༄༅། །འདི་གར་བྱང་ཨ་རི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༣ ཟླ་བ་ ༢ ཚེས་ ༩ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་དཔལ་འབྱོར་ལས་ཁུངས་ཀྱི་དྲུང་ཚབ་བསྟན་འཛིན་ལེགས་གྲུབ་ལགས། བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་སྒྲུབ་ལགས་བཅས་ཨ་རིའི་གཞུང་གི་ PRM དང་  USAID རོགས་ཚོགས་ཀྱི་འགན་འཛིན་དང་ལས་བྱེད་ལྷན་མཇལ་འཕྲད་གནང་ནས་ལས་འཆར་དང་འབྲེལ་བའི་གནད་དོན་མང་པོའི་ཐོག་བཀའ་བསྡུར་ལྷུག་པོ་བྱུང་ཡོད།དེ་ཡང་ཉིན་གུང་རྗེས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་རྒྱལ་ས་ནང་གི་བསམ་མཛོད་བསྟི་གནས་ཁང་གྲགས་ཅན་ཨ་རིའི་རྒྱལ་སྤྱིའི་གནད་དོན་འཐབ་བྱུས་རིག་པའི་བསྟི་གནས་ཁང་དུ་བོད་ཀྱི་གནད་དོན་ཇི་ལྟར་གལ་གནད་ཆགས་ཚུལ་ (Why Tibet Matters: A litmus test for PRC’s commitment to international rule-based order.)  ཞེས་པའི་བརྗོད་གཞིའི་སྟེང་གསུང་བཤད་གནང་བ་དང་། ཨ་རིའི་བསྟི་གནས་ཁང་འདྲ་མིན་ནང་གི་རྒྱ་ནག་ཞིབ་འཇུག་པ་དང་གསར་ཁང་གྲགས་ཅན་གྱི་རྩོམ་སྒྲིག་པ་དང་ལྷན་བགྲོ་གླེང་གཏིང་ཟབ་གནང་ཡོད།ཉིན་རྒྱབ་བྱང་ཨ་རིའི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་ཀྱི་གོ་སྒྲིག་འོག་རྒྱ་རིགས་ཤེས་ཡོན་ཅན་དང་མང་གཙོ་དོན་གཉེར་བ། རྒྱ་རིགས་སློབ་ཕྲུག་སྐོར་ཞིག་དང་ལྷན་དཔལ་ལྡན་སྲིད་སྐྱོང་མཆོག་གིས་བོད་དང་རྒྱ་ནག་གི་གནས་བབ་དང་མ་འོངས་པའི་ལས་དོན་བྱེད་ཕྱོགས་སོགས་ཀྱི་ཐད་བཀའ་མོལ་ལྷུག་པོ་བྱུང་ཡོད།དེ་ཡང་འདུ་འཛོམས་ཐོག་རྒྱ་ནག་མི་སེར་ནུས་སྟོབས་ལས་འགུལ་ཁང་གི་འགན་འཛིན་ཡང་ཅན་ལིས་ལགས་དང་། རྒྱ་ནག་དབུས་དམར་ཤོག་སློབ་གྲྭའི་སློབ་སྟོན་པ་ཕྱིར་བྲོས་བྱོལ་དུ་འབྱོར་བ་སྐུ་མཁྱེན་མ་ཚའི་ཞ་ལགས། འོད་ཟེར་གསར་ཁང་གི་འགན་འཛིན་ཝང་རོས་ཆིན་ལགས། དོན་ཁང་དུ་ས་བྱི་ཞི་རྒོལ་སྐབས་ཀྱི་པར་འགྲེམས་གནང་མཁན་སྐུ་ཞབ་ཡུ་ཋི་ལགས། དེ་བཞིན་རྒྱལ་སའི་མངའ་ཁུལ་དུ་ཤོག་དཀར་གྱི་ལས་འགུལ་སྤེལ་མཁན་གྱི་རྒྱ་རིགས་སློབ་མ་སོགས་མཉམ་ཞུགས་གནང་ཡོད་པ་བཅས། །