༄༅། །ཕྱི་ལོ་ ༢༠༢༣ ཟླ་བ་ ༠༡ ཚེས་ ༠༧ ཉིན་བེལ་ཇམ་ཆོས་རིག་འཛིན་སྐྱོང་གི་འཇམ་དབྱངས་བློ་འཕེལ་གཟའ་མཇུག་སློབ་གྲྭའི་ལོ་འཁོར་བྱིས་པའི་རིག་གཞུང་ཉིན་མོ་དང་། ཕྱི་སྣུར་ཞུས་པའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་ཝེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་ ༣༣ འཁོར་བའི་དུས་ཆེན་སྲུང་བརྩི་ཞུས་འདུག
མཛད་སྒོའི་ཐོག་བེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་དང་། ར་ཉག་དཔལ་སྤྲུལ་རིན་པོ་ཆེ་རྣམ་གཉིས་ཀྱིས་གཙོས་བེལ་ཇམ་ཁུལ་གྱི་བོད་རིགས་ཚོགས་སྐྱིད་ཁག་གི་སྐུ་ཚབ་མཉམ་ཞུགས་གནང་འདུག་ཅིང་། སྐབས་དེར་དཔལ་སྤྲུལ་རིན་པོ་ཆེ་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་དང་། བོད་རིགས་གཞོན་སྐྱེས་རྣམས་ལ་བོད་ཀྱི་ཆོས་དང་རིག་གཞུང་རྒྱུན་འཛིན་བྱ་རྒྱུའི་ལས་འགན་ཡོད་སྐོར་འགྲེལ་བརྗོད་གནང་བ་དང་ཆབས་ཅིག་ཁོང་གིས་གཟའ་མཇུག་སློབ་གྲྭའི་དགེ་ལས་དང་ཕ་མ། སློབ་ཕྲུག་རྣམས་ལ་བསྔགས་བརྗོད་དང་འབྲེལ་སློབ་གྲྭའི་ཆེད་ཡུ་སྒོར་ཕོན་ཆེན་ཞལ་འདེབས་གནང་འདུག
སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ལམ་སྟོན་བཞིན་བོད་མི་རྣམས་ཆིག་སྒྲིལ་གྱིས་ཐུན་མོང་གི་མངོན་འདོད་ཆེད་འབད་འབུངས་གནང་དགོས་པའི་ལམ་སྟོན་གནང་ཞིང་། གསུང་བཤད་ལས་རིམ་གྲུབ་མཚམས་གཟའ་མཇུག་སློབ་གྲྭའི་སློབ་ཕྲུག་དང་ཕ་མ་རྣམས་ནས་གཞས་སྣ་ཁག་གཅིག་གཟིགས་འབུལ་ཞུས་འདུག
གཞན་ཡང་འདུ་འཛོམས་དང་སྟབས་བསྟུན་སྐུ་ཚབ་དོན་ཁང་གི་དྲུང་ཆེ་འཕྲིན་ལས་དབང་འདུས་ལགས་དང་། རྩིས་པ་བསྟན་འཛིན་ནོར་ལྡན་ལགས་གཉིས་ནས་བཙན་བྱོལ་བོད་མིའི་མི་འབོར་གྲངས་བཤེར་གནང་འདུག
སྤྱིར་བེལ་ཇམ་ཆོས་རིག་འཛིན་སྐྱོང་འོག་སློབ་གྲྭ་ཁག་དྲུག་དང་སློབ་ཕྲུག་གྲངས་ ༣༧༢ ཡོད་པ་བཅས།།
