༄༅། །བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ནས་ཕྱི་ལོ་ ༢༠༢༣ ཟླ་བ་ ༠༢ ཚེས་ ༠༤ ཉིན་ལས་རིམ་སྣ་ཚོགས་གོ་སྒྲིག་ཞུས་ཐོག་རྒྱལ་སྤྱིའི་འབྲས་ནད་ཉིན་མོ་སྲུང་བརྩི་ཞུས་ཡོད་པ་རེད།
དེ་ཡང་འཕྲོད་བསྟེན་ལས་ཁུངས་ཀྱིས་གོ་སྒྲིག་ཞུས་པའི་འབྲས་ནད་དང་འབྲེལ་བའི་བགྲོ་གླེང་ཚོགས་འདུའི་ཐོག་བདེ་ལེགས་སྨན་ཁང་གི་སྨན་པ་ཨོ་རྒྱན་རྒྱ་མཚོ་ལགས་དང་། སྨན་པ་ཚེ་རིང་མཚམས་གཅོད་ལགས་རྣམ་གཉིས་ཀྱིས་ཕྱི་ལུགས་དང་བོད་ལུགས་ཐོག་ནས་འབྲས་ནད་ལ་ལྟ་ཚུལ་དང་སྨན་བཅོས་ཇི་ཡོད་ཐད་གྲོས་བསྡུར་གནང་ཡོད་པ་དང་། བགྲོ་གླེང་ཚོགས་འདུའི་ཐོག་དཔལ་ལྡན་སྲིད་སྐྱོང་དང་འཕྲོད་བསྟེན་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་སྒྲ་འཇུག་གསུང་འཕྲིན་ཞིག་ཀྱང་གནང་ཡོད་པ་རེད།
དེ་བཞིན་འཕྲོད་བསྟེན་ལས་ཁུངས་དང་བོད་ཀྱི་འབྲས་ནད་ཚོགས་པ་ཟུང་སྦྲེལ་ཐོག་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་རྣམས་ལ་རིན་མེད་འཕྲོད་བསྟེན་བརྟག་དཔྱད་དང་། ཕྱི་དྲོ་ཆུ་ཚོད་ ༠༤ ནས་སྲིད་སྐྱོང་ཚོགས་ཁང་དུ་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་རྣམས་ལ་འབྲས་ནད་གོ་རྟོགས་ཀྱི་གསུང་བཤད་ལས་རིམ་ཞིག་གོ་སྒྲིག་ཞུས་ཤིང་། སྐབས་དེར་༸སྐུའི་བླ་སྨན་པ་ས་འདུ་ཚང་ཚེ་བརྟན་རྡོ་རྗེ་ལགས་ཀྱིས་བོད་མིའི་སྤྱི་ཚོགས་ཁྲོད་འབྲས་ནད་ཀྱི་དཀའ་ངལ་ཇི་ཡོད་དང་། ནད་གཞི་དེ་ཉིད་སྔོན་ཚུད་ནས་ངོས་འཛིན་གནང་ཐུབ་ཚེ་སྲོག་སྐྱོབ་ཚུལ་སྐོར་འགྲེལ་བརྗོད་གནང་ཡོད། ཕྱོགས་མཚུངས་ར་ཇིབ་གནྡི་འབྲས་ནད་བསྟི་གནས་ཁང་གི་སྨན་པ་མ་ནིཤ་ཤར་མ་ལགས་ཀྱིས་འབྲས་ནད་འབྱུང་སྒོ་གཉིས་ཀྱི་སྐོར་ངོ་སྤྲོད་ཞིབ་རྒྱས་གནང་ཡོད།
ཕྱོགས་མཚུངས་འཕྲོད་བསྟེན་ལས་ཁུངས་ཀྱི་ཁྱབ་ཁོངས་ས་གནས་སོ་སོའི་འཕྲོད་བསྟེན་སྨན་ཁང་རྣམས་ནས་བཙན་བྱོལ་བོད་མིའི་གཞིས་ཆགས་དང་། སློབ་གྲྭ དགོན་པ་སོགས་སུ་གོ་རྟོགས་ལས་འགུལ་དང་། སྨན་བཅོས་བརྟག་དཔྱད་སོགས་ཀྱི་ལས་འགུལ་སྣ་མང་ཞིག་སྤེལ་ཏེ་རྒྱལ་སྤྱིའི་འབྲས་ནད་ཉིན་མོ་སྲུང་བརྩི་ཞུས་ཡོད་པ་བཅས།།
