༄༅། །བོད་མིའི་སྒྲིག་འཛུགས་ཆོས་རིག་ལས་ཁུངས་དང་ས་རཱ་བོད་ཀྱི་མཐོ་རིམ་སློབ་གཉེར་ཁང་ཟུང་སྦྲེལ་ཐོག་གོ་སྒྲིག་ཞུས་པའི་དགུན་དུས་བོད་ཀྱི་རིག་གཞུང་གོ་རྟོགས་ལས་གཞི་ཕྱི་ལོ་ ༢༠༢༣ ཟླ་བ་ ༠༡ ཚེས་ ༡༠ ཉིན་ལེགས་པར་མཇུག་སྒྲིལ་ཡོད།
དེ་ཡང་མཇུག་སྡོམ་མཛད་སྒོའི་སྐུ་མགྲོན་གཙོ་བོར་ཆོས་རིག་དྲུང་འཕར་བདུད་འདུལ་རྡོ་རྗེ་ལགས་དང་། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སློབ་སྤྱི་པ་སངས་ཚེ་རིང་ལགས་ཕེབས་ཡོད་པ་དང་། མཇུག་སྡོམ་གསུང་བཤད་དུ་ས་རཱ་མཐོ་སློབ་ཀྱི་སློབ་སྤྱི་པ་སངས་ཚེ་རིང་ལགས་ཀྱིས་གོ་རྟོགས་ལས་གཞིའི་དུས་ཡུན་སྐབས་ལས་གཞི་ཇི་སྤེལ་དང་། དེ་དག་གི་དགེ་མཚན་གང་ཡོད་ངོ་སྤྲོད་འགྲེལ་བརྗོད་གནང་རྗེས་ཆོས་རིག་དྲུང་འཕར་བདུད་འདུལ་རྡོ་རྗེ་ལགས་ཀྱིས་རང་འགན་རང་ཁུར་གྱི་གལ་གནད་དང་། ཚོགས་བཅར་བ་རྣམས་ནས་བོད་ཀྱི་སྐད་ཡིག་སྦྱོང་སྤྱོད་བྱེད་དང་ཆབས་ཅིག་རང་གི་མངོན་འདོད་ལྟར་སློབ་སྦྱོང་ལ་ཧུར་བརྩོན་གནང་དགོས་པའི་འབོད་སྐུལ་ཞུས་ཡོད་པ་རེད། ཚོགས་བཅར་བ་རྣམས་ནས་ཀྱང་རང་གི་མྱོང་ཚོར་དང་ལེགས་སྤེལ་ཉེས་འགོག་གི་བསམ་ཚུལ་བཏོན་པ་མ་ཟད། ལས་གཞི་གོ་སྒྲིག་གནང་མཁན་རྣམས་ལ་ཐུགས་རྗེ་ལེགས་འབུལ་ཞུས་པའི་ཁར། རང་ཉིད་ལ་སློབ་སྐྱེད་ཇི་བྱུང་སྐོར་འགྲེལ་བརྗོད་གནང་ཡོད།
མཐའ་དོན་སྐུ་མགྲོན་གཙོ་བོ་ཆོས་རིག་དྲུང་འཕར་བདུད་འདུལ་རྡོ་རྗེ་ལགས་ཀྱིས་ཚོགས་བཅར་བ་རྣམས་ལ་ཟབ་སྦྱོང་ལེགས་གྲུབ་ཀྱི་གཟེངས་བསྟོད་ཕྱག་འཁྱེར་གནང་རྗེས་སློབ་ཕྲུག་རྣམས་ཀྱིས་ཟབ་སྦྱོང་སྐབས་སྦྱངས་པའི་བོད་གཞས་གཟིགས་འབུལ་ཞུས་ཏེ་མཛད་སྒོ་ལེགས་པར་གྲོལ་ཡོད་པ་རེད།
དགུན་དུས་བོད་ཀྱི་རིག་གཞུང་གོ་རྟོགས་ལས་གཞི་དེ་ཉིད་རྒྱ་གར་ནང་གི་བོད་སློབ་མིན་པའི་སློབ་གྲྭ་ཁག་ཏུ་སློབ་གཉེར་བྱེད་བཞིན་པའི་བོད་ཕྲུག་རྣམས་ལ་བོད་ཀྱི་ཆོས་དང་རིག་གཞུང་། སྐད་ཡིག་ངོ་སྤྲོད་ཆེད་གོ་སྒྲིག་ཞུས་པ་ཞིག་ཡིན། ལས་གཞི་དེར་དཔལ་འབྱོར་གྱི་མཐུན་རྐྱེན་ཨ་རིའི་རོགས་ཚོགས་(USAID) ནས་སྦྱར་གནང་ཡོད་པ་བཅས།།
