༄༅། །འདི་གར་བྱང་ཨ་རི་སྐུ་ཚབ་དོན་ཁང་གི་བོད་རིགས་འབྲེལ་མཐུད་པ་ཀུན་དགའ་བཀྲ་ཤིས་ལགས་ཀྱིས་བཏང་གནས་ནང་འཁོད་དོན།  དེ་ཡང་ཉིན་ཤས་སྔོན།  <<བོད་ཇ།>> གསར་འཕྲིན་འགོ་འཛུགས་བྱེད་མཁན་བོད་རིགས་གཞོན་སྐྱེས་ཁག་ཅིག་གིས་སློབ་གྲྭ་གུང་གསེང་དང་བསྟུན་ནས་བྱང་ཨ་རི་སྐུ་ཚབ་དོན་གཅོད་ཀྱི་ལས་ཁུངས་ནང་གཞོན་སྐྱེས་སློབ་ཕྲུག་མཉམ་འཛོམས་ཀྱིས་བོད་དོན་གླེང་བའི་བྱེད་སྒོ་ཞིག་སྤེལ་ཡོད་པ་དང་།  སྐུ་ཚབ་དོན་གཅོད་འབུམ་རམས་པ་རྣམ་རྒྱལ་ཆོས་སྒྲུབ་ལགས་ཀྱིས་བློ་རིག་བཀྲ་བའི་སློབ་ཕྲུག་རྣམས་དངོས་སུ་ངོ་ཐུག་གནང་སྟེ།  མ་འོངས་བོད་ཀྱི་སོན་རྩ་ཡིན་པའི་གཞོན་སྐྱེས་ཚོས་བོད་མིའི་ངོ་བོ་མ་བརླགས་པ་བྱེད་དགོས་པའི་གལ་ཆེའི་རང་བཞིན་དྲན་སྐུལ་གནང་ཡོད།   

གཞོན་སྐྱེས་མཉམ་འཛོམས་ཀྱིས་བོད་དོན་གླེང་བའི་བྱེད་སྒོ་དེ་ནི།  ཨ་རིའི་རྒྱལ་སའི་མངའ་ཁུལ་དུ་ཡོད་པའི་ <<བོད་ཇ།>> གསར་འཕྲིན་འགོ་འཛུགས་བྱེད་མཁན་གཞོན་སྐྱེས་བཞི་ནས་གྲ་སྒྲིག་བྱས་པ་ཞིག་ཡིན་པ་དང་།  གཞོན་སྐྱེས་ཚོས་ཁུར་བླངས་ནས་བོད་དོན་ལ་དོ་སྣང་བྱེད་སྐབས། གཞོགས་འདེགས་རོགས་རམ་གང་ཐུབ་བྱེད་རྒྱུ་ནི་བོད་མིའི་སྒྲིག་འཛུགས་བཀའ་ཤག་གི་དགོངས་པ་ཡིན་སྟབས།  སྐུ་ཚབ་དོན་གཅོད་ལས་ཁུངས་ནས་འདུ་འཛོམས་བྱེད་ཡུལ་ས་ཆའི་མཐུན་འགྱུར་སྦྱར་བ་དང་།  དོན་ཁང་གི་ངོ་ཡོད་ལས་བྱེད་རྣམས་མཉམ་ཞུགས་གནང་ཡོད་པ་མ་ཟད།  གཞོན་སྐྱེས་ཚོའི་ཕ་མས་ཀྱང་བྱེད་སྒོ་དེ་ལ་རྒྱབ་སྐྱོར་གྱི་རྣམ་འགྱུར་མཚོན་པ་གནང་ཡོད།

ཨ་རིའི་རྒྱལ་སའི་མངའ་ཁུལ་གྱི་བོད་རིགས་གཞོན་སྐྱེས་བཀྲ་ཤིས་བྱེས་གཞོངས་ལགས་དང་།  བསྟན་འཛིན་ཚེ་སྒྲུབ་ལགས།  བསྟན་འཛིན་ཡོན་ཏན་ལགས།  བསྟན་འཛིན་ཚེ་རིང་ལགས་བཅས་ནས་ཕྱི་ལོ་ ༢༠༢༢ ལོའི་ཟླ་བ་དང་པོའི་ནང་བོད་ཇ་གསར་འཕྲིན་དངོས་སུ་འགོ་འཛུགས་བྱས་པའི་མཛད་སྒོ་ཞིག་ཚོགས་ཡོད་པ་དང་།  དེའི་དམིགས་ཡུལ་གཙོ་བོ་ནི་རང་རིགས་གཞོན་སྐྱེས་རྣམས་ལ་བོད་དོན་གོ་རྟོགས་སྤེལ་རྒྱུ་དང་།  མི་རབས་གསར་པའི་རྒྱུད་ལ་བོད་མི་རིགས་ཀྱི་ངོ་བོ་བརྟན་པོ་གནས་པ་བྱེད་རྒྱུའི་ཆེད་དུ་ཡིན་པ་རེད།  

<<བོད་ཇ།>> གསར་འཕྲིན་འགོ་འཛུགས་བྱས་ནས་ལོ་གཅིག་ཏག་ཏག་འཁོར་བའི་མཚམས་འདིར།  ཁོང་བཞི་པོས་མཐོ་སློབ་དང་།  མཐོ་རིམ་སློབ་འབྲིང་དུ་སློབ་སྦྱོང་བྱེད་བཞིན་པའི་གཞོན་སྐྱེས་ཁག་ཅིག་མགྲོན་འབོད་ཀྱིས་བྱང་ཨ་རི་སྐུ་ཚབ་དོན་གཅོད་ལས་ཁུངས་ནང་བོད་སྐོར་གླེང་བ་དེ་ནི་བསྔགས་པར་འོས་པའི་བྱེད་སྒོ་ཞིག་ཡིན།  

སྔ་ལོ་ཟླ་བ་དང་པོར་གཞོན་སྐྱེས་ཚོས་བོད་ཇ་གསར་འཕྲིན་འགོ་འཛུགས་ཀྱི་མཛད་སྒོ་ཚོགས་སྐབས་ “རྒྱལ་སའི་མངའ་ཁུལ་གྱི་བོད་མི་རྒན་པ་མང་པོ་མཉམ་ཞུགས་གནང་ཡོད་པ་མ་ཟད།  ལྷག་པར་དུ་སྐུ་ཚབ་དོན་གཅོད་ཆེད་དུ་མཛད་སྒོར་ཕེབས་པ་འདིས།  ང་ཚོའི་སེམས་ནང་དམིགས་བསལ་གྱི་དགའ་སྣང་ཆེན་པོ་བྱུང་སོང་། ”  ཞེས་གཞོན་སྐྱེས་བཞི་པོས་གསར་ཁང་གི་བཅར་འདྲི་དང་ལེན་སྐབས་འགྲེལ་བརྗོད་གནང་འདུག་པ་དེའི་ཐོག་ནས། གཞོན་སྐྱེས་ཀྱི་བྱེད་སྒོར་ཕྱོགས་ཚང་མས་རྒྱབ་སྐྱོར་གནང་རྒྱུ་འདི་གལ་ཆེན་པོ་ཡིན་པ་སྟོན་གྱི་ཡོད།   །