༄༅། །ཕྱི་ལོ་ ༢༠༢༣ ཟླ་བ་ ༠༢ ཚེས་ ༠༦ ཉིན་མཉམ་འབྲེལ་རྒྱལ་ཚོགས་ཀྱི་རང་དབང་ཅན་གྱི་ཆེད་མཁས་པ་གསུམ་གྱིས་གསར་འགོད་བསྒྲགས་གཏམ་བརྒྱུད་རྒྱ་ནག་གཞུང་གིས་བོད་ནང་མི་སེར་སྤེལ་ཡུལ་གཏན་འཇགས་སློབ་གྲྭ་ཁག་ནང་བོད་ཕྲུག་ས་ཡ་གཅིག་ལྷག་སློབ་འཇུག་བྱས་ཏེ་བོད་ཀྱི་རིག་གཞུང་རྒྱ་ནག་ཅན་དུ་སིམ་ཡལ་གཏོང་ཐབས་བྱེད་བཞིན་པར་སྐྱོན་བརྗོད་ཤུགས་ཆེ་གནང་ཡོད་པ་རེད།
དེ་ཡང་གསར་འགོད་བསྒྲགས་གཏམ་ནང་དུ་རྒྱལ་ཚོགས་ཀྱི་གྲངས་ཉུང་མི་རིགས་གནད་དོན་ཐད་ཀྱི་དམིགས་བསལ་ཆེད་མཁས་པ་སྐུ་ཞབས་ཧྥར་ནནྜ་ཊི་ཝར་ནིས་ (Fernand de Varennes) ལགས་དང་། ཤེས་ཡོན་ཐོབ་ཐང་ཐད་ཀྱི་དམིགས་བསལ་ཆེད་མཁས་པ་ལྕམ་སྐུ་ཧྤ་རི་ཊ་ཤ་ཧིཊ་ (Farida Shaheed) ལགས། རིག་གཞུང་ཐོབ་ཐང་ཐད་ཀྱི་དམིགས་བསལ་ཆེད་མཁས་པ་ལྕམ་སྐུ་ཨེ་ལེག་སེན་དྲ་ཤན་ཐ་ཀི་ (Alexandra Xanthaki) ལགས་བཅས་ཐུན་མོང་ནས་རྒྱ་ནག་གཞུང་གིས་གཏན་འཇགས་སློབ་གྲྭ་བརྒྱུད་བོད་ཀྱི་ཆོས་དང་རིག་གཞུང་། སྐད་ཡིག་བཅས་རྒྱ་ནག་ཅན་དུ་སིམ་ཡལ་གཏང་རྒྱུའི་དྲག་གནོན་ཆེ་བའི་སྲིད་བྱུས་ལ་ཐུགས་འཚབ་བསྟན་པ་དང་ཆབས་ཅིག་སྲིད་བྱུས་དེས་བོད་ཕྲུག་གྲངས་ས་ཡ་གཅིག་ལྷག་ལ་ཤུགས་རྐྱེན་ཐེབས་ཡོད་པའི་ཉེན་བརྡ་བཏང་ཡོད། དེ་བཞིན་ཆེད་མཁས་པ་རྣམས་ནས་རྒྱ་ནག་གཞུང་གིས་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཚད་གཞི་དང་ཡོངས་སུ་འགལ་ཏེ་བོད་ཕྲུག་ཕོན་ཆེ་ཕ་མ་དང་ཁ་བྲལ་ཏེ་གཏན་འཇགས་སློབ་གྲྭར་སློབ་འཇུག་བྱས་པ་ནི་བོད་རིགས་རྣམས་གྲངས་མང་རྒྱ་རིགས་ཅན་དུ་མཉམ་བསྲེས་གཏང་རྒྱུའི་གཞི་རྒྱ་ཆེ་བའི་ལས་གཞི་ཞིག་ཏུ་སྣང་བས་གནད་དོན་དེར་བློ་ཕམ་བྱུང་ཞེས་གསུངས་ཡོད་པ་རེད།
དེ་ལྟ་བུའི་གཏན་འཇགས་སློབ་གྲྭ་ཁག་ཏུ་ངེས་ཅན་རྒྱ་སྐད་ཙམ་ལས་བོད་ཀྱི་རིག་གཞུང་དང་། སྐད་ཡིག ལོ་རྒྱུས་སོགས་ལ་སློབ་སྦྱོང་བྱེད་རྒྱུའི་གོ་སྐབས་མེད་པ་དང་། དེ་ལ་བརྟེན་ནས་བོད་ཕྲུག་རྣམས་ནས་རང་གི་ཕ་སྐད་བརྗེད་དེ་ཕ་མ་དང་སྤོ་པོ་རྨོ་མོ་རྣམས་ལ་ཁ་བརྡ་བྱེད་མི་ཐུབ་ཅིང་། དེའི་མཇུག་འབྲས་སུ་བོད་མིའི་ངོ་བོ་རྒྱ་ནག་ཅན་དུ་སིམ་ཡལ་དུ་འགྲོ་ངེས་པ་གསུངས། དེ་བཞིན་རྒྱལ་ཚོགས་ཀྱི་རང་དབང་ཅན་གྱི་ཆེད་མཁས་པ་རྣམས་ནས་ཉེ་བའི་ལོ་ཤས་ནས་བཟུང་བོད་ནང་དེ་ལྟ་བུའི་གཏན་འཇགས་སློབ་གྲྭའི་གྲངས་འཕར་བཞིན་ཡོད་པ་དང་། རྒྱ་ནག་སྤྱི་ཡོངས་དང་བསྡུར་ན་སློབ་གྲྭ་དེ་རིགས་བོད་ནང་མང་བ་ཡོད་ལ། དེའི་རྒྱུ་རྐྱེན་ནི་བོད་རིགས་བཅའ་སྡོད་ས་གནས་ཁག་གི་གྲོང་གསེབ་ཀྱི་སློབ་གྲྭ་ཁག་ཕྱིར་བསྡུ་བྱས་ཏེ། དེའི་ཚབ་ཏུ་སློབ་ཁྲིད་བརྒྱུད་ལམ་རྒྱ་སྐད་ཁོ་ན་བེད་སྤྱོད་བྱེད་པའི་གྲོང་ཁྱེར་གྱི་སློབ་གྲྭ་གསར་འཛུགས་བྱེད་པའི་རྐྱེན་གྱིས་ཡིན་ཞེས་གསུངས།
དེ་ལྟར་རྒྱ་གཞུང་གིས་བོད་ཀྱི་ཤེས་རིག་དང་། ཆོས་དད། སྐད་ཡིག་ཐོག་དྲག་གནོན་ཆེ་བའི་ལས་འགུལ་བརྒྱུད་བོད་མིའི་ངོ་བོ་དེ་དབང་ཤེད་ཆེ་བའི་གྲངས་མང་རྒྱ་ནག་ཅན་དུ་སིམ་ཡལ་གཏང་རྒྱུའི་སྲིད་བྱུས་དེར་ཆེད་མཁས་པ་རྣམས་ནས་ཐུགས་འཚབ་དང་སྦྲགས། ཁོང་རྣམས་ནས་གནད་དོན་དེ་དང་འབྲེལ་ཏེ་རྒྱ་ནག་གཞུང་གི་དཔོན་རིགས་འབྲེལ་བ་གནང་བཞིན་ཡོད་པ་དང་། དེ་སྔོན་ཕྱི་ལོ་ ༢༠༢༢ ཟླ་བ་ ༡༡ ནང་དེ་འབྲེལ་རྒྱ་ནག་གཞུང་ལ་ཡིག་འབྲེལ་ཞིག་བཏང་གནང་ཡོད་པ་གསུངས་ཡོད།
རྒྱལ་ཚོགས་ཀྱི་རང་དབང་ཅན་གྱི་ཆེད་མཁས་པའི་བོད་དོན་གསར་འགོད་བསྒྲགས་གཏམ་དེ་དང་འབྲེལ་ཏེ་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས། རྒྱལ་ཚོགས་ཀྱི་ཆེད་མཁས་པ་རྣམས་ནས་བོད་ནང་རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནས་ཚུལ་ཞིབ་ཕྲ་འཁོད་པའི་བོད་དོན་གསར་འགོད་བསྒྲགས་གཏམ་དེ་ཐེངས་དང་པོའི་གྲས་ཆགས་ཡོད། ང་ཚོའི་རེ་བ་ལ་བོད་དེ་འཛམ་གླིང་ནང་གི་ཆེས་རང་དབང་ཞན་པའི་ས་ཁུལ་དུ་གྱུར་ཡོད་པ་མ་ཟད། དམིགས་བསལ་བོད་ནང་གི་ཛ་དྲག་གནས་སྟངས་ལ་བརྟེན་ནས་མང་པོས་དེ་ལ་མཇུག་སྐྱོང་ཞུ་ངེས་རེད། ཆེད་མཁས་པ་རྣམས་ཀྱི་གསུངས་པ་ལྟར་སྤྱིར་རྒྱ་ནག་གི་ས་གནས་གཞན་ཁག་ཏུ་གཏན་འཇགས་སློབ་གྲྭ་མང་པོ་ཡོད་ནའང་བོད་ནང་གི་གྲངས་ཚད་གཞན་ལས་མཐོ་བ་ཡོད། དེ་ནི་རྒྱ་ནག་གཞུང་གིས་འཆར་གཞི་ལྡན་པའི་ཐོག་ནས་བོད་ཀྱི་ཆོས་དང་རིག་གཞུང་། སྐད་ཡིག་བཅས་པ་རྩ་མེད་གཏང་རྒྱུའི་འབད་རྩོལ་རེད། ཆེད་མཁས་པ་རྣམས་ཀྱིས་རྒྱ་ནག་གཞུང་དང་ལྷན་འབྲེལ་བ་གནང་སྐབས་དེ་ལྟ་བུའི་གཏན་འཇགས་སློབ་གྲྭ་རྣམས་སྒོ་བརྒྱབ་རྒྱུར་གནོན་ཤུགས་སྤྲད་དགོས་པ་མ་ཟད། དེ་འབྲེལ་ཞིབ་ཕྲའི་སྙན་ཐོ་བཏོན་དགོས་པའི་རེ་སྐུལ་ཞུ་རྒྱུ་ཡིན་ཞེས་གསུངས་ཡོད་པ་རེད།
སྤྱིར་མཉམ་འབྲེལ་རྒྱལ་ཚོགས་ཀྱི་རང་དབང་ཅན་གྱི་ཆེད་མཁས་པ་རྣམས་ནས་བོད་ནང་རྒྱ་ནག་གཞུང་གིས་གཏན་འཇགས་སློབ་གྲྭ་བརྒྱུད་བོད་མིའི་ངོ་བོ་རྒྱ་ནག་ཅན་དུ་སིམ་ཡལ་གཏང་རྒྱུའི་དྲག་གནོན་ཆེ་བའི་སྲིད་བྱུས་ལག་བསྟར་བྱེད་བཞིན་པར་ཐུགས་འཚབ་དང་བཅས་ཕྱི་ལོ་ ༢༠༢༢ ཟླ་བ་ ༡༡ ཚེས་ ༡༡ ཉིན་རྒྱ་ནག་གཞུང་ལ་ཡིག་འབྲེལ་ཞིག་བཏང་གནང་ཡོད་ཅིང་། གལ་ཏེ་རྒྱ་གཞུང་ནས་དེ་དོན་ཡིག་འབྲེལ་ཟླ་བ་གཉིས་ནང་ཚུན་མ་བཏང་ན་ཡིག་འབྲེལ་དེ་ཉིད་ཡོངས་ཁྱབ་གསལ་བསྒྲགས་གནང་རྒྱུ་ཡིན་པ་གསུངས་པ་ལྟར་ཕྱི་ལོ་ ༢༠༢༣ ཟླ་བ་ ༠༡ ཚེས་ ༡༡ ཉིན་ཡིག་འབྲེལ་དེ་ཡོངས་ཁྱབ་གསལ་བསྒྲགས་གནང་ཡོད་པ་བཅས།།
