམ་གཞས་དང་། རྐྱང་གཞས། འཁྲབ་གཞས་བཅས་སྡེ་ཚན་གསུམ་ལ་དབྱེ་བ་ཕྱེ་ཡོད། རིག་གཞུང་འཁྲབ་སྟོན་གྱི་ལས་རིམ་ཐོག་ཨོསྟྲེ་ལི་ཡཱའི་རྒྱལ་ས་ཁེན་བྷེ་ར་དང་། གནས་མཁར་གསར། སིཌ་ནི། ནོར་ར། མེལ་བྷོན། ཁེམ་བྷེལ་ཊོན་བཅས་ས་གནས་ཁག་དྲུག་གི་གཟའ་མཇུག་བོད་ཡིག་སློབ་གྲྭ་ཁག་གི་སློབ་མ་རྣམས་མཉམ་ཞུགས་ཀྱིས་འཁྲབ་སྟོན་གནང་ཡོད།
དེ་ཡང་ཨོསྟྲེ་ལི་ཡཱ་སྐུ་ཚབ་དོན་གཅོད་ཀརྨ་སེང་གེ་ལགས་ཀྱིས། བོད་མིའི་གཟའ་མཇུག་བོད་ཡིག་སློབ་གྲྭ་ཁག་གི་རིག་གཞུང་འཁྲབ་སྟོན་འདུ་འཛོམས་ཐོག་གསུང་བཤད་གནང་སྐབས་བོད་མིའི་གཟའ་མཇུག་བོད་ཡིག་སློབ་གྲྭ་ཁག་གི་རིག་གཞུང་འཁྲབ་སྟོན་འདུ་འཛོམས་འདི་ནི་ཕན་ཚུན་འགྲན་བསྡུར་གྱི་རྣམ་པ་མིན་པར་གཙོ་བོ་སློབ་ཕྲུག་རྣམས་ལ་རང་ཉིད་ཀྱི་རིག་རྩལ་སྟོན་པར་སྡིངས་ཆ་བསྐྲུན་སླད་ཡིན། ཞེས་དང་།
སློབ་ཕྲུག་གི་ཕ་མ་རྣམས་ཀྱིས་སོ་སོའི་ཕྲུ་གུ་རྣམས་ལ་བོད་ཀྱི་ཐུན་མོང་མིན་པའི་རིག་གཞུང་དང་ངོ་བོ་མི་ཉམས་རྒྱུན་འཛིན་བྱེད་དགོས་པའི་སྐུལ་མ་དང་རྒྱབ་སྐྱོར་གནང་དང་གནང་བཞིན་པར་ཐུགས་རྗེ་ཆེ། ཞེས་གསུངས། གཞན་ཡང་ཁོང་གིས་གཟའ་མཇུག་སློབ་གྲྭའི་དགེ་རྒན་རྣམ་པས་དང་བླངས་ཀྱིས་སློབ་ཕྲུག་རྣམས་ལ་བོད་མིའི་རིག་གཞུང་གཏིང་ཟབ་སློབ་ཁྲིད་གནང་བར་ཐུགས་རྗེ་ཆེ་ཞུས་གནང་ཡོད།
ཆེ་བསྟོད་སྐུ་མགྲོན་སྤྱི་འཐུས་རྡོ་རིང་བསྟན་འཛིན་ཕུན་ཚོགས་ལགས་ཀྱིས་བོད་མིའི་གཟའ་མཇུག་བོད་ཡིག་སློབ་གྲྭ་ཁག་གི་རིག་གཞུང་འཁྲབ་སྟོན་འདུ་འཛོམས་ཐོག་མཉམ་ཞུགས་གནང་མཁན་དང་རྒྱབ་སྐྱོར་གནང་མཁན་ཡོངས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་དང་། བོད་མིའི་སྒྲིག་འཛུགས་ཀྱི་མངོན་འདོད་བསྒྲུབས་ཡོད་པ་མ་ཟད། བཙན་བྱོལ་བོད་མི་རྣམས་ཀྱིས་རྡོག་རྩ་གཅིག་སྒྲིལ་བྱས་ཏེ་བོད་ཀྱི་ཐུན་མོང་མིན་པའི་རིག་གཞུང་དང་ངོ་བོ་མི་ཉམས་རྒྱུན་འཛིན་བྱེད་བཞིན་ཡོད་པའི་སྐོར་རྒྱ་ནག་གཞུང་ལ་བརྡ་ལན་གསལ་པོ་ཞིག་སྤྲད་ཐུབ་ཡོད། ཅེས་གསུངས།
ཨོསྟྲེ་ལི་ཡཱ་སྐུ་ཚབ་དོན་གཅོད་ཀརྨ་སེང་གེ་ལགས་དང་སྤྱི་འཐུས་རྡོ་རིང་བསྟན་འཛིན་ཕུན་ཚོགས་ལགས་ཀྱིས་མཉམ་ཞུགས་གནང་མཁན་རྣམས་ལ་ཆེ་བསྟོད་ཀྱི་ཕྱག་འཁྱེར་རེ་གནང་ཡོད་པ་མ་ཟད། མཐུན་འགྱུར་རོགས་རམ་གནང་མཁན་གྱི་གཟའ་མཇུག་སློབ་གྲྭ་ཁག་རེར་ཐུགས་རྗེ་ཆེ་ཞུའི་གཟེངས་རྟགས་རེ་གནང་ཡོད་ལ། ཨོསྟྲེ་ལི་ཡཱ་སྐུ་ཚབ་དོན་གཅོད་ལས་ཁུངས་ཀྱི་དྲུང་ཆེ་ལྷ་དབང་རྒྱལ་པོ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་ཡོད། ཐེངས་འདིའི་བོད་མིའི་གཟའ་མཇུག་བོད་ཡིག་སློབ་གྲྭ་ཁག་གི་རིག་གཞུང་འཁྲབ་སྟོན་འདུ་འཛོམས་ཐོག་ཨོསྟྲེ་ལི་ཡཱ་བོད་རིགས་སྤྱི་མཐུན་ཚོགས་པ་ཁག་གི་འགན་འཛིན་ལྷན་ཚོགས་ཀྱི་ཚོགས་མི་རྣམ་པ་དང་། དགེ་རྒན་རྣམ་པ། གཟའ་མཇུག་སློབ་གྲྭ་ཁག་གི་ཕ་མ་བཅས་མཉམ་ཞུགས་གནང་ཡོད་པ་བཅས།།
