༄༅། །ཉི་འོང་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམ་པས་དེ་རིང་དོན་ཚན་ལྔ་ཅན་གྱི་གྲོས་ཆོད་གཏན་འབེབས་གནང་སྟེ་རྒྱ་ནག་གཞུང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུས་པའི་བོད་ཀྱི་བླ་སྤྲུལ་རྣམ་པའི་ཡང་སྲིད་ངོས་འཛིན་གནང་ཕྱོགས་ཐེ་བའི་བོད་ཀྱི་ཆོས་ཕྱོགས་ཀྱི་བྱེད་སྒོ་ཁག་ལ་ཐེ་བྱུས་བྱེད་མི་ཆོག་པ་མ་ཟད། གཞན་ཡང་རྒྱ་གཞུང་ནས་འཕྲལ་དུ་རྒྱ་ནག་གཞུང་གི་ལྟ་རྟོག་འོག་ཡོད་པའི་གཏན་འཇགས་སློབ་གྲྭ་ཁག་ཏུ་བོད་ཕྲུག་རྣམས་ལ་ཆབ་སྲིད་ཀྱི་སློབ་གསོ་སྤྲོད་མཚམས་འཇོག་དགོས་པའི་འབོད་སྐུལ་གནང་ཡོད།
དེ་ཡང་དེ་རིང་ཉི་ཧོང་བོད་སྐྱོབ་ཚོགས་པ་ (The Save Tibet Network) དང་ཉི་འོང་བོད་རིགས་ཐུན་མོང་ནས་དྲ་ཐོག་བརྒྱུད་ཉི་འོང་བོད་དོན་རྒྱབ་སྐྱོར་ཚོགས་པའི་ལོ་འཁོར་ཚོགས་འདུ་བསྐོང་ཚོགས་གནང་ཡོད་ཅིང་། ཚོགས་འདུའི་ཐོག་སྐུ་མགྲོན་དུ་ས་གནས་དང་རྒྱལ་ཡོངས་གྲོས་ཚོགས་འཐུས་མི་གཙོས་པའི་བོད་དོན་རྒྱབ་སྐྱོར་ཚོགས་པ་ཁག་བཅུ་དང་ཚོགས་བཅར་བ་གྲངས་ ༢༨ ། ཉི་འོང་སྐུ་ཚབ་དོན་གཅོད་དང་ལས་བྱེད་རྣམ་པ་བཅས་མཉམ་ཞུགས་གནང་ཡོད། སྐབས་དེར་གྲོས་ཚོགས་འཐུས་མི་ཟུར་པ་དང་ཉི་ཧོང་བོད་སྐྱོབ་ཚོགས་པའི་ཚོགས་གཙོ་མ་ཀི་ནོ་སི་ཤུ་ལགས་ཀྱིས་ཚོགས་བཅར་བ་རྣམས་ལ་ཕེབས་བསུ་དང་སྦྲགས། ཉི་འོང་བོད་དོན་རྒྱབ་སྐྱོར་ཚོགས་པའི་རྒྱབ་ལྗོངས་གནས་ཚུལ་ཁག་གཅིག་དང་། ཁོང་ཉིད་བོད་ཀྱི་རང་དབང་འཐབ་རྩོད་དང་འབྲེལ་བ་ཇི་ལྟར་བྱུང་ཚུལ། དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་བྱུང་བའི་ལོ་རྒྱུས་གསུངས་པ་མ་ཟད། ཚོགས་བཅར་བ་རྣམས་ཀྱིས་མགོན་པོ་མཆོག་གི་དགོངས་བཞེད་ལྟར་འཚེ་མེད་ཞི་བའི་ལམ་བསྟེན་དགོས་པའི་གལ་གནད་སྐོར་གསུངས་ཡོད།
སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་གྲོ་སྒྲིག་པ་དང་གྲོས་ཚོགས་འཐུས་མི་རྣམ་པ། དེ་བཞིན་ཚོགས་བཅར་བ་རྣམས་ནས་བོད་དོན་ལ་རྒྱབ་སྐྱོར་གནང་བར་ཐུགས་རྗེ་ལེགས་འབུལ་ཞུས་པ་དང་ཆབས་ཅིག་རྒྱ་གཞུང་གིས་ད་ལྟའི་ཆར་བོད་ནང་རིག་གནས་གསར་བརྗེ་ལྟ་བུའི་གཏོར་སྐྱོན་གཏོང་བཞིན་ཡོད་པས་གྲོས་ཚོགས་འཐུས་མི་རྣམ་པས་བོད་ནང་གི་འགྲོ་བ་མིའི་ཐོབ་ཐང་དང་། རྒྱ་གཞུང་གི་དྲག་རྩུབ་ཆེ་བའི་སྲིད་བྱུས་ལ་སྐྱོན་བརྗོད་སྔར་ལྷག་གནང་དགོས་པའི་འབོད་སྐུལ་ཞུས་གནང་ཡོད། དེ་བཞིན་ཚོགས་འདུའི་ནང་ཉི་འོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་གསར་རྙིང་གཉིས་ནས་བོད་ཀྱི་འཚེ་མེད་ཞི་བའི་རང་དབང་འཐབ་རྩོད་ཀྱི་གལ་གནད་སྐོར་ངོ་སྤྲོད་གནང་བ་མ་ཟད། ཁོང་རྣམས་ནས་བོད་དོན་ལ་མུ་མཐུད་རྒྱབ་སྐྱོར་གནང་རྒྱུའི་ནན་བརྗོད་དང་བོད་དོན་རྒྱབ་སྐྱོར་བ་རྣམས་ནས་ཉི་འོང་མི་མང་ལ་བོད་དོན་སྐོར་གོ་རྟོགས་སྤེལ་ཐབས་ལ་མཉམ་ལས་གནང་བའི་རེ་སྐུལ་གནང་ཡོད།
བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་དྲུང་ཆེ་ཀརྨ་ཆོས་དབྱིངས་ལགས་ཀྱིས་ཁོང་ཉིད་གསུང་བཤད་པར་མགྲོན་འབོད་གནང་བར་ཐུགས་རྗེ་ཆེ་ཞུས་གནང་པ་དང་སྦྲགས། ཉི་འོང་བོད་དོན་རྒྱབ་སྐྱོར་བ་རྣམས་ནས་བོད་དོན་ལ་རྒྱབ་སྐྱོར་གཡོ་མེད་གནང་བར་བཀའ་དྲིན་རྗེས་དྲན་ཞུས་ཡོད་པ་རེད།
ཚོགས་འདུའི་མཐར་ཉི་འོང་བོད་དོན་རྒྱབ་སྐྱོར་བ་རྣམས་ནས་བོད་དོན་དང་འབྲེལ་བའི་དོན་ཚན་ལྔ་ཅན་གྱི་གྲོས་ཆོད་སྤྱི་མོས་ཐོག་གཏན་འབེབས་གནང་བ་གཤམ་གསལ།
༡༽ རྒྱ་ནག་གཞུང་གི་འགོ་ཁྲིད་རྣམས་ཀྱིས་འཕྲལ་དུ་བོད་ནང་བོད་མིའི་འགྲོ་བ་མིའི་ཐོབ་ཐང་རྡོག་རོལ་གཏོང་མཚམས་བཞག་སྟེ་བོད་མི་རྣམས་ལ་གཞི་རྩའི་ཐོབ་ཐང་ལོངས་སུ་སྤྱོད་འཇུག་དགོས།
༢༽ རྒྱ་ནག་གཞུང་གི་འགོ་ཁྲིད་རྣམས་ནས་གཏན་འཇགས་སློབ་གྲྭ་ཁག་ཏུ་བོད་ཕྲུག་རྣམས་ལ་བཙན་པོས་ཆབ་སྲིད་སློབ་གསོ་སྤྲོད་མཚམས་འཇོག་དགོས།
༣༽ རྒྱ་ནག་གཞུང་གི་འགོ་ཁྲིད་རྣམས་ཀྱིས་གྲངས་ཉུང་མི་རིགས་ཀྱི་ཁྲིམས་ལག་བསྟར་བྱས་ཏེ་ཁོ་ཚོར་རང་ཉིད་སྐད་ཡིག་ལག་བསྟར་དང་རྒྱུན་འཛིན་བྱེད་རྒྱུའི་རང་དབང་ཆ་ཚང་སྤྲོད་དགོས།
༤༽ ཆོས་དད་མེད་པའི་རྒྱ་ནག་དམར་ཤོག་ཚོགས་པའི་འགོ་ཁྲིད་ཚོས་བོད་ཀྱི་ཆོས་ཕྱོགས་ཀྱི་གནང་སྒོ་སྤྱི་དང་བྱེ་བྲག་ཏུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་ངོས་འཛིན་གནང་ཕྱོགས་ལ་ཐེ་བྱུས་བྱེད་མི་ཆོག
༥༽ ཉི་འོང་བོད་དོན་རྒྱབ་སྐྱོར་ཚོགས་པའི་སྐུ་ཚབ་དང་ཚོགས་མི་སུས་ཀྱང་རྒྱ་ནག་གཞུང་གིས་བདམས་པའི་བླ་སྤྲུལ་དང་༸གོང་ས་ཏཱ་ལའི་བླ་མའི་ཡང་སྲིད་ལ་ངོ་རྒོལ་བྱེད་རྒྱུ་ལས་ནམ་ཡང་ངོས་ལེན་ཞུ་ཐབས་མེད།
